ପାରଳାଖେମୁଣ୍ଡି: ଗଜପତି ଜିଲ୍ଲା କାଶୀନଗର ବ୍ଲକ୍ରେ ନକଲି ସାର ବିକ୍ରି ଅଭିଯୋଗ ହୋଇଥିଲା। ଲୁଣରେ କେମିକାଲ୍ ରଙ୍ଗ ମାରି ନକଲି ପଟାସ୍ ସାର ପ୍ରସ୍ତୁତି କରାଯାଇଥିବା ନେଇ ସ୍ଥାନୀୟ ଚାଷୀ ଅଭିଯୋଗ କରିଥିଲେ। ଖବର ପାଇ ପ୍ରଶାସନ ପକ୍ଷରୁ କାଶୀନଗର ତହସିଲଦାର ଅଶୋକ କୁମାର ପ୍ରଧାନଙ୍କ ନେତୃତ୍ୱରେ ପୁଲିସ ଓ ଜିଲ୍ଲା ମୁଖ୍ୟ କୃଷି ଅଧିକାରୀ ଘଟଣାସ୍ଥଳକୁ ଯାଇ ତଦନ୍ତ କରିଥିଲେ।
ଉପସ୍ଥିତ ଅଧିକାରୀ ସାରର ପରୀକ୍ଷା ବେଳେ ଏହା ନକଲି ବୋଲି ହୃଦ୍ବୋଧ ହୋଇଥିଲା। ପଟାସ୍ ସାର ବଦଳରେ ଏହା ରଙ୍ଗମରା ଲୁଣ ବୋଲି ଆଶଙ୍କା ବଳବତ୍ତର ହୋଇଥିଲା। ଗୋଟାଲୁଣରେ ପଟାସ୍ ଭଳି ରଙ୍ଗ ଦିଆଯାଇ ଏହି ନକଲି ସାରକୁ ଖାଣ୍ଡବା ପଞ୍ଚାୟତ ଆଦର୍ଶନଗରରେ ଚାଷୀଙ୍କୁ ବିକ୍ରି କରାଯାଇଛି। ଏହାସହ କାଶୀନଗର ବ୍ଲକ୍ର ସାରା, ବାଡ଼ିଗାଁ, ବୁଦୁରା ଓ ଖାଣ୍ଡବା ସମେତ ଅନ୍ୟ କିଛି ଗ୍ରାମାଞ୍ଚଳରେ ମଧ୍ୟ ଏହି ନକଲି ପଟାସ୍ ସାର ବିକ୍ରି ହୋଇଥିବା ସୂଚନା ମିଳିଛି।
ଚଢ଼ଉ ସମ୍ପର୍କରେ କାଶୀନଗର ତହସିଲଦାର ଶ୍ରୀ ପ୍ରଧାନଙ୍କୁ ଯୋଗାଯୋଗ କରିବାରୁ କହିଲେ, କାଶୀନଗର ଅଞ୍ଚଳରେ ନକଲି ପଟାସ୍ ବିକ୍ରି ହେଉଥିବା ଅଭିଯୋଗ ପାଇ ଘଟଣାସ୍ଥଳକୁ ଜିଲ୍ଲା ମୁଖ୍ୟ କୃଷି ଅଧିକାରୀଙ୍କ ସହ ଯାଇଥିଲେ। ସେଠାରୁ ସାର ସଂଗ୍ରହ କରିବା ପରେ ସନ୍ଦେହ ବଳବତ୍ତର ହେବାରୁ କୃଷି ଅଧିକାରୀଙ୍କ ସହଯୋଗ କ୍ରମେ ଏହାର ନମୁନା ରାଜ୍ୟ ପରୀକ୍ଷାଗାରକୁ ପଠାଯାଇଛି। ରିପୋର୍ଟ ଆସିବା ପରେ ଏହା ନକଲି କି ଅସଲି ଜଣାପଡ଼ିବ। ନକଲି ହୋଇଥିଲେ ଆଇନ ଅନୁସାରେ କାର୍ଯ୍ୟାନୁଷ୍ଠାନ ହେବ ବୋଲି ତହସିଲଦାର କହିଛନ୍ତି।
