ଆତଙ୍କବାଦୀଙ୍କୁ ରାଜନାଥଙ୍କ ଚେତାବନୀ: ଲକ୍ଷ୍ନୌରେ ବ୍ରହ୍ମୋସ୍ କ୍ଷେପଣାସ୍ତ୍ର ଉତ୍ପାଦନ ୟୁନିଟ୍ ଉଦ୍ଘାଟିତ
ଲକ୍ଷ୍ନୌ: ଲକ୍ଷ୍ନୌର ପ୍ରତିରକ୍ଷା ଶିଳ୍ପ କରିଡରରେ ଆଜି ବ୍ରହ୍ମୋସ୍ ସୁପରସୋନିକ୍ କ୍ରୁଜ୍ କ୍ଷେପଣାସ୍ତ୍ର ଉତ୍ପାଦନ ୟୁନିଟ୍ ଉଦ୍ଘାଟିତ ହୋଇଛି। ଉଦଘାଟନ ଅବସରରେ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ଅପରେସନ୍ ସିନ୍ଦୂରକୁ ପ୍ରଶଂସା କରିଛନ୍ତି। ଭାରତ ଓ ପାକିସ୍ତାନ ମଧ୍ୟରେ ଅସ୍ତ୍ରବିରତି ଘୋଷଣା ହେବାର ଗୋଟିଏ ଦିନ ପରେ ପ୍ରତିରକ୍ଷା ମନ୍ତ୍ରୀ କହିଛନ୍ତି ଯେ ଭାରତ ମାତାଙ୍କ କପାଳରେ ଆକ୍ରମଣ କରି ଅନେକ ପରିବାରର ସିନ୍ଦୂର ପୋଛିଥିବା ଭାରତ ବିରୋଧୀ ଏବଂ ଆତଙ୍କବାଦୀ ସଂଗଠନଗୁଡ଼ିକୁ ଅପରେସନ ସିନ୍ଦୁର ମାଧ୍ୟମରେ ଭାରତୀୟ ସେନା ଚରମ ଶାସ୍ତି ପ୍ରଦାନ କରିଛି।
ଏଥିପାଇଁ ସମଗ୍ର ଦେଶ ଆଜି ଭାରତୀୟ ସଶସ୍ତ୍ର ବାହିନୀକୁ ସଲାମ କରୁଛି ବୋଲି ରାଜନାଥ କହିଛନ୍ତି। ଅପରେସନ ସିନ୍ଦୁର କେବଳ ଏକ ସାମରିକ କାର୍ଯ୍ୟାନୁଷ୍ଠାନ ନୁହେଁ ବରଂ ଭାରତର ରାଜନୈତିକ, ସାମାଜିକ ଏବଂ ରଣନୈତିକ ସଂକଳ୍ପର ପ୍ରତୀକ। ଏହି ଅପରେସନ ଆତଙ୍କବାଦ ବିରୋଧରେ ଭାରତର ଦୃଢ଼ ସଂକଳ୍ପ ଏବଂ ସାମରିକ ଶକ୍ତିର ସାମର୍ଥ୍ୟ ଓ ସଂକଳ୍ପକୁ ଦର୍ଶାଉଛି । ଆମେ ପ୍ରତିପାଦିତ କରିଛୁ ଯେ ଯେତେବେଳେ ବି ଭାରତ ଆତଙ୍କବାଦ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବ, ସେତେବେଳେ ଆତଙ୍କବାଦୀ କିମ୍ବା ସେମାନଙ୍କ ମାଲିକମାନେ କେଉଁଠି ଲୁଚିଲେ ବି ନିସ୍ତାର ପାଇବେ ନାହିଁ। ପାକିସ୍ତାନ ଭିତରେ ଏକାଧିକ ଆକ୍ରମଣକୁ ଦର୍ଶାଇ ରାଜନାଥ କହିଥିଲେ ଯେ ପାକିସ୍ତାନ ପ୍ରାୟୋଜିତ ଆତଙ୍କବାଦ ବିରୋଧରେ ଭାରତ ଏବେ ବିଶାଳ ରଣନୀତିରେ କାମ କରୁଛି।
ଲକ୍ଷ୍ନୌରେ ଉଦ୍ଘାଟିତ ୩୦୦ କୋଟି ଟଙ୍କାର ଏହି ଉତ୍ପାଦନ କେନ୍ଦ୍ରରେ ବାର୍ଷିକ ୮୦ରୁ ୧୦୦ ବ୍ରହ୍ମୋସ୍ କ୍ଷେପଣାସ୍ତ୍ର ପ୍ରସ୍ତୁତ କରାଯିବ। ଭାରତ-ରୁଷ୍ର ମିଳିତ ଉଦ୍ୟୋଗ ବ୍ରହ୍ମୋସ୍ ଏରୋସ୍ପେସ୍ ମାଧ୍ୟମରେ ବିକଶିତ ଏହି ସୁପରସୋନିକ୍ କ୍ରୁଜ୍ କ୍ଷେପଣାସ୍ତ୍ରର ଦୂରତା ୨୯୦ରୁ ୪୦୦ କିଲୋମିଟର ଏବଂ ମାକ୍ ୨.୮ର ସର୍ବୋଚ୍ଚ ବେଗ ରହିଛି। ବ୍ରହ୍ମୋସ୍ ସୁପରସୋନିକ୍ କ୍ରୁଜ୍ କ୍ଷେପଣାସ୍ତ୍ରକୁ ସ୍ଥଳ, ସମୁଦ୍ର କିମ୍ବା ଏୟାର ପ୍ଲାଟଫର୍ମରୁ ଉତକ୍ଷେପଣ କରାଯାଇ ପାରିବ।
