ଇସ୍ରାଏଲ ଉପରେ ହାମାସର ଆକ୍ରମଣକୁ ନେଇ ମିଆଁଙ୍କ ପୋଷ୍ଟ ପରେ ତେଜିଲା ବିବାଦ – Utkal Mail
ନୂଆଦିଲ୍ଲୀ: ଇସ୍ରାଏଲ୍-ପାଲେଷ୍ଟାଇନ ମଧ୍ୟରେ ଚାଲିଥିବା ବିବାଦକୁ ନେଇ ଏବେ ଦୁନିଆର ବିଭିନ୍ନ ଦେଶ ଖୋଲାଖୋଲି ଭାବରେ ନିଜର ମତ ପ୍ରକାଶ କରୁଛନ୍ତି। ବିଭିନ୍ନ ଦେଶର ରାଷ୍ଟ୍ରମୁଖ୍ୟଙ୍କଠାରୁ ଆରମ୍ଭ କରି ପ୍ରସିଦ୍ଧ ବ୍ୟକ୍ତିତ୍ୱମାନେ ମଧ୍ୟ ସୋସିଆଲ ମିଡିଆ ମାଧ୍ୟମରେ ନିଜର ପ୍ରତିକ୍ରିୟା ପ୍ରକାଶ କରୁଛନ୍ତି | ଏହାରି ଭିତରେ ଆଡ଼ଲ୍ଟ ଷ୍ଟାର ମିଆଁ ଖଲିଫା ମାଇକ୍ରୋବ୍ଲଗିଂ ସାଇଟ୍ ଏକ୍ସରେ ପାଲେଷ୍ଟାଇନକୁ ସମର୍ଥନ କରି ଏକ ପୋଷ୍ଟ କରିଛନ୍ତି | ଆଉ ତାଙ୍କର ଏହି ପୋଷ୍ଟରୁ ସ୍ପଷ୍ଟ ହୋଇଛି ଯେ ସେ ଇସ୍ରାଏଲ ଉପରେ ପାଲେଷ୍ଟାଇନର ରକେଟ୍ ଆକ୍ରମଣକୁ ସମର୍ଥନ କରୁଛନ୍ତି | ସେ ପାଲେଷ୍ଟାଇନ ସହିତ ଛିଡା ହେବାକୁ ମଧ୍ୟ କହିଛନ୍ତି। ସୋସିଆଲ ମିଡିଆ ପ୍ଲାଟଫର୍ମ ଏକ୍ସରେ ସେ ଲେଖିଛନ୍ତି ଯେ,’ ଯଦି ଆପଣ ପାଲେଷ୍ଟାଇନର ଅବସ୍ଥାକୁ ଦେଖିବେ ଓ ଏହା ସତ୍ତ୍ୱେ ବି ଯଦି ଆପଣ ପାଲେଷ୍ଟାଇନ ସପକ୍ଷରେ ନାହାନ୍ତି, ତେବେ ଆପଣ ରଙ୍ଗଭେଦ ପକ୍ଷରେ ଅଛନ୍ତି ଓ ସମୟ ଆସିଲେ ଇତିହାସ ଏହା ଦେଖାଇବ’ |
ବାସ୍ତବରେ ଇସ୍ରାଏଲ୍-ପାଲେଷ୍ଟାଇନ ବିବାଦ ପୁଣି ଥରେ ଚର୍ଚ୍ଚାର ପରିସରକୁ ଆସିଯାଇଛି, କାରଣ ଏହି ଅଞ୍ଚଳରେ ହିଂସା କ୍ରମାଗତ ଭାବେ ବଢ଼ିବାରେ ଲାଗିଛି। ହାମାସ ଆକ୍ରମଣ ପରେ ଇସ୍ରାଏଲ ପ୍ରତିଶୋଧ ନେବାକୁ ଆକ୍ରମଣ କରିଥିବାବେଳେ ୧୯୮ ଜଣ ପାଲେଷ୍ଟାଇନୀୟଙ୍କର ମୃତ୍ୟୁ ଘଟିଛି। ଏହି ବିବାଦ ଉପରେ ଆନ୍ତର୍ଜାତୀୟ ସମ୍ପ୍ରଦାୟ ତୀକ୍ଷ୍ଣ ନଜର ରଖିଛି। ଉଲ୍ଲେଖ ଥାଉ କି ପୂର୍ବରୁ ମିଆଁ ଇସ୍ରାଏଲ-ପାଲେଷ୍ଟାଇନ ବିବାଦକୁ ନେଇ ଅନେକ ସମୟରେ ସ୍ୱର ଉତ୍ତୋଳନ କରିଛନ୍ତି। ତେବେ ଆଜିର ପୋଷ୍ଟ ପରେ ଉଭୟ ସପକ୍ଷବାଦୀ ଓ ବିପକ୍ଷବାଦୀଙ୍କ ମଧ୍ୟରେ ସୋସିଆଲ ମିଡିଆରେ ଲଢେଇ ଆରମ୍ଭ ହୋଇଯାଇଛି |
