ଧଉଳି: ଧଉଳି ଥାନାର ରଘୁନାଥପୁର ଗ୍ରାମରେ ଗଣେଶ ମେଢ଼ ଶୋଭାଯାତ୍ରାକୁ ନେଇ ତଳ ଭୋଇସାହି ଓ ଉପର ଭୋଇସାହି ମଧ୍ୟରେ ଭୀଷଣ ଗଣ୍ଡଗୋଳ ହୋଇଛି। ଏହି ଗଣ୍ଡଗୋଳରେ ଉଭୟ ପକ୍ଷରୁ ୪ ଜଣ ଗୁରୁତର ଆହତ ହୋଇ ହସ୍ପିଟାଲରେ ଭର୍ତ୍ତି ହୋଇଛନ୍ତି। ଦୁଇ ସାହିର ଯୁବକ, ପୁରୁଷ ଓ ମହିଳା ଠେଙ୍ଗାବାଡ଼ି ଧରି ମାରପିଟ ହୋଇଥିଲେ। ପରସ୍ପର ଉପରକୁ ଟେକା ପଥର ଫିଙ୍ଗା ଫୋପଡ଼ା କରିଥିଲେ। ରିପୋର୍ଟ ଲେଖା ହେବା ବେଳକୁ ଅଧିକ ଗଣ୍ଡଗୋଳ ଆଶଙ୍କାରେ ସାହିରେ ପିସିଆର ପାଟ୍ରୋଲିଂ କରୁଥିବା ବେଳେ ପୁଲିସ କର୍ମଚାରୀ ମୁତୟନ ହୋଇଛନ୍ତି। ଏନେଇ ସାହିରେ ଉତ୍ତେଜନା ଲାଗି ରହିଛି। ଦୁଇ ପକ୍ଷଙ୍କ ଅଭିଯୋଗକୁ ଭିତ୍ତିକରି ଥାନାରେ ପୃଥକ ପୃଥକ ମାମଲା ରୁଜୁ ହୋଇଛି।
ସୂଚନା ଅନୁସାରେ ଆଜି ମଧ୍ୟାହ୍ନରେ ଉପର ସାହି ଏବଂ ତଳ ସାହିର ଗଣେଶ ଭସାଣି ଶୋଭାଯାତ୍ରା ଯାଉଥିଲା। ନୂଆଗାଁ ମ୍ୟୁନିସିପାଲିଟି ରାସ୍ତା ନିକଟରେ ଦୁଇ ସାହିର ଶୋଭାଯାତ୍ରା ମୁହାଁମୁହିଁ ହୋଇଥିଲା। ଗୋଟିଏ ଗୋଷ୍ଠୀର ଶୋଭାଯାତ୍ରାରେ ଥିବା ଯୁବକମାନେ ଦୀର୍ଘ ସମୟ ଧରି ଡିଜେ ବଜାଇ ନୃତ୍ୟ କରିଥିଲେ। ବିଳମ୍ବକୁ ନେଇ ଉଭୟ ଶୋଭାଯାତ୍ରାରେ ଥିବା ଯୁବକଙ୍କ ମଧ୍ୟରେ ପ୍ରଥମେ ଯୁକ୍ତିତର୍କ ହୋଇଥିଲା। ପରେ ସେମାନେ ହାତାହାତି ହୋଇ ବିଧା ଗୋଇଠା ମରାମରି ହୋଇ ଗଡ଼ାତଡ଼ା ହୋଇଥିଲେ। ତା’ପରେ ଗଣ୍ଡଗୋଳ ଉଗ୍ରରୂପ ନେଇଥିଲା। ଗାଁର ମହିଳା ଓ ପୁରୁଷ ନିଜ ନିଜ ଗୋଷ୍ଠୀର ଯୁବକମାନଙ୍କୁ ସମର୍ଥନ କରି ଠେଙ୍ଗାବାଡ଼ି, ଖରିକାମୁଠା, କାଠଫାଳିଆ ଧରି ମାଡ଼ି ଯାଇଥିଲେ, ଟେକା ପଥର ମାଡ଼ କରିଥିଲେ। ଫଳରେ ଦୁଇ ପକ୍ଷରୁ ୪ ଜଣ ଯୁବକ ଗୁରୁତର ଆହତ ହୋଇପଡ଼ିଥିଲେ। ଧଉଳି ପିସିଆର ପୁଲିସ ଉପସ୍ଥିତିରେ ଉଭୟ ଗୋଷ୍ଠୀ ଗଣ୍ଡଗୋଳ କରିଥିଲେ ହେଁ ପୁଲିସ ଦ୍ବାରା ଗଣ୍ଡଗୋଳ ନିୟନ୍ତ୍ରଣ କରିବା ସମ୍ଭବ ହୋଇନଥିଲା। ଉଭୟ ପକ୍ଷଙ୍କ ଅଭିଯୋଗକୁ ଭିତ୍ତିକରି ଥାନାରେ ୧୯ ଜଣଙ୍କ ବିରୋଧରେ ମାମଲା ରୁଜୁ ହୋଇଛି। ହେଲେ ରିପୋର୍ଟ ଲେଖା ବେଳକୁ ପୁଲିସ ଜଣେ ହେଲେ ଅଭିଯୁକ୍ତକୁ ଗିରଫ କରି ନଥିବା ସୂଚନା ମିଳିଛି।
