ଅସୁସ୍ଥ ଝିଅକୁ ଗୁଣି କରାଯାଇଥିବା ସନ୍ଦେହ: ଗାଁରେ ଗୁଣିଆ ବୁଲାଇଲା ଖଟ, ପ୍ରଶାସନ ନିରବ – Utkal Mail

ବାଲିଗୁଡ଼ା: ଏବେବି ରୋଗର ଚିକିତ୍ସା ପାଇଁ ତନ୍ତ୍ରମନ୍ତ୍ର ଓ ଗୁଣିଗାରେଡ଼ି ଉପରେ ଭରସା କରାଯାଉଛି। ଯାହାର ଜ୍ବଳନ୍ତ ଉଦାହରଣ ଦେଖିବାକୁ ମିଳିଛି, କନ୍ଧମାଳ ଜିଲ୍ଲା ବାଲିଗୁଡ଼ା ବ୍ଲକ୍ ବାରଖମା ପଞ୍ଚାୟତର ଘାସି ସାହିରେ। ଅସୁସ୍ଥ ଝିଅକୁ ଭଲ କରିବାକୁ ପରିବାରବର୍ଗ ଡାକ୍ତରଙ୍କ ବଦଳରେ ଖଟବିଦ୍ୟା ଓ ଗୁଣିଆ ତନ୍ତ୍ରପାଠର ଆଶ୍ରୟ ନେଇଛନ୍ତି। ଗୁଣିଆ ସତ୍ୟାନନ୍ଦ ବେହେରା ମନ୍ଦାର ଫୁଲ, ଅରୁଆ ଚାଉଳ, ଅଣ୍ଡା ଓ ହଳଦୀ ଲାଗି କରି ଗ୍ରାମରେ ଖଟ ବୁଲାଇଛନ୍ତି।
ସୂଚନା ମୁତାବକ ଏହି ଗ୍ରାମର ଦିଶାରା ନାୟକଙ୍କ ଝିଅ ରଶ୍ମିପ୍ରିୟା ପ୍ରାୟ ୩ ମାସ ହେଲା ଅସୁସ୍ଥ ଅଛନ୍ତି। ବିଭିନ୍ନ ଡାକ୍ତରଖାନାରେ ତାର ଚିକିତ୍ସା ହୋଇଥିଲେ ବି କୌଣସି ସୁଫଳ ମିଳିଲାନି। ଫଳରେ ଝିଅକୁ କେହି ଗୁଣିଗାରିଡ଼ି କରିଥିବା ସନ୍ଦେହ କରି ଆଜି ସକାଳେ ଫିରିଙ୍ଗିଆ ବ୍ଲକ୍ ନୂଆପଦର ଗ୍ରାମରୁ ଗୁଣିଆକୁ ଡାକିଥିଲେ। ଖଟ ବୁଲା ଦେଖିବା ପାଇଁ ପିଲାଠୁ ବୁଢ଼ା ପର୍ଯ୍ୟନ୍ତ ସମସ୍ତେ ଭିଡ଼ ଜମାଇଥିଲେ। ଏଭଳି ଅନ୍ଧବିଶ୍ବାସକୁ ନେଇ ସ୍ଥାନୀୟ ଅଞ୍ଚଳରେ ସବୁଠି ଚର୍ଚ୍ଚା ଚାଲିଥିବା ବେଳେ ପୁଲିସ ଓ ପ୍ରଶାସନର ନିରବତା ସମସ୍ତଙ୍କୁ ଆଶ୍ଚର୍ଯ୍ୟ କରିଛି।