ନୂଆଦିଲ୍ଲୀ: ଅବୈଧ ବିଦେଶୀଙ୍କ ବିରୋଧରେ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ବ୍ୟାପକ କାର୍ଯ୍ୟାନୁଷ୍ଠାନ ଅଧୀନରେ ଆମେରିକାରୁ ପ୍ରତ୍ୟର୍ପିତ ଭାରତୀୟଙ୍କ ସମେତ ପ୍ରାୟ ୩୦୦ ବେଆଇନ ପ୍ରବାସୀଙ୍କୁ ବର୍ତ୍ତମାନ ପାନାମାର ଏକ ହୋଟେଲରେ ଅଟକ ରଖାଯାଇଛି। ପାନାମା ସିଟିର ଡେକାପଲିସ୍ ହୋଟେଲର ଝରକାରେ ହତାଶ ଲୋକମାନେ ‘ଦୟାକରି ଆମକୁ ସାହାଯ୍ୟ କରନ୍ତୁ’ ଏବଂ ‘ଆମେ ସୁରକ୍ଷିତ ନୁହଁ’ ଲେଖାଥିବା କାଗଜ ଧରିଥିବା ବେଳେ ପୁଲିସ ଅଧିକାରୀମାନେ ପରିସରରେ ଛିଡା ହୋଇଥିବା ଫଟୋରେ ଦେଖିବାକୁ ମିଳିଛି। ଆସୋସିଏଟେଡ୍ ପ୍ରେସ୍ ରିପୋର୍ଟ ଅନୁଯାୟୀ, ପ୍ରାୟ ୩୦୦ ଲୋକଙ୍କ ମଧ୍ୟରୁ ଅଧିକାଂଶ ଭାରତ, ନେପାଳ, ଶ୍ରୀଲଙ୍କା, ପାକିସ୍ତାନ, ଆଫଗାନିସ୍ତାନ, ଚୀନ୍, ଭିଏତନାମ ଓ ଇରାନର ଥିଲେ। ଏମାନଙ୍କ ମଧ୍ୟରୁ କେତେକ ଦେଶକୁ ପ୍ରତ୍ୟର୍ପଣ ପ୍ରକ୍ରିୟାରେ ଆମେରିକା ଅସୁବିଧାର ସମ୍ମୁଖୀନ ହେଉଥିବାରୁ ପାନାମାକୁ ‘ଷ୍ଟପ୍ ଓଭର’ ଭାବେ ବ୍ୟବହାର କରାଯାଉଛି।
ପାନାମାର ସୁରକ୍ଷା ମନ୍ତ୍ରୀ ଫ୍ରାଙ୍କ ଆବ୍ରେଗୋ କହିଛନ୍ତି ଯେ ପ୍ରବାସୀମାନେ ଆମ ହେପାଜତରେ ସୁରକ୍ଷିତ ଅଛନ୍ତି। ପାନାମା ଓ ଆମେରିକା ମଧ୍ୟରେ ଏକ ସ୍ଥାନାନ୍ତର ଚୁକ୍ତି ଅନୁଯାୟୀ ଦେଶାନ୍ତର ହୋଇଥିବା ଲୋକମାନେ ଚିକିତ୍ସା ସହାୟତା ଓ ଖାଦ୍ୟ ପାଉଛନ୍ତି। ଚଳିତ ମାସ ପ୍ରାରମ୍ଭରେ ଆମେରିକାର ବୈଦେଶିକ ସଚିବ ମାର୍କୋ ରୁବିଓଙ୍କ ପାନାମା ଗସ୍ତ ପରେ କେନ୍ଦ୍ରୀୟ ଆମେରିକୀୟ ରାଷ୍ଟ୍ର ପ୍ରତ୍ୟର୍ପିତଙ୍କ ପାଇଁ ଏକ ‘ସେତୁ’ ଭାବେ କାର୍ଯ୍ୟ କରିବାକୁ ରାଜି ହୋଇଥିବା ବେଳେ ୱାସିଂଟନ ଏହି ଅପରେସନର ସମସ୍ତ ଖର୍ଚ୍ଚ ବହନ କରୁଛି। ଆବ୍ରେଗୋ ଆହୁରି କହିଛନ୍ତି ଯେ ଯେଉଁମାନେ ନିଜ ଦେଶକୁ ଯିବାକୁ ଚାହୁନାହାନ୍ତି ସେମାନଙ୍କୁ କଲମ୍ବିଆ ସହିତ ପାନାମାସୀମା ନିକଟରେ ଥିବା ଡାରିଆନ୍ ଜଙ୍ଗଲରେ ଥିବା ଏକ ଆଶ୍ରୟସ୍ଥଳକୁ ପଠାଯିବ ଏବଂ ଅନ୍ତର୍ଜାତୀୟ ମାଇଗ୍ରେସନ୍ ସଂଗଠନ ଓ ଜାତିସଂଘ ଶରଣାର୍ଥୀ ଏଜେନ୍ସି ସେମାନଙ୍କୁ ଅନ୍ୟ ଦେଶକୁ ସ୍ଥାନାନ୍ତର କରିବାକୁ ବ୍ୟବସ୍ଥା କରିବେ।