ରାହୁଲ ଗାନ୍ଧୀଙ୍କ ନାଗରିକତା ପ୍ରସଙ୍ଗ: ଜବାବ ଦେବାକୁ କେନ୍ଦ୍ରକୁ ୪ ସପ୍ତାହ ଦେଲେ ହାଇକୋର୍ଟ
ପ୍ରୟାଗରାଜ: କଂଗ୍ରେସ ସାଂସଦ ତଥା ବିରୋଧୀ ଦଳ ନେତା ରାହୁଲ ଗାନ୍ଧୀଙ୍କ ନାଗରିକତା ସ୍ଥିତି ଉପରେ ୪ ସପ୍ତାହ ମଧ୍ୟରେ ନିଷ୍ପତ୍ତି ନେବାକୁ ଆହ୍ଲାବାଦ ହାଇକୋର୍ଟ ସୋମବାର କେନ୍ଦ୍ର ସରକାରଙ୍କୁ ନିର୍ଦ୍ଦେଶ ଦେଇଛନ୍ତି। ଲକ୍ଷ୍ନୌ ଖଣ୍ଡପୀଠ ପରବର୍ତ୍ତୀ ଶୁଣାଣି ଏପ୍ରିଲ ୨୧ରେ କରିବାକୁ ଧାର୍ଯ୍ୟ କରିଛନ୍ତି। ସେହି ସମୟ ସୁଦ୍ଧା କେନ୍ଦ୍ରକୁ ଷ୍ଟାଟସ୍ ରିପୋର୍ଟ ଦାଖଲ କରିବାକୁ ପଡ଼ିବ। ରିପୋର୍ଟ ଦାଖଲ ପାଇଁ ୮ ସପ୍ତାହ ସମୟ ଦେବାକୁ କେନ୍ଦ୍ରର ଅନୁରୋଧକୁ କୋର୍ଟ ଖାରଜ କରିଦେଇଥିଲେ। ବିଜେପି ନେତା ସୁବ୍ରମଣ୍ୟମ୍ ସ୍ୱାମୀ ଓ କର୍ଣ୍ଣାଟକର ଜଣେ ବ୍ୟକ୍ତି ଏସ୍ ବିଘ୍ନେଶ ଶିଶିରଙ୍କ ଦ୍ୱାରା ଦାୟର ପିଟିସନରୁ ଏହି ମାମଲା ସାମ୍ନାକୁ ଆସିଛି, ଯେଉଁମାନେ ରାହୁଲ ଗାନ୍ଧୀଙ୍କ ଜାତୀୟତା ଉପରେ ପ୍ରଶ୍ନ ଉଠାଇଛନ୍ତି।
ଏପ୍ରିଲ ୨୧ରେ ଲକ୍ଷ୍ନୌ ଖଣ୍ଡପୀଠରେ ପରବର୍ତ୍ତୀ ଶୁଣାଣି
କର୍ଣ୍ଣାଟକର ବିଜେପି କର୍ମୀ ଶିଶିର ରାହୁଲ ଗାନ୍ଧୀଙ୍କ କଥିତ ବ୍ରିଟିସ ନାଗରିକତା ସମ୍ପର୍କରେ ନୂତନ ପ୍ରମାଣ ଥିବା ଦାବି କରି ଏକ ଜନସ୍ୱାର୍ଥ ମାମଲା (ପିଆଇଏଲ୍) ଦାଖଲ କରିଥିଲେ। ବ୍ରିଟିସ ସରକାର ବ୍ରିଟେନର ଜେନେରାଲ ଡାଟା ପ୍ରୋଟେକ୍ସନ ରେଗୁଲେସନ୍ ଅଧୀନରେ ବ୍ୟକ୍ତିଗତ ତଥ୍ୟ ପ୍ରକାଶ କରିବାକୁ ମନା କରିଦେଇଥିଲେ ଏବଂ କହିଥିଲେ ଯେ କେବଳ ଗାନ୍ଧୀଙ୍କ ସ୍ୱାକ୍ଷରିତ ପତ୍ର ଦ୍ବାରା ଅନୁରୋଧ କରାଗଲେ ହିଁ ଏଭଳି ସୂଚନା ଜାରି କରାଯାଇପାରିବ। ଏହି ମାମଲାର ତଦନ୍ତ ପାଇଁ ସିବିଆଇକୁ ନିର୍ଦ୍ଦେଶ ଦେବାକୁ ଆବେଦନକାରୀ ଅଦାଲତଙ୍କୁ ଅନୁରୋଧ କରିଛନ୍ତି। ଏହା ପୂର୍ବରୁ ସେ ରାହୁଲଙ୍କ ଭାରତୀୟ ନାଗରିକତା ରଦ୍ଦ ପାଇଁ ଗୃହ ମନ୍ତ୍ରଣାଳୟକୁ ଦୁଇଟି ଆବେଦନ ପଠାଇଥିଲେ ମଧ୍ୟ କୌଣସି ପ୍ରତିକ୍ରିୟା ନ ମିଳିବାରୁ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ। ତେଣେ ଚଳିତ ମାସ ପ୍ରାରମ୍ଭରେ ସୁବ୍ରମଣ୍ୟମ୍ ସ୍ୱାମୀ ଦିଲ୍ଲୀ ହାଇକୋର୍ଟରେ ମଧ୍ୟ ଗାନ୍ଧୀଙ୍କ ନାଗରିକତା ରଦ୍ଦ ପାଇଁ ଏକ ପିଟିସନ ଦାଖଲ କରିଥିଲେ। ବ୍ରିଟେନର ଏକ କମ୍ପାନି ସହ ଜଡ଼ିତ ଦସ୍ତାବିଜ୍ରେ ରାହୁଲ ନିଜକୁ ବ୍ରିଟିସ ନାଗରିକ ବୋଲି ଘୋଷଣା କରିଥିଲେ ବୋଲି ସ୍ୱାମୀ ଦୀର୍ଘ ଦିନ ଧରି ଅଭିଯୋଗ କରି ଆସୁଛନ୍ତି।
