ଭୁବନେଶ୍ୱର: ମୁହଁ ଲୁଚାଇ ହାତ ଧରାଧରା ହୋଇ ଠିଆ ହୋଇଛନ୍ତି ଦୁଇ ମହିଳା । ଏମାନେ ସମ୍ପର୍କରେ ମାଆ ଝିଅ । ଏମାନେ ଏମିତି କାରନାମା କରିଛନ୍ତି ଯେ ମୁହଁ ଲୁଚାଇବା ଛଡା ଏମାନଙ୍କ ପାଖରେ ଆଉ କିଛି ବାଟ ନାହିଁ । କମ୍ ଦିନରେ ଅଧିକ ସୁଧର ଲୋଭ ଦେଖାଇବା ନାଁରେ କରୁଥିଲେ ହରିଲୁଟ୍ । ସାଧାରଣ ଲୋକଙ୍କୁ ଭୂଆଁ ବୁଲାଉଥିଲେ । ଅଧିକ ସୁଧ ଦେବା ପ୍ରତିଶ୍ରୁତି ଦେଇ କରୁଥିଲେ ଠକେଇ । ନୀରିହ ଲୋକଙ୍କୁ ଚୂନା ଲଗାଇ ମାଆ ଓ ଝିଅ ସାଜିଥିଲେ ଚତୁରୀ । କିନ୍ତୁ ମହଙ୍ଗା ପଡ଼ିଲା ଚୂନ ଲଗାଇବା । ଏବେ ଗିରଫ ହେଲେ ମାଆ ଓ ଝିଅ ।
କୋଲକତାରୁ ମାଆ ଝିଅଙ୍କୁ ଗିରଫ କରିଛି ଇଓଡବ୍ଲ୍ୟୁ । ହଁ ଆଜ୍ଞା ୧୨୩ କୋଟି ଟଙ୍କାର ହରିତ କୃଷି ନିଧି କମ୍ପାନୀ ଠକେଇ ମାମଲାରେ ଆଉ ଦୁଇ ଜଣ ଗିରଫ । କୋଲକାତାରୁ ଦୀପିକା ଭଞ୍ଜ ଓ ତାଙ୍କ ଝିଅ ତନ୍ଦ୍ରା ଭଞ୍ଜଙ୍କୁ ଗିରଫ କରାଯାଇଛି । ସଂସ୍ଥାର ମୁଖ୍ୟ ତୁଷାର ଭଞ୍ଜଙ୍କ ପରେ ତାଙ୍କ ସ୍ତ୍ରୀ ଓ ଝିଅ ଧରାପଡ଼ିଛନ୍ତି । କୋଲକାତାର ନିଧି ଗ୍ରୁପର ବଡ଼ ଖୁଲାସା କରିଛି କ୍ରାଇମବ୍ରାଞ୍ଚ । ନିଧି କମ୍ପାନୀ ନାଁରେ ୫ଟି ରାଜ୍ୟର ଲୋକଙ୍କୁ ଠକିଥିବା ଅଭିଯୋଗ ହୋଇଛି । ଠକ ସଂସ୍ଥାର କମ୍ପାନୀ ଆକାଉଣ୍ଟରୁ ତୁଷାରଙ୍କ ସ୍ତ୍ରୀ ଦୀପିକା ୪୧ ଲକ୍ଷ ଓ ଝିଅ ତନ୍ଦ୍ରା ନେଇଥିଲେ ୪୩ ଲକ୍ଷ ।
ହରିତ କୃଷି ନିଧି ଲିମିଟେଡ ROC ରେଜିଷ୍ଟେସନ ନ ଥିବା କମ୍ପାନୀ । ଓଡ଼ିଶା, ପଶ୍ଚିମବଙ୍ଗ, ଛତିଶଗଡ଼, ଆସାମ ,ତ୍ରିପୁରା , ମହାରାଷ୍ଟ୍ର ଏପରିକି ବାଂଲାଦେଶରେ ବି ଲୋକଙ୍କୁ ଚୂନ ଲଗାଇଛି ଏହି ସଂସ୍ଥା । ଓଡ଼ିଶାରୁ ୧୦ ହଜାରରୁ ଅଧିକ ଲୋକ ଠକେଇର ଶିକାର ହୋଇଛନ୍ତି । ଓଡ଼ିଶାରୁ ପ୍ରାୟ ୫୦ କୋଟି ଟଙ୍କାର ଠକେଇ ହୋଇଛି । କମ୍ ଦିନରେ ଅଧିକ ସୁଧର ଲୋଭ ଦେଖାଇ ଲୋକଙ୍କୁ ଭକୁଆ ବନାଉ ଥିଲା ହରିତ କୃଷି ନିଧି କମ୍ପାନୀ । ୧୧ ପ୍ରତିଶତ ଲାଭ ଦେବ କହି ଠକୁଥିଲା ।
ତୁଷାର ଭଞ୍ଜଙ୍କ ସ୍ତ୍ରୀ ଦୀପିକା ସଂସ୍ଥାର ଡାଇରେକ୍ଟର ଓ ଝିଅ ତନ୍ଦ୍ରା ଜଏଣ୍ଟ ସେକ୍ଟ୍ରେଟାରୀ ଥିଲେ । ପଶ୍ଚିମବଙ୍ଗ ନ୍ୟୁ ଆଲିପୁରରେ ଆଲିସାନ ଫ୍ଲାଟ ଓ ପଶ୍ଚିମ ମେଦିନୀପୁରରେ ଥିବା ସେମାନଙ୍କ ଦାମୀ ପ୍ଲଟକୁ ଆଟାଚ କରିବ କ୍ରାଇମବ୍ରାଞ୍ଚ । ନିଧି କମ୍ପାନୀ ମୁଖ୍ୟ ତୁଷାର ଭଞ୍ଜ ଗତବର୍ଷ ଗିରଫ ହୋଇଥିଲେ ।
ତେବେ ଯାହା ସୂଚନା ମିଳିଛି କି, ୨୦୨୩ ମସିହାରୁ ଏହି କୋଲକାତା ସ୍ଥିତ କମ୍ପାନୀ କଟକରେ ରେଜିଷ୍ଟ୍ରେସନ ପରେ ଆରମ୍ଭ କରିଥିଲା ଚିଟଫଣ୍ଡ ଭଳି ଏକ ସଂସ୍ଥା । ମାସିକ ୧୧ ପ୍ରତିଶତ ସୁଧ ବା ୪ ଲକ୍ଷ ବିନିଯୋଗ କଲେ ମାସିକ ୪ ହଜାରରୁ ଅଧିକ ସୁଧ ଦେବାର ମିଳୁଥିଲା ପ୍ରଲୋଭନ । ଲିଫଲେଟ ଓ ବ୍ରାଉଚର ଧରି ଗରାଖ ଯୋଗାଡରେ ବୁଲୁଥିଲେ ଏଜେଣ୍ଟ । ଭୁବନେଶ୍ୱରରେ ବି ଖୋଲିଥିଲେ ଅଫିସ୍ । ଲୋକଙ୍କୁ ପ୍ରଭାବିତ କରିବା ପାଇଁ ଦାମୀ ହୋଟେଲରେ କରୁଥିଲେ ମିଟିଂ । କିନ୍ତୁ ପରେ ଠକେଇ ସମ୍ପର୍କରେ ଜାଣିବା ପରେ ମନମୋହନ ଦୋରା ନାମକ ବ୍ୟକ୍ତି EOW ର ଦ୍ୱାରସ୍ଥ ହେବା ପରେ ଠକଙ୍କୁ ଗିରଫ କରାଯାଇଛି ।
ତେବେ ମାଆ ଝିଅ ଏପରି ଚାଲ୍ ଚଲେଇଥିଲେ କେହି ତାଙ୍କ ଟେର୍ ବି ପାଇନଥିଲେ । ଆଖିରେ ଆଙ୍ଗୁଠି ଗେଞ୍ଜି ଲୁଟି ଚାଲିଥିଲେ କୋଟି କୋଟି ଟଙ୍କା । ମାତ୍ର କଥାରେ ଅଛି ଚୋର ଘର ସବୁବେଳେ ଅନ୍ଧାର ନଥାଏ । କେବେ ନା କେବେ ତା କଳା କାରନାମା ସାମ୍ନାକୁ ଆସିଥାଏ । ଲୋକଙ୍କୁ ଚୂନ ଲଗାଇବା ମହଙ୍ଗା ପଡିଲା । ଶେଷରେ ପୋଲିସ୍ ତଦନ୍ତ ପରେ କରିତ୍ କର୍ମା ମାଆ ଝିଅଙ୍କ ସମ୍ପର୍କରେ ଖୁଲାସା ହୋଇଥିଲା । ଏବେ ଚାରି କାନ୍ଥ ଭିତରେ ବିତିବ ଜୀବନ ।
