୨୧୦ ଥିଲା, ଆଉ ୪୧୬କୁ ମୁଖ୍ୟମନ୍ତ୍ରୀଙ୍କ ଅନୁମୋଦନ, ଅଧିକ ୩ ଅତିରିକ୍ତ କମିସନର ଓ ୬ ଜୋନାଲ କମିସନର
ଭୁବନେଶ୍ବର/ବଲାଙ୍ଗୀର: ବିଷ ପିଇ ଆତ୍ମହତ୍ୟା ଉଦ୍ୟମ କରିଥିବା ବଲାଙ୍ଗୀର ଜିଲ୍ଲା ସଇନ୍ତଳା ଥାନାରେ କାର୍ଯ୍ୟରତ ଟ୍ରେନି ଏସ୍ଆଇ କାଜଲ ବାଗ୍ ଏବେ କେଉଁଠି? ପୁଲିସ ତାଙ୍କୁ ଉଦ୍ଧାର କରି ମେଡିକାଲରେ ଭର୍ତ୍ତି କରିଥିବା ବେଳେ ବିନା ଡିସ୍ଚାର୍ଜରେ ସେ ଗଲେ କୁଆଡ଼େ? ଏହା ଏକ ସମ୍ବେଦନଶୀଳ ଓ ସ୍ପର୍ଶକାତର ଘଟଣା ହୋଇଥିବା ବେଳେ କାହିଁକି ଠାବ କରିପାରୁନି ଜିଲ୍ଲା ପୁଲିସ? ଘଟଣାକୁ ନେଇ ସାରା ରାଜ୍ୟରେ ଆଲୋଡ଼ନ ସୃଷ୍ଟି ହୋଇଥିବା ବେଳେ ପୁଲିସ ମୁଖ୍ୟାଳୟ କାହିଁକି ଚୁପ୍? କୌଣସି ପୁଲିସ ଅଧିକାରୀ ଏ ନେଇ ମୁହଁ ନ ଖୋଲିବା ସାଧାରଣରେ ସନ୍ଦେହ ସୃଷ୍ଟି କରିଛି। ପୁଲିସ ବିଭାଗର ଘଟଣା ହୋଇଥିବାରୁ ଏହାକୁ ଚପାଇବା ପାଇଁ ଯଥାସମ୍ଭବ ଉଦ୍ୟମ କରାଯାଉଛି ବୋଲି ସାଧାରଣରେ ଚର୍ଚ୍ଚା ହେଉଛି। ଗୋଟିଏ ପଟେ ମେଡିକାଲରେ ଅସୁସ୍ଥ ମହିଳା ଏସ୍ଆଇ କାଲିଠାରୁ ଶଯ୍ୟାରେ ନଥିବା ମେଡିକାଲ କଲେଜ ଅଧୀକ୍ଷକ ସ୍ପଷ୍ଟ କରିଥିବା ବେଳେ ବଲାଙ୍ଗୀର ଏସ୍ଡିପିଓ ଏସ୍ଆଇ ସୁସ୍ଥ ଥିବା ବେଳେ ସେ ମେଡିକାଲରେ ଥିବା କହିବା ଦ୍ବନ୍ଦ୍ବ ସୃଷ୍ଟି କରିଛି।
ମିଳିଥିବା ସୂଚନା ଅନୁସାରେ, ଆତ୍ମହତ୍ୟା ଉଦ୍ୟମ ପରେ କାଜଲଙ୍କୁ ପ୍ରଥମେ ସଇନ୍ତଳା ଓ ପରେ ବଲାଙ୍ଗୀର ଭୀମଭୋଇ ମେଡିକାଲ କଲେଜ ହସ୍ପିଟାଲରେ ଚିକିତ୍ସା କରାଯିବା ସମୟରେ ନାଟକୀୟ ଢଙ୍ଗରେ ମହିଳା ଏସ୍ଆଇ ହସ୍ପିଟାଲ ବେଡରୁ କେଉଁଆଡ଼େ ଫେରାର୍ ହୋଇଯାଇଥିଲେ। ଏ ସଂପର୍କରେ ମେଡିକାଲ କଲେଜ ଅଧୀକ୍ଷକ କହିଛନ୍ତି ଯେ ଜଣେ ମହିଳା ପୁଲିସ ମଶା ଲ୍ୟାମ୍ପରେ ଥିବା ତରଳ ପଦାର୍ଥ ପିଇ ଅସୁସ୍ଥ ହୋଇ ମେଡିକାଲରେ ଭର୍ତ୍ତି ହୋଇଥିବା ସୂଚନା ଦିଆଯାଇଥିଲା। ପରେ ସକାଳେ ଡାକ୍ତରମାନେ ୱାର୍ଡ ପରିଦର୍ଶନ କରିବା ସମୟରେ ଉକ୍ତ ମହିଳା ଏସ୍ଆଇ ଶଯ୍ୟାରେ ନଥିବା ପୁଣି ସୂଚନା ମିଳିଥିଲା। ଗତକାଲି ଶଯ୍ୟାରେ ଅନୁପସ୍ଥିତ ରହିବା ପରେ ମେଡିକାଲ ପକ୍ଷରୁ ଫାଣ୍ଡିରେ ଜଣାଇ ଦିଆଯାଇଥିଲା। ମହିଳା ଏସ୍ଆଇଙ୍କ ଆତ୍ମହତ୍ୟା ଉଦ୍ୟମ ପଛରେ ଟାଉନ୍ ଥାନାରେ କାର୍ଯ୍ୟ କରୁଥିବା ତାଙ୍କର ପୁରୁଷ ବନ୍ଧୁଙ୍କ ସଂପୃକ୍ତି ନେଇ ଚର୍ଚ୍ଚା ଜୋର୍ ଧରିଥିବା ବେଳେ ପୁଲିସର ଭୂମିକାକୁ ନେଇ ସନ୍ଦେହ ସୃଷ୍ଟି ହୋଇଛି।
