କିଡନୀର ସ୍ୱାସ୍ଥ୍ୟ ବିଷୟରେ ଲୋକଙ୍କ ମଧ୍ୟରେ ସଚେତନତା ସୃଷ୍ଟି କରିବା ପାଇଁ ୨୦୦୬ ଠାରୁ ବିଶ୍ଵ ସ୍ୱାସ୍ଥ୍ୟ ସଂଗଠନ ପକ୍ଷରୁ ପ୍ରତି ବର୍ଷ ମାର୍ଚ୍ଚ ମାସର ଦ୍ଵିତୀୟ ଗୁରୁବାରକୁ ବିଶ୍ଵ କିଡନୀ ଦିବସ ଭାବେ ପାଳନ କରାଯାଉଛି । କିଡନୀ ହେଉଛି ଆମ ଶରୀରର ଏକ ଫିଲଟର ଭଳି । ଆମ ଶରୀରରୁ ଅପରିଷ୍କାର ରକ୍ତକୁ ଛାଣି ଶରୀରକୁ ବିଶୁଦ୍ଧ ରକ୍ତ ଯୋଗାଇବା କିଡନୀର ମୁଖ୍ୟ କାମ । ତେଣୁ କିଡନୀକୁ ସୁସ୍ଥ ରଖିବା ନିହାତି ଦରକାର । ଜାଣନ୍ତୁ ଏନେଇ କଣ କହୁଛନ୍ତି ବିଶିଷ୍ଟ କିଡନୀ ପ୍ରତିରୋପଣ ସର୍ଜନ ଡାକ୍ତର ମାନସ ରଞ୍ଜନ ।
କିଡନୀ ସୁସ୍ଥ ରହିଲେ ଆମେ ବି ସୁସ୍ଥ ରହିବା । ତେଣୁ ଆମ ରକ୍ତ ବିଶୁଦ୍ଧ ହେବା ନିହାରି ଆବଶ୍ୟକ ଓ ଏଥିପାଇଁ କିଡନୀ ସୁସ୍ଥ ରହିବା ଆବଶ୍ୟକ । କୌଣସି କାରଣରୁ ଯଦି କିଡନୀ ଠିକ ଭାବେ କାର୍ଯ୍ୟ ପରିପାରେ ନାହିଁ ତେବେ ଆମ ରକ୍ତରେ ଅପରିଷ୍କାର ପଦାର୍ଥ ସବୁ ଜମା ହୁଏ । ଏହାଦ୍ବାରା ବ୍ୟକ୍ତିଙ୍କୁ ଭୋକ ହୁଏନି, ଗୋଡ ହାତ ଓ ମୁହଁ ଫୁଲିଯାଏ, କାର୍ଯ୍ୟ କରିବାରେ ଆଗ୍ରହ ହୁଏ ନାହିଁ, ଦୁର୍ବଳ ଲାଗିବା ଏହିପରି ଅନେକ ଲକ୍ଷଣ ଦେଖାଯାଏ ।
ଶରୀରର ପାଣି ଅଂଶ, ୟୁରିଆ ଏବଂ ଅନ୍ୟାନ୍ୟ ଏସିଡ ଓ ପ୍ରୋଟିନ ସବୁ ଆମ ଶରୀରରେ ବାଲାନ୍ସ କରିବା ହେଉଛି କିଡନୀର କାର୍ଯ୍ୟ । କାରଣ ଏହି ସବୁ ପଦାର୍ଥ ଆମ ଶରୀରରେ ଆବଶ୍ୟକ ଠାରୁ ଅଧିକ ରହିଲେ ଏହା ହାନିକରକ ହୋଇଥାଏ । ଆଉ କିଡନୀକୁ ସୁସ୍ଥ ରଖିବା ପାଇଁ ସନ୍ତୁଳିତ ଖାଦ୍ୟ ପଦାର୍ଥ ମଧ୍ୟ ସେବନ କରିବା ଆବଶ୍ୟକ । ଆଜିକାଲି ସମସ୍ତେ ବାହାରର ପ୍ରୋସେସଡ୍ ଖାଦ୍ୟ ସବୁ ଅଧିକ ଖାଉଛୁ ।
ଶୀଘ୍ର ବଡି ବିଲଡିଙ୍ଗ ପାଇଁ ଆଜିକାଲି ଯୁବପିଢି ବହୁଳ ମାତ୍ରାରେ ପ୍ରୋଟିନ ମଧ୍ୟ ନେଉଛନ୍ତି । ଜାଣିବା ଉଚିତ ଯେ ଆବଶ୍ୟକ ଠାରୁ ଅଧିକ ପ୍ରୋଟିନ ମଧ୍ୟ ଆମ ଶରୀର ପାଇଁ କ୍ଷତିକାରକ ଅଟେ । ନିଜ ଶରୀର ଓଜନ ଅନୁସାରେ କେତେ ପ୍ରୋଟିନ ଖାଇବା ଆବଶ୍ୟକ ଏହା ଡାକ୍ତରଙ୍କ ପରାମର୍ଶ କରିବା ଉଚିତ । ପ୍ରତିଦିନ ଖାଦ୍ଯରେ ସବୀଜ ପନିପରିବା, ଫଳମୂଳ ଆଦି ସେବନ କରିବା ଆବଶ୍ୟକ । ଯେତେ ସମ୍ଭବ ବଜାରରେ ମିଳୁଥିବା ଖାଦ୍ଯ ଠାରୁ ଦୂରେଇ ରୁହନ୍ତୁ ।
ବାରମ୍ବାର ବ୍ୟବହାର ହେଉଥିବା ତେଲରେ ତିଆରି ଖାଦ୍ୟ ଆମ ଶରୀର ପାଇଁ କ୍ଷତିକାରକ ହୋଇଥାଏ । ଅନେକ ସମୟରେ ପାଣିରେ ଅଧିକ ଆଇରନ ବା ଧାତୁ ଅଧିକ ରହିବା ଦ୍ଵାରା କିଡନୀ ଉପରେ ଏହାର ଖରାପ ପ୍ରଭାବ ପକାଇଥାଏ । ଏହାସହ ପ୍ରତିଦିନ ଅଳ୍ପ ସମୟ ବାହାର କରି ବ୍ୟାୟାମ, ଯୋଗ ଆଦି କରିବା ଉଚିତ ।
ଏହା ମଧ୍ୟ ଆମ ଶରୀର ପାଇଁ ଅତ୍ୟନ୍ତ ଜରୁରୀ । ଏହାସହ କିଛି ମେଡ଼ିସିନର ଅତ୍ୟଧିକ ସେବନ ମଧ୍ୟ କିଡନୀ ଖରାପ ହେବାର କାରଣ ହୋଇଥାଏ । ଏହାସହ ସଠିକ ସମୟରେ ସଠିକ ପରିମାଣରେ ନିଦ୍ରା ଯିବା ମଧ୍ୟ ତ୍ୟନ୍ତ ଜରୁରୀ । ଦୈନନ୍ଦିନ ଜୀବନରେ ଏହିସବୁ ନିୟମ ପାଳନ କଲେ ଆପଣଙ୍କ କିଡନୀ ନିଶ୍ଚିତ ଭାବେ ସୁସ୍ଥ ରହିବ ।
