କ୍ବେଟା: ପାକିସ୍ତାନର କ୍ୱେଟାରୁ ତାଫ୍ତାନ ଅଭିମୁଖେ ଯାଉଥିବା ସେନାର ଏକ ଗାଡ଼ି ଉପରେ ଆଜି ବଲୋଚ୍ ବିଦ୍ରୋହୀମାନେ ପ୍ରଚଣ୍ଡ ଆକ୍ରମଣ କରିଛନ୍ତି। ବିଦ୍ରୋହୀଙ୍କ ଆତ୍ମଘାତୀ ଆକ୍ରମଣରେ ୭ ଜଣ ପାକ୍ ସୈନିକ ନିହତ ହୋଇଥିବା ବେଳେ ୨୧ ଜଣ ଆହତ ହୋଇଛନ୍ତି। ତେବେ ବଲୋଚ୍ ଲିବରେସନ୍ ଆର୍ମି (ବିଏଲ୍ଏ) ଦାବି କରିଛି ଯେ ଏହି ଆକ୍ରମଣରେ ୯୦ ଜଣ ପାକିସ୍ତାନୀ ସୈନିକଙ୍କ ମୃତ୍ୟୁ ଘଟିଛି।
କ୍ୱେଟାଠାରୁ ୧୫୦ କିଲୋମିଟର ଦୂର ନୋସ୍କିରେ ଏହି ଆକ୍ରମଣ ହୋଇଥିଲା। ଆକ୍ରମଣ ପରେ ସେନା ପକ୍ଷରୁ ଉକ୍ତ ଅଞ୍ଚଳରେ ହେଲିକପ୍ଟର ଓ ଡ୍ରୋନ୍ ମୁତୟନ କରାଯାଇଛି। ସେନାର ୭ଟି ବସ୍ ଯାଉଥିବା ବେଳେ ପ୍ରଥମ ବସ୍ ବିସ୍ଫୋରଣରେ ଛାର୍ଖାର୍ ହୋଇଯାଇଥିଲା। ବିଏଲ୍ଏ ଏକ ବିବୃତିରେ କହିଛି ଯେ ବଲୁଚି ମୁକ୍ତି ସେନାର ଆତ୍ମଘାତୀ ବାହିନୀ ମାଜିଦ ବ୍ରିଗେଡ୍ ନୋଶକି ରାଜପଥରେ ପାକିସ୍ତାନୀ ସେନା ଉପରେ ଆତ୍ମଘାତୀ ଆକ୍ରମଣ କରିଥିଲା। ଆକ୍ରମଣରେ ଗୋଟିଏ ବସ୍ ଉଡ଼ିଯିବା ପରେ ବିଏଲ୍ଏର ଫତେହ ସ୍କ୍ୱାଡ୍ ଦ୍ବିତୀୟ ସେନା ବସ୍କୁ ସମ୍ପୂର୍ଣ୍ଣ ଘେରିଯାଇ ଗୁଳିବର୍ଷା କରିଥିଲା ଏବଂ ଉଭୟ ଆକ୍ରମଣରେ ମୃତକଙ୍କ ସଂଖ୍ୟା ୯୦କୁ ବୃଦ୍ଧି ପାଇଛି ବୋଲି ବିଏଲ୍ଏ ଦାବି କରିଛି। ଏହି ଆକ୍ରମଣ ପରେ ପାକ୍ ସେନାର ଅପରେସନ୍ ଜୋର୍ଦାର ହୋଇଥିବା ବେଳେ ସଂପୃକ୍ତ ଅଞ୍ଚଳରେ ଜରୁରୀକାଳୀନ ପରିସ୍ଥିତି ଜାରି କରାଯାଇଛି। ଅନେକ ଆହତଙ୍କ ଅବସ୍ଥା ସଙ୍କଟାପନ୍ନ ଥିବାରୁ ମୃତକଙ୍କ ସଂଖ୍ୟା ବୃଦ୍ଧି ପାଇବ ବୋଲି ସ୍ଥାନୀୟ ପ୍ରଶାସନ କହିଛି। ବଲୁଚିସ୍ତାନ ମୁଖ୍ୟମନ୍ତ୍ରୀ ସରଫ୍ରାଜ ବୁଗଟି ଏହି ଆକ୍ରମଣକୁ ନିନ୍ଦା କରିବା ସହ ମୃତକଙ୍କ ପାଇଁ ଦୁଃଖ ପ୍ରକାଶ କରିଛନ୍ତି। ଏହି ଭୀରୁତାପୂର୍ଣ୍ଣ ଆକ୍ରମଣ ଆମ ମନୋବଳକୁ ହ୍ରାସ କରିପାରିବ ନାହିଁ ବୋଲି ସେ କହିଛନ୍ତି। ବଲୁଚିସ୍ତାନରେ ଆତଙ୍କବାଦୀଙ୍କ ପାଇଁ ସ୍ଥାନ ନାହିଁ। ଯେ କୌଣସି ମୂଲ୍ୟରେ ଶାନ୍ତି ପ୍ରତିଷ୍ଠା କରାଯିବ ବୋଲି ସରଫ୍ରାଜ କହିଛନ୍ତି।
