ସର୍ଜିକାଲ ଷ୍ଟ୍ରାଇକ୍ ନେଇ ପ୍ରଶ୍ନ ଉଠାଇଲେ ଚନ୍ନି: ସିଡବ୍ଲ୍ୟୁସିକୁ ପିଡବ୍ଲ୍ୟୁସି କହିଲେ ସମ୍ବିତ
ନୂଆଦିଲ୍ଲୀ: କଂଗ୍ରେସ ସାଂସଦ ତଥା ପଞ୍ଜାବର ପୂର୍ବତନ ମୁଖ୍ୟମନ୍ତ୍ରୀ ଚରଣଜିତ ସିଂହ ଚନ୍ନି ପୁଲୱାମା ଆତଙ୍କବାଦୀ ଆକ୍ରମଣ ପରେ ୨୦୧୯ରେ ଭାରତୀୟ ସଶସ୍ତ୍ର ବାହିନୀର ସର୍ଜିକାଲ ଷ୍ଟ୍ରାଇକ୍ ଉପରେ ପ୍ରଶ୍ନ ଉଠାଇ ରାଜନୈତିକ ବିବାଦ ସୃଷ୍ଟି କରିଛନ୍ତି। ତାଙ୍କର ଏହି ମନ୍ତବ୍ୟକୁ ବିଜେପି ନେତାମାନେ ତୀବ୍ର ସମାଲୋଚନା କରିବା ସହ ସେ ସଶସ୍ତ୍ର ବାହିନୀକୁ ନିରୁତ୍ସାହିତ କରୁଥିବା ଅଭିଯୋଗ କରିଛନ୍ତି। ବିଜେପି ସାଂସଦ ସମ୍ବିତ ପାତ୍ର କହିଛନ୍ତି କଂଗ୍ରେସ କାର୍ଯ୍ୟକାରିଣୀ (ସିଡବ୍ଲୁସି) ବାସ୍ତବରେ ପାକିସ୍ତାନ କାର୍ଯ୍ୟକାରିଣୀ (ପିଡବ୍ଲୁସି) ପରି କାର୍ଯ୍ୟ କରୁଛି।
ସର୍ଜିକାଲ ଷ୍ଟ୍ରାଇକ୍ କେଉଁଠି ହୋଇଥିଲା, ସେହି ସମୟରେ କେଉଁଠି ଲୋକମାନେ ପ୍ରାଣ ହରାଇଥିଲେ ଏବଂ ପାକିସ୍ତାନରେ ଏହା କେଉଁଠି ଘଟିଥିଲା ତାହା ଆଜି ପର୍ଯ୍ୟନ୍ତ ମୁଁ ଜାଣିପାରିଲି ନାହିଁ। କିଛି ହୋଇ ନ ଥିଲା। କେଉଁଠି ବି ସର୍ଜିକାଲ ଷ୍ଟ୍ରାଇକ୍ ଦେଖିବାକୁ ମିଳି ନ ଥିଲା। କେହି ଜାଣି ନ ଥିଲେ ବୋଲି ଚନ୍ନି ଏକ ସାମ୍ବାଦିକ ସମ୍ମିଳନୀରେ କହିଛନ୍ତି। ସେ ଆହୁରି କହିଛନ୍ତି, ମୁଁ ସବୁବେଳେ ପ୍ରମାଣ ଦାବି କରିଆସିଛି। ନିକଟରେ ହୋଇଥିବା ପହଲଗାମ ଆତଙ୍କବାଦୀ ଆକ୍ରମଣକୁ ନେଇ କଂଗ୍ରେସ ଦଳ ସର୍ବସାଧାରଣରେ ସରକାରଙ୍କୁ ସମର୍ଥନ କରିଥିବା ବେଳେ ଚନ୍ନି ଏଭଳି ମନ୍ତବ୍ୟ ଦେଇଛନ୍ତି। ଆମେ ଦାବି କରୁଛୁ ଯେ ସରକାର କିଛି କରନ୍ତୁ। ପହଲଗାମ ଆତଙ୍କବାଦୀ ଆକ୍ରମଣର ଦୋଷୀ କିଏ ତାହା ଲୋକଙ୍କୁ କୁହନ୍ତୁ ଏବଂ ସେମାନଙ୍କୁ ଦଣ୍ଡ ଦିଅନ୍ତୁ। ଏହି ଘଟଣାର ଜବାବ ଦେବାରେ ବିଳମ୍ବକୁ ସମାଲୋଚନା କରି ସେ କହିଛନ୍ତି, ପହଲଗାମ ଆକ୍ରମଣକୁ ୧୦ ଦିନ ବିତିଯାଇଥିଲେ ମଧ୍ୟ ସରକାର କୌଣସି ପଦକ୍ଷେପ ନେଇନାହାନ୍ତି। ପାକିସ୍ତାନ ବିରୋଧରେ ସରକାର କ’ଣ କାର୍ଯ୍ୟାନୁଷ୍ଠାନ ନେବାକୁ ଯାଉଛନ୍ତି ତାହାକୁ ସାରା ଦେଶ ଅପେକ୍ଷା କରିଛି ବୋଲି ଚନ୍ନି କହିଛନ୍ତି।
ରାହୁଲଙ୍କ ସହ ପାକିସ୍ତାନ ଯାଅ: ବିଜେପି
ସିଡବ୍ଲ୍ୟୁସିକୁ ପିଡବ୍ଲ୍ୟୁସି କହିଲେ ସମ୍ବିତ
ଚନ୍ନିଙ୍କ ମନ୍ତବ୍ୟ ଉପରେ ତୀବ୍ର ପ୍ରତିକ୍ରିୟା ପ୍ରକାଶ କରି ଦିଲ୍ଲୀ ମନ୍ତ୍ରୀ ମନଜିନ୍ଦର ସିଂହ ସିର୍ସା ତାଙ୍କ ମନ୍ତବ୍ୟକୁ କଂଗ୍ରେସ ନେତୃତ୍ୱ ସହ ଯୋଡ଼ିଛନ୍ତି। ସର୍ଜିକାଲ୍ ଷ୍ଟ୍ରାଇକ୍ର ପ୍ରମାଣ ଦରକାର ବୋଲି ଚରଣଜିତ ସିଂହ ଚନ୍ନିଙ୍କ ବୟାନ କଂଗ୍ରେସ ଓ ଗାନ୍ଧୀ ପରିବାରର ମନ୍ଦ ମାନସିକତାକୁ ପ୍ରତିଫଳିତ କରୁଛି। ଏହି ଲୋକମାନେ ସେନାର ମନୋବଳ ହ୍ରାସ କରିବାର କୌଣସି ସୁଯୋଗ ଛାଡ଼ନ୍ତି ନାହିଁ ବୋଲି ସିର୍ସା କହିଛନ୍ତି। ଏୟାର ଷ୍ଟ୍ରାଇକ୍ର ପ୍ରମାଣ ଦେଖିବା ପାଇଁ ଚନ୍ନି ରାହୁଲ ଗାନ୍ଧୀଙ୍କ ସହ ପାକିସ୍ତାନ ଯାଇପାରିବେ ବୋଲି ସେ କହିଛନ୍ତି। ନିଜେ ପାକିସ୍ତାନ କହୁଛି ସର୍ଜିକାଲ ଷ୍ଟ୍ରାଇକ୍ କରି ଭାରତ ଅନେକ କ୍ଷତି କରିଛି। ସବୁବେଳେ ସେନାକୁ ପ୍ରଶ୍ନ କରି ସେନାକୁ ନିରାଶ କରୁଥିବା ଗାନ୍ଧୀ ପରିବାରର କୁତ୍ସିତ ରାଜନୀତି ଓ ଅପରିଷ୍କାର ମାନସିକତାକୁ ପୁଣି ଥରେ ଦେଖାଇଛନ୍ତି ଚନ୍ନି। ମୁଁ ଏହାକୁ ନିନ୍ଦା କରୁଛି ବୋଲି ସିର୍ସା କହିଛନ୍ତି।
ତେଣେ ବିଜେପି ମୁଖପାତ୍ର ସମ୍ବିତ ପାତ୍ର ମଧ୍ୟ ସର୍ଜିକାଲ ଷ୍ଟ୍ରାଇକ୍ ଉପରେ ସନ୍ଦେହ କରି ଚନ୍ନିଙ୍କ ବୟାନ ଉପରେ ପ୍ରତିକ୍ରିୟା ରଖି କହିଛନ୍ତି ଯେ କଂଗ୍ରେସ ସଶସ୍ତ୍ର ବାହିନୀ ଓ ଭାରତବାସୀଙ୍କୁ ନିରାଶ କରୁଛି। ବାହାରୁ ସେମାନେ କଂଗ୍ରେସ ୱାର୍କିଂ କମିଟି (ସିଡବ୍ଲ୍ୟୁସି) କିନ୍ତୁ ଭିତରେ ସେମାନେ ପିଡବ୍ଲ୍ୟୁସି (ପାକିସ୍ତାନ ୱାର୍କିଂ କମିଟି) ଅଟନ୍ତି। ଗତକାଲି ସିଡବ୍ଲ୍ୟୁସି ବୈଠକ ଅନୁଷ୍ଠିତ ହୋଇଥିଲା ଏବଂ କିଛି ପ୍ରସ୍ତାବ ପାରିତ ହୋଇଥିଲା। ଏହାପରେ ଏକ ସାମ୍ବାଦିକ ସମ୍ମିଳନୀ ଅନୁଷ୍ଠିତ ହୋଇଥିଲା ଏବଂ ପଞ୍ଜାବର ପୂର୍ବତନ ମୁଖ୍ୟମନ୍ତ୍ରୀ ଚନ୍ନି କହିଛନ୍ତି ଯେ ପୁଲୱାମା ଆତଙ୍କବାଦୀ ଆକ୍ରମଣ ପରେ ସର୍ଜିକାଲ ଷ୍ଟ୍ରାଇକ୍ କେବେ କରାଯାଇ ନାହିଁ। ପାକିସ୍ତାନୀ ଆତଙ୍କବାଦୀ ଓ ପାକିସ୍ତାନୀ ସେନାକୁ ଅକ୍ସିଜେନ ଯୋଗାଇବା ପାଇଁ କଂଗ୍ରେସ କୌଣସି ସୁଯୋଗ ଛାଡ଼ୁନାହିଁ ବୋଲି ସମ୍ବିତ କହିଛନ୍ତି।
