ଆଧୁନିକ ଜ୍ଞାନକୌଶଳର ବିକାଶ ସହ ଦିନକୁ ଦିନ ନୂଆ ନୂଆ ପ୍ରଜାତିର ଜୀବଜନ୍ତୁ ଓ ବୃକ୍ଷଲତାଙ୍କର ଆବିଷ୍କାର ହୋଇଚାଲିଛି। ଏହି କ୍ରମରେ ମିଆଁମାରର ଏକ ତିନିଜଣିଆ ବୈଜ୍ଞାନିକ ଦଳ ‘ତ୍ରିମେରେସୁରସ ୟୁତଜି’ ନାମକ ଏକ ବିଶେଷ ପ୍ରଜାତିର ସାପକୁ ଲୋକଲୋଚନକୁ ଆଣିଛନ୍ତି। ତୃଣ ଭଳି ସବୁଜ ରଙ୍ଗର ଏହି ସାପଟି ‘ପିଟ୍ ଭାଇପର୍ସ’ ସାପ ପରିବାର ଅନ୍ତର୍ଗତ ବୋଲି କୁହାଯାଇଛି।
ଦକ୍ଷିଣ-ପୂର୍ବ ଏସିଆରେ ‘ପିଟ୍ ଭାଇପର୍ସ’ ପରିବାରର ବିଭିନ୍ନ ପ୍ରଜାତି ଉପରେ ଗବେଷଣା ଜାରି ରଖିଥିବା ଏହି ବୈଜ୍ଞାନିକମାନେ ୨୦୦୮ ମସିହାରେ ୨୦ ଫୁଟ ଉଚ୍ଚ ଏକ ବୃକ୍ଷଡାଳରୁ ଏହି ସାପଟିକୁ ଉଦ୍ଧାର କରି ସଂଗ୍ରହାଳୟରେ ସଂରକ୍ଷିତ କରି ରଖିଥିଲେ। ପରେ ଏହାର ଲକ୍ଷଣ ଓ ବ୍ୟବହାରରୁ ଏହା ଏକ ନୂତନ ପ୍ରଜାତିର ବୋଲି ଜଣାପଡ଼ିଛି। ଆକାରରେ ସରୁ ଓ ୨.୭ ଫୁଟ ଲମ୍ବ ବିଶିଷ୍ଟ ଏହି ପ୍ରଜାତିର ମାଈ ସାପମାନଙ୍କର ସବୁଜ-ସୁନେଲି ରଙ୍ଗର ଆଖି ରହିଥିବା ବେଳେ ଅଣ୍ଡିରାଙ୍କର ଆଖି ତମ୍ବା ରଙ୍ଗର।
ମିଆଁମାରର ଜନବସତି ଅଞ୍ଚଳରେ ଏବେ ବି ଦେଖାଯାଉଥିବା ଏହି ପ୍ରଜାତିର ସାପଗୁଡ଼ିକ ଅନ୍ୟ ପିଟ୍ ଭାଇପର୍ସ ଭଳି ଭୀଷଣ ବିଷଧର। ତେବେ ଏହାର ବିଷର କ୍ଷମତା ସମ୍ପର୍କରେ ଏଯାଏ ଗବେଷଣା କରାଯାଇନାହିଁ। ବିଶେଷ କରି ମିଆଁମାରର କେନ୍ଦ୍ରୀୟ ଓ ଅଭ୍ୟନ୍ତର ଅଞ୍ଚଳର ଗରମ ଓ ଆର୍ଦ୍ର ପରିବେଶରେ ଏମାନଙ୍କୁ ଦେଖିବାକୁ ମିଳିଥାଏ। ଗଛର ଡାଳ ଓ ବୁଦା ମାନଙ୍କରେ ରହିବାକୁ ଏମାନେ ପସନ୍ଦ କରନ୍ତି। ‘ତ୍ରିମେରେସୁରସ ୟୁତଜି’ ସମ୍ପର୍କରେ ସବିଶେଷ ବିବରଣୀ ‘ଜୁଟାକ୍ସ’ ପତ୍ରିକାର ଅକ୍ଟୋବର ସଂସ୍କରଣରେ ପ୍ରକାଶିତ ହୋଇଛି।
