ପ୍ରଭୁ ଶାଳଗ୍ରାମ କିଏ? ଜାଣନ୍ତୁ କାହିଁକି ପ୍ରଭୁ ଶାଳଗ୍ରାମଙ୍କ ସହ ମାତା ତୁଳସୀଙ୍କ ବିବାହ କରାଯାଏ

ପ୍ରତିବର୍ଷ କାର୍ତ୍ତିକ ମାସର ଶେଷ ପାଞ୍ଚ ଦିନରେ ପ୍ରଭୁ ଶାଳଗ୍ରାମଙ୍କ ବିବାହ ତୁଳସୀ ମାତାଙ୍କ ସହିତ ହୋଇଥାଏ । କୁହାଯାଏ ଯେ ଏହି ବିବାହ କରିବା ଦ୍ୱାରା ଜୀବନରେ ସୁଖ ଏବଂ ସମୃଦ୍ଧି ଆସିଥାଏ । ଭଗବାନ ବିଷ୍ଣୁ ଏବଂ ଦେବୀ ଲକ୍ଷ୍ମୀଙ୍କ ବିଶେଷ ଆଶୀର୍ବାଦ ମଧ୍ୟ ମିଳିଥାଏ । ଚଳିତ ବର୍ଷ, ତୁଳସୀ ବିବାହ ନଭେମ୍ବର ୧ ରୁ ନଭେମ୍ବର ୫ ପର୍ଯ୍ୟନ୍ତ ଅନୁଷ୍ଠିତ ହେବ । ଅଧିକାଂଶ ଲୋକ ନଭେମ୍ବର ୨ରେ ତୁଳସୀ ବିବାହ ପାଳନ କରିବେ, କାରଣ ଏହି ଦିନ କାର୍ତ୍ତିକ ଶୁକ୍ଳ ପକ୍ଷର ଦ୍ୱାଦଶୀ ଯାହାକୁ ତୁଳସୀ ବିବାହ ପାଇଁ ସବୁଠାରୁ ଶୁଭ ତିଥି ଭାବରେ ବିବେଚନା କରାଯାଏ । ତେବେ ଆସନ୍ତୁ ଜାଣିବା ପ୍ରଭୁ ଶାଳଗ୍ରାମ କିଏ ଏବଂ ପ୍ରତିବର୍ଷ କାହିଁକି ପ୍ରଭୁ ଶାଳଗ୍ରାମ ମତ ତୁଳସୀଙ୍କ ସହିତ ବିବାହ କରନ୍ତି ।

ପ୍ରଭୁ ଶାଳଗ୍ରାମ କିଏ?

ଭଗବାନ ଶାଳଗ୍ରାମକୁ ଭଗବାନ ବିଷ୍ଣୁଙ୍କର ଏକ ରୂପ ଭାବରେ ବିବେଚନା କରାଯାଏ । ଏହି ଶିଳା ପ୍ରାୟତଃ ନେପାଳର ଗଣ୍ଡକୀ ନଦୀର ତଳ ଭାଗରେ ମିଳିଥାଏ । ଏହା କୌଣସି ସାଧାରଣ ପଥର ନୁହେଁ ବରଂ ଏହାକୁ ଭଗବାନ ବିଷ୍ଣୁଙ୍କ ବାସସ୍ଥାନ ବୋଲି ବିବେଚନା କରାଯାଏ । ଏଥିରେ ଶଙ୍ଖ, ଚକ୍ର, ଗଦା ଏବଂ ପଦ୍ମ ଭଳି ପ୍ରତୀକ ଅଛି । ଏହା ସ୍ୱୟଂପ୍ରକାଶିତ ହୋଇଥିବାରୁ ଏଥିରେ ପ୍ରାଣ ପ୍ରତିଷ୍ଠା କରିବାର କୌଣସି ଆବଶ୍ୟକତା ନାହିଁ । ଏହାର ଅର୍ଥ ହେଉଛି ଭକ୍ତମାନେ ଏହାକୁ ଘରକୁ ଆଣି ସିଧାସଳଖ ପୂଜା କରିପାରିବେ ।

ପ୍ରଭୁ ଶାଳଗ୍ରାମଙ୍କ କାହାଣୀ:

ପ୍ରାଚୀନ କାହାଣୀ ଅନୁଯାୟୀ, ବୃନ୍ଦା ନାମକ ଜଣେ ମହିଳା ଥିଲେ ଯିଏ ରାକ୍ଷସ ରାଜା ଜଳନ୍ଧରଙ୍କୁ ବିବାହ କରିଥିଲେ । ଜଳନ୍ଧର ତାଙ୍କ ପତ୍ନୀ ବୃନ୍ଦାଙ୍କ ପତିବ୍ରତା ଭକ୍ତି ଦ୍ୱାରା ଶକ୍ତିଶାଳୀ ହୋଇଥିଲେ । ଯାହାପରେ ତାଙ୍କୁ ପରାସ୍ତ କରିବା ପ୍ରାୟ ଅସମ୍ଭବ ହୋଇଯାଇଥିଲା । ସେ ସବୁଠି ବିନାଶ ଘଟାଇଥିଲା ଏବଂ ସମସ୍ତ ଦେବଦେବୀଙ୍କୁ ଅତ୍ୟନ୍ତ କଷ୍ଟ ଦେଇଥିଲା । ତା’ପରେ ଭଗବାନ ବିଷ୍ଣୁ ଜଳନ୍ଧରଙ୍କୁ ବଧ କରିବା ପାଇଁ ଏକ ଯୋଜନା ପ୍ରସ୍ତୁତ କରିଥିଲେ । ସେ ଜାଣିଥିଲେ ଯେ ଜଳନ୍ଧରଙ୍କୁ କେବଳ ସେତେବେଳେ ବଧ କରାଯାଇପାରିବ ଯଦି ତାଙ୍କ ପତ୍ନୀଙ୍କ ସତୀତ୍ୱ ଭଙ୍ଗ ହୁଏ ।

ଯାହାପରେ ଭଗବାନ ବିଷ୍ଣୁ ଜଳନ୍ଧର ରୂପ ଧାରଣ କରି ଦେବୀ ବୃନ୍ଦାଙ୍କ ନିକଟକୁ ଗଲେ । ଆଉ ଠିକ ଜଳନ୍ଧର ଭଳି ହିଁ ବ୍ୟବହାର କଲେ, ଯାହା ଫଳରେ ଦେବୀ ବୃନ୍ଦାଙ୍କର ସତୀତ୍ୱ ନଷ୍ଟ ହୋଇଯାଇଥିଲା ଏବଂ ଜଳନ୍ଧରର ମୃତ୍ୟୁ ହେଲା । ଯେତେବେଳେ ବୃନ୍ଦା ଏହି ପ୍ରତାରଣା ଜାଣିପାରିଲେ, ସେ କ୍ରୋଧିତ ହୋଇ ଭଗବାନ ବିଷ୍ଣୁଙ୍କୁ ପଥରରେ ପରିଣତ ହେବାକୁ ଅଭିଶାପ ଦେଲେ । କୁହାଯାଏ ଯେ ଏହି ପଥର ଶାଳଗ୍ରାମ ନାମରେ ପରିଚିତ ହେଲା । ଭଗବାନ ବିଷ୍ଣୁ ପଥରରେ ପରିଣତ ହେବା ଯୋଗୁଁ ସମଗ୍ର ବ୍ରହ୍ମାଣ୍ଡରେ ଅସନ୍ତୁଳନର ପରିସ୍ଥିତି ସୃଷ୍ଟି ହୋଇଥିଲା ।

ଏହା ଦେଖି ସମସ୍ତ ଦେବାଦେବୀମାନେ ଭଗବାନ ବିଷ୍ଣୁଙ୍କୁ ଅଭିଶାପରୁ ମୁକ୍ତ କରିବା ପାଇଁ ଦେବୀ ବୃନ୍ଦାଙ୍କୁ ପ୍ରାର୍ଥନା କରିବାକୁ ଲାଗିଲେ । ତା’ପରେ ବୃନ୍ଦା ଭଗବାନ ବିଷ୍ଣୁଙ୍କୁ ଅଭିଶାପରୁ ମୁକ୍ତ କଲେ ଏବଂ ନିଜ ଶରୀର ତ୍ୟାଗ କଲେ । କୁହାଯାଏ ଯେ ବୃନ୍ଦା ଯେଉଁ ସ୍ଥାନରେ ପାଉଁଶ ହୋଇଯାଇଥିଲେ ସେହି ସ୍ଥାନରେ ଏକ ତୁଳସୀ ଗଛ ଉଠିଥିଲା । ତାଙ୍କ ସତୀତ୍ଵ ଏବଂ ପତିବ୍ରତା ଦେଖି ଭଗବାନ ବିଷ୍ଣୁ କହିଲେ ଯେ ଆଜିଠାରୁ ତୁମେ ମୋ ପରି ପୂଜ୍ୟ । ତୁମ ବିନା ମୋର ପୂଜା ଅସମ୍ପୂର୍ଣ ରହିବ ଏବଂ ଯିଏ ମୋ ରୂପ ଶାଳଗ୍ରାମକୁ ତୁମ ସହିତ ବିବାହ କରିବ ତାଙ୍କ ଜୀବନରେ ସର୍ବଦା ସୁଖ ଏବଂ ସମୃଦ୍ଧି ରହିବ । କୁହାଯାଏ ଯେ ଏହି କାରଣରୁ ପ୍ରତିବର୍ଷ ଶାଳଗ୍ରାମ ଏବଂ ତୁଳସୀ ମାତାଙ୍କର ବିବାହ କରାଯାଏ ।