Controversy, debate
ଜାତୀୟ ରେକର୍ଡଧାରୀ ଅଲିମ୍ପିଆନ୍ ଦୂତି ଚାନ୍ଦଙ୍କ ସଂଘର୍ଷର କାହାଣୀ ଯେତିକି ବଂଧୁର ପଥ ଦେଇ ଗତି କରିଛି ଯେତିକି ସଫଳତାର ଶିଢ଼ି ଚଢ଼ିଛି। ଅନେକ କାରଣ ପାଇଁ ମଧ୍ୟ ଦୂତି ବିବାଦ ଓ ବିତର୍କରେ ରହି ଆସିଛନ୍ତି। ଖେଳ ପଡ଼ିଆ ଭିତରେ ଯେତିକି ଚର୍ଚ୍ଚିତା, ବାହାରେ ମଧ୍ୟ ସେତିକି ବିବାଦୀୟ। ସମ୍ପ୍ରତି ନିଷିଦ୍ଧ ଶକ୍ତିବର୍ଦ୍ଧକ ସେବନ ପାଇଁ ୪ ବର୍ଷ ପାଇଁ ବାସନ୍ଦ ହୋଇଥିବା ଦୂତିଙ୍କ ଖେଳ ଜୀବନର ବିବାଦୀୟ ଘଟଣାକ୍ରମ ଉପରେ ଆସନ୍ତୁ ନଜର ପକାଇନେବା।
୧-ଖେଳ ଜୀବନର ଆଦ୍ୟାବସ୍ଥାରେ କିଛି ଅନାଲୋଚିତ ବିବାଦ କାରଣରୁ ଦୂତିଙ୍କୁ ଭୁବନେଶ୍ବର କ୍ରୀଡ଼ା ଛାତ୍ରାବାସରୁ ବିଦା କରିଦିଆଯାଇଥିଲା। ପରବର୍ତୀ ସମୟରେ ସେ କିନ୍ତୁ ଜାମସେଦପୁର ଚାଲିଯିବା ଏବଂ କିଟ୍-କିସ୍ ପ୍ରତିଷ୍ଠାତା ଡକ୍ଟର ଅଚ୍ୟୁତ ସାମନ୍ତଙ୍କ ପ୍ରୋତ୍ସାହନ ପାଇ ଗୋଟିଏ ପରେ ଗୋଟିଏ ସଫଳତା ଅର୍ଜନ କରି ଚାଲିଥିଲେ।
୨-ଦୂତିଙ୍କ ଖେଳ ଜୀବନର ସବୁଠାରୁ ବଡ଼ ବିବାଦ ଦେଖା ଦେଇଥିଲା ୨୦୧୪ ମସିହାରେ। ଦୂତିଙ୍କ ଶରୀରରେ ଟେଷ୍ଟୋଷ୍ଟେରୋନ୍ ସ୍ତର ଅଧିକ ମାତ୍ରାରେ ଥିବାରୁ ତାଙ୍କୁ ହାଇପରଆଣ୍ଡ୍ରୋଜେନିଜମ୍ ପାଇଁ ୨୦୧୪ ଏସୀୟ କ୍ରୀଡ଼ା ଦଳରୁ ଶେଷ ମୁହୂର୍ତରେ ବାଦ ଆଯାଇଥିଲା। କିଛି ବର୍ଷର ସଂଘର୍ଷ ପରେ ଦୂତିଙ୍କ ପ୍ରସଙ୍ଗ ଲୌସାନ୍ସ୍ଥିତ କାସ୍ (କୋର୍ଟ ଅଫ୍ ଆର୍ବିଟ୍ରେସନ୍ ଫର ସ୍ପୋର୍ଟସ)ରେ ବିଜୟ ଲାଭ କରିଥିଲା। ଟ୍ରାକ୍କୁ ଫେରି ସେ ୨୦୧୬ ରିଓ ଅଲିମ୍ପିକ୍ସରେ ଅଂଶଗ୍ରହଣ ଏବଂ ୨୦୧୮ ଏସୀୟ କ୍ରୀଡ଼ାରେ ଦୁଇଟି ରୌପ୍ୟ (୧୦୦ ଓ ୨୦୦ ମିଟର୍) ଜିତି ଓଡ଼ିଶା କ୍ରୀଡ଼ାରେ ନୂଆ ଇତିହାସ ରଚିଥିଲେ। ୩-୨୦୧୭ ମସିହାରେ ଭୁବନେଶ୍ବରରେ ଅନୁଷ୍ଠିତ ଏସୀୟ ଦୌଡ଼କୁଦ ପ୍ରତିଯୋଗିତା ଅବସରରେ ଦୂତିଙ୍କ ନାମରେ ଅଭିଯୋଗ ଆଣିଥିଲେ ଓଡ଼ିଶାର ଅନ୍ୟତମ ଅଲିମ୍ପିଆନ୍ ରଚିତା ମିସ୍ତ୍ରୀ (ପଣ୍ଡା)। ଦୂତି ଜଣେ ଝିଅ ପିଲା ହୋଇ ନ ଥିବାରୁ ମୁଁ ମୋ ଝିଅକୁ ବି କେବେ ତାଙ୍କ ସହ ଦୌଡ଼ିବାକୁ ଦେବି ନାହିଁ ବୋଲି କହି ରଚିତା ବିବାଦର ସୂତ୍ରପାତ କରିଥିଲେ। ଦୂତି କିନ୍ତୁ ଏହାକୁ କଡ଼ା ଜବାବ ଜରିଆରେ ପ୍ରତିହତ କରି ଦେଇଥିଲେ।
୪-ଦୂତି ଚାନ୍ଦ ପ୍ରଥମ ଭାରତୀୟ ଭାବେ ନିଜକୁ ସମଲିଙ୍ଗୀ କ୍ରୀଡ଼ାବିତ୍ ଭାବେ ଘୋଷଣା କରି ଚହଳ ପକାଇଥିଲେ। ଏହାକୁ ନେଇ ଢେର ବିବାଦ ଓ ବିତର୍କର ଝଡ଼ ସୃଷ୍ଟି ହୋଇଥିଲା। ଦୃଢ଼ମନା ଦୂତି କିନ୍ତୁ ସୁପ୍ରିମକୋର୍ଟଙ୍କ ଐତିହାସିକ ନିଷ୍ପତ୍ତି ବଳରେ ନିଜ ଜୀବନସାଥୀଙ୍କ ସହ ରହିଥିବା ଘୋଷଣା କରିବା ଏବଂ ଜଣେ ଝିଅକୁ ବିବାହ କରିବେ ବୋଲି ଖୋଲା ଘୋଷଣା କରି ଚର୍ଚ୍ଚିତ ଚେହେରା ପାଲଟିଯାଇଥିଲେ। ୫-ଦୂତି ଚାନ୍ଦଙ୍କ ପରିବାର ବିବାଦ ଓ କଳି ମଧ୍ୟ ଢେର ଚର୍ଚ୍ଚାରେ ରହିଥାଏ ସାମାଜିକ ଗଣମାଧ୍ୟମରେ। ତାଙ୍କ ପ୍ରଥମ ଗୁରୁ ତଥା ବଡ଼ ଭଉଣୀ ସରସ୍ବତୀ ଚାନ୍ଦଙ୍କ ସହ ମତଭେଦ କାରଣରୁ ସେ ଘରୁ ବିତାଡ଼ିତ ହେବା ଭଳି ଧମକ ଦେଉଥିଲେ ମଧ୍ୟ ଦୂତି ଗାଁ ଲୋକ ଓ ପରିବାରଙ୍କୁ ନିଜ ପକ୍ଷକୁ ଆଣି ଏହି ପ୍ରସଙ୍ଗରେ ବିଜୟ ହାସଲ କରିଥିଲେ।
