ନୂଆଦିଲ୍ଲୀ: ଏମ୍ସ ଦ୍ୱାରା କରାଯାଇଥିବା ଏକ ନୂତନ ଅଧ୍ୟୟନ ଏକ ଆଶ୍ଚର୍ଯ୍ୟଜନକ ତଥ୍ୟ ପ୍ରକାଶ କରିଛି। କମ ବୟସ୍କଙ୍କର ହଠାତ ମୃତ୍ୟୁର ହେବା ଘଟଣା ଚିନ୍ତାଜନକ ହୋଇଛି । ଗତ ବର୍ଷ ହଠାତ୍ ମୃତ୍ୟୁବରଣ କରିଥିବା ଲୋକଙ୍କ ମଧ୍ୟରୁ ଅଧାରୁ ଅଧିକଙ୍କ ବୟସ ୪୫ ବର୍ଷରୁ କମ୍ ଥିଲା। ଏହି ଲୋକମାନଙ୍କ ମଧ୍ୟରୁ ଅନେକ ସମ୍ପୂର୍ଣ୍ଣ ସୁସ୍ଥ ଦେଖାଯାଉଥିଲେ ଏବଂ ଘରେ କିମ୍ବା କେଉଠାକୁ ଯିବା ବେଳେ ହଠାତ୍ ମୃତ୍ୟୁବରଣ କରିଥିଲେ। ଇଣ୍ଡିଆନ୍ ଜର୍ଣ୍ଣାଲ୍ ଅଫ୍ ମେଡିକାଲ୍ ରିସର୍ଚ୍ଚରେ ପ୍ରକାଶିତ ଏହି ଅଧ୍ୟୟନ, ଇଣ୍ଡିଆନ୍ କାଉନସିଲ୍ ଅଫ୍ ମେଡିକାଲ୍ ରିସର୍ଚ୍ଚ (ICMR) ଦ୍ୱାରା ଏକ ବୃହତ୍ତର ପ୍ରକଳ୍ପର ଅଂଶ।
ଏହି କ୍ରସ୍-ସେକ୍ସନାଲ୍ ଅଧ୍ୟୟନ ମେ ୨୦୨୩ ରୁ ଏପ୍ରିଲ ୨୦୨୪ ପର୍ଯ୍ୟନ୍ତ ଦିଲ୍ଲୀ ଏମ୍ସ ର ପାଥୋଲୋଜି ଏବଂ ଫୋରେନସିକ୍ ମେଡିସିନ୍ ବିଭାଗରେ କରାଯାଇଥିଲା। ଯେଉଁଠାରେ ୨,୨୧୪ ମୃତଦେହକୁ ପରୀକ୍ଷା କରାଯାଇଥିଲା। ଏଥିମଧ୍ୟରୁ ୧୮୦ଟି ମାମଲା (୮.୧%) ହଠାତ୍ ମୃତ୍ୟୁ ପାଇଁ ମାନଦଣ୍ଡ ପୂରଣ କରିଥିଲା। ଏହି ୧୮୦ଟି ମାମଲା ମଧ୍ୟରୁ ୧୦୩ଟି (୫୭.୨%) ଯୁବକ ଥିଲେ, ଯାହାଙ୍କ ବୟସ ୧୮ ରୁ ୪୫ ବର୍ଷ ମଧ୍ୟରେ ଥିଲା। ଏହି ଯୁବକମାନଙ୍କ ହାରାହାରି ବୟସ ୩୩.୬ ବର୍ଷ ଥିଲା ଏବଂ ଅଧିକାଂଶ ପୁରୁଷ ଥିଲେ।
ହୃଦରୋଗ ହେଉଛି ସବୁଠାରୁ ସାଧାରଣ କାରଣ
ହୃଦରୋଗ ହଠାତ୍ ମୃତ୍ୟୁର ପ୍ରମୁଖ କାରଣ ଭାବରେ ଜଣାପଡିଥିଲା। ଏମ୍ସର ର ରିପୋର୍ଟ ଅନୁସାରେ ଯୁବକମାନଙ୍କ ମଧ୍ୟରେ ୪୨.୬% ହଠାତ୍ ମୃତ୍ୟୁ ହୃଦରୋଗ ସହିତ ଜଡିତ। ଏହି ଲୋକଙ୍କ ମଧ୍ୟରୁ ଅଧିକାଂଶଙ୍କ କରୋନାରୀ ଧମନୀରେ ଗମ୍ଭୀର ଅବରୋଧ ଥିଲା ଯାହା ପୂର୍ବରୁ କେବେ ଚିହ୍ନଟ ହୋଇନଥିଲା। ଏହା ସୂଚାଇ ଦିଏ ଯେ ଏକ ସମ୍ଭାବ୍ୟ ଘାତକ ହୃଦରୋଗ ନୀରବରେ ବିକଶିତ ହେଉଥିଲା।
