ସୀମାରେ ଶାନ୍ତି ପ୍ରକ୍ରିୟା ଜାରି ରଖିବାକୁ ସହମତି
ନୂଆଦିଲ୍ଲୀ: ଜୋହାନ୍ସବର୍ଗରେ ଅନୁଷ୍ଠିତ ୧୫ଶ ବ୍ରିକ୍ସ ସମ୍ମିଳନୀରେ ଆଜି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ଚୀନ୍ ରାଷ୍ଟ୍ରପତି ସି ଜିନପିଙ୍ଗଙ୍କ ମଧ୍ୟରେ ଦ୍ବିପାକ୍ଷିକ କଥାବାର୍ତ୍ତା ହୋଇଛି। ମୁଖ୍ୟତଃ ସୀମାରେ ଶାନ୍ତି ପ୍ରକ୍ରିୟା ଜାରି ରଖିବା ଏବଂ ଉତ୍ତେଜନା ହ୍ରାସ ପାଇଁ ସେନା ପ୍ରତ୍ୟାହାର ନିମନ୍ତେ ଉଭୟ ନେତା ଗୁରୁତ୍ବାରୋପ କରିଛନ୍ତି। ଆଜି ସମ୍ମିଳନୀରେ ମୋଦୀ ଏବଂ ଜିନପିଙ୍ଗ ମଞ୍ଚ ଉପରେ ପରସ୍ପର ସହ ହାତ ମିଳାଇଥିଲେ। ଏହା ପୂର୍ବରୁ ମୋଦୀ ଏବଂ ଜିନପିଙ୍ଗ ବ୍ରିକ୍ସ ବିଜନେସ ଫୋରମ୍ରେ ଗୋଟିଏ ମଞ୍ଚରେ ଏକାଠି ରହିବେ ବୋଲି ଅନୁମାନ କରାଯାଉଥିଲା।
ବ୍ରିକ୍ସ ବିଜନେସ ଫୋରମ୍ରେ ମୋଦୀ ଉଦ୍ବୋଧନ ଦେଇଥିଲେ। କିନ୍ତୁ ଜିନପିଙ୍ଗ ଉକ୍ତ କାର୍ଯ୍ୟକ୍ରମରେ ଯୋଗ ଦେଇନଥିଲେ। ବିଜନେସ ଫୋରମ ବୈଠକକୁ ଜିନପିଙ୍ଗ ନିଜେ ଆସିବା ପରିବର୍ତ୍ତେ ତାଙ୍କ ବାଣିଜ୍ୟ ମନ୍ତ୍ରୀ ୱାଙ୍ଗ ୱେଣ୍ଟାଓଙ୍କୁ ପଠାଇଥିଲେ। ତେବେ ବ୍ରିକ୍ସ ସମ୍ମିଳନୀ ଅବସରରେ ମୋଦୀ-ଜିନପିଙ୍ଗ ଆଜିଦ୍ବିପାକ୍ଷିକ କଥାବାର୍ତ୍ତା କରିବା ବେଶ ଗୁରୁତ୍ବପୂର୍ଣ୍ଣ ଥିଲା। ଉଲ୍ଲେଖଯୋଗ୍ୟ, ୨୦୨୨ରେ ଏସ୍ସିଓ ସମ୍ମିଳନୀ ପାଇଁ ସମରକନ୍ଦରେ ଏକାଠି ଥିବା ମୋଦୀ ଏବଂ ଜିନପିଙ୍ଗ ସେ ସମୟରେ କୌଣସି ଦ୍ବିପାକ୍ଷିକ କଥାବାର୍ତ୍ତା କରିନଥିଲେ। ତେବେ ଏହାପରେ ଇଣ୍ଡୋନେସିଆରେ ଜି-୨୦ ସମ୍ମିଳନୀ ଅବସରରେ ଦୁଇ ନେତା କଥାବାର୍ତ୍ତା କରିଥିଲେ। ସୂଚନାଯୋଗ୍ୟ, ଗତ ୩ ବର୍ଷ ଧରି ଭାରତ ଏବଂ ଚୀନ୍ ମଧ୍ୟରେ ସୀମା ବିବାଦ ଲାଗି ରହିଛି ଏବଂ ସମ୍ପର୍କ ତିକ୍ତ ହେବାରେ ଲାଗିଛି।
