ବାଂଲାଦେଶରେ ହିନ୍ଦୁ ଶିକ୍ଷୟିତ୍ରୀଙ୍କୁ ଟାର୍ଗେଟ: ୫୦ ଶିକ୍ଷୟିତ୍ରୀ ଚାକିରି ଛାଡ଼ିବାକୁ ବାଧ୍ୟ ହେଲେ

ସଂଖ୍ୟାଲଘୁଙ୍କ ଉପରେ ଟାର୍ଗେଟ ଆକ୍ରମଣ ଚାଲିଥିବା ବେଳେ ଅତିକମ୍ରେ ୫୦ ଜଣ ହିନ୍ଦୁ ଶିକ୍ଷୟିତ୍ରୀ ଚାକିରି ଛାଡିବାକୁ ବାଧ୍ୟ ହୋଇଛନ୍ତି। ଚାପରେ ଇସ୍ତଫା ଦେଇଥିବା ଶିକ୍ଷକଙ୍କ ତାଲିକା ମଧ୍ୟ ଉପଲବ୍ଧ ହୋଇଛି। ଦେଶବ୍ୟାପୀ ହିନ୍ଦୁ ଶିକ୍ଷୟିତ୍ରୀମାନଙ୍କୁ ଏଭଳି ଟାର୍ଗେଟ୍ କରାଯିବା ଘୋର ଉଦ୍ବେଗର କାରଣ ପାଲଟିଛି। ବରିଶାଲର ବେକରଗଞ୍ଜ ସରକାରୀ ମହାବିଦ୍ୟାଳୟର ଅଧ୍ୟକ୍ଷା ଶୁକ୍ଳା ରାଣୀ ହଲଦାରଙ୍କୁ ମଧ୍ୟ ନିକଟରେ ଇସ୍ତଫା ଦେବାକୁ ପଡ଼ିଛି। ଅଗଷ୍ଟ ୨୯ ତାରିଖରେ ତାଙ୍କ ଇସ୍ତଫା ଦାବିରେ ଉତ୍ତ୍ୟକ୍ତ ଲୋକଙ୍କ ଭିଡ଼ ତାଙ୍କ ବାସଭବନରେ ପହଞ୍ଚିବା ପରେ ସେ ପ୍ରାଣଭୟରେ ଇସ୍ତଫା ଦେଇଥିଲେ।

ହିନ୍ଦୁ ଶିକ୍ଷକ ଓ ଶିକ୍ଷାନୁଷ୍ଠାନ ପ୍ରଶାସକମାନେ ଇସ୍ତଫା ପତ୍ରରେ ଦସ୍ତଖତ କରିବାକୁ ବାଧ୍ୟ ହେଉଥିବା ବେଳେ ସେମାନଙ୍କ ବାସଭବନକୁ ଟାର୍ଗେଟ୍ କରାଯାଉଥିବାରୁ ଚିନ୍ତା ବଢ଼ିଛି। ବାଂଲାଦେଶ ସଂଖ୍ୟାଲଘୁ ପରିଷଦର ଛାତ୍ର ଶାଖା ପକ୍ଷରୁ ଏଭଳି ଘଟଣାକୁ କଡ଼ା ନିନ୍ଦା କରାଯାଇଛି। ଇସ୍ଲାମିକ ଚରମପନ୍ଥୀଙ୍କ ପ୍ରାଦୁର୍ଭାବ ଦିନକୁ ଦିନ ବଢ଼ି ଚାଲିଥିବାରୁ ଅନ୍ତର୍ଜାତୀୟ ସମୁଦାୟ ଏଥିରେ ତୁରନ୍ତ ହସ୍ତକ୍ଷେପ କରିବାକୁ ଛାତ୍ର ପରିଷଦ ଦାବି କରିଛି।