ନୂଆଦିଲ୍ଲୀ: ଦେଶରେ ଏମିତି କିଛି ଲୋକ ଅଛନ୍ତି ଯେଉଁମାନେ ନକଲି ହିତାଧିକାରୀ ସାଜି ସରକାରୀ ଯୋଜନାର ଲାଭ ଉଠାଇ ଚାଲିଛନ୍ତି | ଆଉ ଏହି ନକଲି ହିତାଧିକାରୀଙ୍କୁ ଚିହ୍ନଟ କରିବା ପାଇଁ କେନ୍ଦ୍ର ସରକାର ଏକ ଅଭିଯାନ ଆରମ୍ଭ କରିଛନ୍ତି। ଏହି ଅଭିଯାନ ଅଧୀନରେ ସରକାର ପ୍ରଧାନମନ୍ତ୍ରୀ କିସାନ ସମ୍ମାନ ନିଧି, ମନରେଗା ଓ ଫର୍ଟିଲାଇଜର ସବସିଡି ଭଳି ପ୍ରମୁଖ ଯୋଜନାର ହିତାଧିକାରୀଙ୍କୁ ଯାଞ୍ଚ କରାଯାଉଛି | ବାସ୍ତବରେ କେନ୍ଦ୍ର ସରକାର ଅନୁମାନ କରୁଛନ୍ତି ଯେ ଏହି ତିନିଟି ଯୋଜନାର ସୁଫଳ ଏମିତି ଅନେକ ଲୋକ ପାଉଛନ୍ତି, ଯେଉଁମାନେ ପ୍ରକୃତରେ ହିତାଧିକାରୀ ନୁହନ୍ତି | ନକଲି ହିତାଧିକାରୀ ସାଜି ସରକାରଙ୍କ ଏହି ସବୁ ଯୋଜନାର ଲାଭ ଉଠାଉଛନ୍ତି | ଏହି କାରଣରୁ ସରକାର କୋଟି କୋଟି ଟଙ୍କା କ୍ଷତି ସହୁଛନ୍ତି। ନକଲି ହିତାଧିକାରୀଙ୍କୁ ଚିହ୍ନଟ କରିବା ଏବଂ ଏହି ଅଭିଯାନ ଅଧୀନରେ ସେମାନଙ୍କୁ ଯୋଜନାରୁ ହଟାଇବାକୁ ସରକାର ଯୋଜନା କରିଛନ୍ତି। ଏହାଦ୍ୱାରା ସରକାର ୧୮୦୦୦ କୋଟିରୁ ଅଧିକ ଟଙ୍କା ସଞ୍ଚୟ କରିବେ। ଏହି ଅଭିଯାନ ପାଇଁ ସରକାର ଏକ ସ୍ୱତନ୍ତ୍ର ଦଳ ଗଠନ କରିଛନ୍ତି।
ଏହି ଦଳ ବିଭିନ୍ନ ଉତ୍ସରୁ ତଥ୍ୟ ସଂଗ୍ରହ କରି ନକଲି ହିତାଧିକାରୀଙ୍କୁ ଚିହ୍ନଟ କରୁଛି | କେବଳ ହିତାଧିକାରୀ ଚିହ୍ନଟ କରୁନାହିଁ ବରଂ ସେମାନଙ୍କ ବ୍ୟାଙ୍କ ଆକାଉଣ୍ଟ ଯାଞ୍ଚ କରୁଛି | ମିଳିଥିବା ସୂଚନା ମୁତାବକ ପ୍ରମୁଖ ତିନିଟି ସରକାରୀ ଯୋଜନାର ହିତାଧିକାରୀମାନଙ୍କର ଆଧାର କାର୍ଡ ଏବଂ ଅନ୍ୟାନ୍ୟ ଦଲିଲ ଯାଞ୍ଚ କରାଯିବା ସହ ହିତାଧିକାରୀଙ୍କ ପରିବାର ସଦସ୍ୟଙ୍କ ବିଷୟରେ ସୂଚନା ସଂଗ୍ରହ କରାଯାଉଛି | ଏହାଦ୍ୱାରା ସହଜରେ ନକଲି ହିତାଧିକାରୀଙ୍କୁ ଚିହ୍ନଟ କରିବା ସହଜ ହେବ ବୋଲି ସରକାର ଚିନ୍ତା କରୁଛନ୍ତି | କେନ୍ଦ୍ର ସରକାରଙ୍କ ପକ୍ଷରୁ ମିଳିଥିବା ସୂଚନା ମୁତାବକ ଏହି ଅଭିଯାନ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ। ଏହା ସରକାରଙ୍କ କୋଟି କୋଟି ଟଙ୍କା ସଞ୍ଚୟ କରିବ ଏବଂ ଏହି ଯୋଜନାର ଲାଭ ପ୍ରକୃତ ଅଭାବୀ ଲୋକଙ୍କ ନିକଟରେ ପହଞ୍ଚିବ।
