ମହିଳାମାନଙ୍କ କେଶ ସେମାନଙ୍କ ସୌନ୍ଦର୍ଯ୍ୟର ଏକ ବିଶେଷ ଅଂଶ ଭାବେ ବିବେଚିତ। ତେଣୁ ଅନେକ ମହିଳା କେଶ ବଢ଼ାଇବାକୁ ପସନ୍ଦ କରିଥା’ନ୍ତି। ଉତ୍ତରପ୍ରଦେଶର ସ୍ମିତା ଶ୍ରୀବାସ୍ତବ ନାମ୍ନୀ ଜଣେ ୪୬ ବର୍ଷୀୟା କେଶବତୀ ୨୩୬.୨୨ ସେ.ମି. ବା ୭ ଫୁଟ ୯ ଇଞ୍ଚ ଲମ୍ବ କେଶ ବଢ଼ାଇ ଗିନିସ୍ ବିଶ୍ବ ରେକର୍ଡ ହାସଲ କରିଛନ୍ତି। ଏହି ରେକର୍ଡ ଅନୁସାରେ ସ୍ମିତା ହେଉଛନ୍ତି ପୃଥିବୀର ସବୁଠାରୁ ଲମ୍ବା କେଶଧାରୀ ଜୀବିତ ବ୍ୟକ୍ତି। ତାଙ୍କୁ ଯେତେବେଳେ ୧୪ ବର୍ଷ ହୋଇଥିଲା, ସେ ମୁଣ୍ଡରେ ଲମ୍ବା ଚୁଟି ରଖିବା ପାଇଁ ମନ ବଳାଇଥିଲେ। ତାଙ୍କ ମାଆଙ୍କର ଲମ୍ବା ଘନ କେଶ ତାଙ୍କୁ ଏଥିପାଇଁ ଉତ୍ସାହିତ କରିଥିଲା। ୧୯୮୦ ଦଶକର ହିନ୍ଦୀ ଅଭିନେତ୍ରୀମାନଙ୍କର ଲମ୍ବା କେଶବିନ୍ୟାସ ଦ୍ବାରା ମଧ୍ୟ ସେ ଅନୁପ୍ରାଣିତ ହୋଇଥିଲେ। ସ୍ମିତାଙ୍କ କହିବା ଅନୁସାରେ, ଭାରତୀୟ ସଂସ୍କୃତିରେ ଦେବୀମାନଙ୍କର ହିଁ ପାରମ୍ପରିକ ଭାବେ ଲମ୍ବା କେଶ ରହିଥାଏ। ସେହିପରି ତାଙ୍କ ସମାଜରେ ମହିଳାମାନେ ଚୁଟି କାଟିବା ଏକ ଅଶୁଭ ଲକ୍ଷଣ ଭାବେ ବିବେଚିତ ହେଉଥିବାରୁ ସେମାନେ ଏପରି ଚୁଟି ବଢ଼ାଇବାକୁ ପସନ୍ଦ କରିଥା’ନ୍ତି।
ସ୍ମିତା ତାଙ୍କର ଏହି ବର୍ଦ୍ଧିତ କେଶକୁ ସପ୍ତାହରେ ଦୁଇ ଥର ଧୋଇଥା’ନ୍ତି। ପ୍ରତିଥର ଏପରି ଚୁଟି ସଫା କରିବା, ଶୁଖାଇବା ଓ ବେଣୀ ବାନ୍ଧିବାକୁ ତାଙ୍କୁ ତିନି ଘଣ୍ଟା ସମୟ ଲାଗିଥାଏ। ତେବେ ଚୁଟିର ଯତ୍ନ ନେବା ଭିତରେ ମୁଣ୍ଡରୁ ଅନେକ କେଶ ମଧ୍ୟ ଝଡ଼ି ତଳେ ପଡ଼ିଥାଏ। ନିଜ ଚୁଟିକୁ ସେ ଏତେ ଭଲ ପାଆନ୍ତି ଯେ ଗତ ୨୦ ବର୍ଷ ହେଲା ତାଙ୍କର ଝଡ଼ିଥିବା ସମସ୍ତ କେଶକୁ ସେ ଏବେ ବି ସାଇତି ରଖିଛନ୍ତି। ଏକଦା ସେ ଗର୍ଭବତୀ ଥିବା ବେଳେ ଅସୁସ୍ଥ ହୋଇପଡ଼ିବାରୁ ଜୀବନରେ ପ୍ରଥମ ଥର ପାଇଁ ଚୁଟିକୁ କାଟି ୬ ଫୁଟ ଲମ୍ବର କରିଦେଇଥିଲେ। ଏପରି ଲମ୍ବା ଚୁଟି ରଖିବା ପାଇଁ ତାଙ୍କୁ ଅନେକ କଷ୍ଟ କରିବାକୁ ପଡ଼ିଥିବା ବେଳେ ଗିନିସ୍ ବିଶ୍ବ ରେକର୍ଡ ପାଇବା ପରେ ତାଙ୍କ ପରିଶ୍ରମର ମୂଲ୍ୟ ମିଳିଛି ବୋଲି ସେ କହିଛନ୍ତି। ତାଙ୍କ ଚୁଟିରେ ହିଁ ତାଙ୍କ ଜୀବନ ରହିଛି, ତେଣୁ ସେ ବଞ୍ଚିଥିବା ଯାଏ ଚୁଟି ବଢ଼ାଇ ଚାଲିଥିବେ ବୋଲି ସ୍ମିତା କହିଛନ୍ତି।
