ବିଶ୍ୱ ବ୍ୟାଙ୍କର ରିପୋର୍ଟ: ଆମେରିକା ଜିଡିପିର ଏକ ତୃତୀୟାଂଶ ହେବା ପାଇଁ ଭାରତକୁ ଲାଗିବ ୭୫ ବର୍ଷ

ମଧ୍ୟମ ଆୟ ରାଷ୍ଟ୍ର ଭାବେ ଛନ୍ଦି ହେବା ସହିତ ରାଷ୍ଟ୍ରଗୁଡ଼ିକର ଅର୍ଥନୈତିକ ପ୍ରଗତି ବାଧା ପାଇବ ବୋଲି ବିଶ୍ୱ ବ୍ୟାଙ୍କ ପକ୍ଷରୁ ପ୍ରସ୍ତୁତ ‘ୱାର୍ଲଡ ଡେଭଲପ୍ମେଣ୍ଟ ରିପୋର୍ଟ-୨୦୨୪’ରେ ଉଲ୍ଲେଖ କରାଯାଇଛି । ଭାରତ ପକ୍ଷରୁ ରଖାଯାଇଥିବା ୨୦୪୭ ସୁଦ୍ଧା ବିକଶିତ ରାଷ୍ଟ୍ର ଲକ୍ଷ୍ୟ ପ୍ରଶଂସାଯୋଗ୍ୟ ବୋଲି ବିଶ୍ୱ ବ୍ୟାଙ୍କ ପ୍ରକାଶ କରିଛି । ତେବେ ଉଚ୍ଚ ଆୟ ରାଷ୍ଟ୍ର ପାଇଁ ଭାରତକୁ ‘୩ଆଇ ରଣନୀତି’ ଆପଣାଇବାକୁ ପଡ଼ିବ ବୋଲି ଏହା କହିଛି । ଏହା ହେଉଛି ନବସୃଜନ, ନିବେଶ ଓ ସଂଚାର । ପ୍ରଗତିଶୀଳ ଏବଂ ଅତି ଯତ୍ନର ସହ ପ୍ରସ୍ତୁତ ଯୋଜନାକୁ କାର୍ଯ୍ୟକାରୀ କରିବା ପାଇଁ ରାଷ୍ଟ୍ରଗୁଡ଼ିକୁ ପରାମର୍ଶ ଦେଇଛି ବିଶ୍ୱବ୍ୟାଙ୍କ ।

ଏଥିରେ କୁହାଯାଇଛି ଯେ, ଉଚ୍ଚ-ଆୟ ରାଷ୍ଟ୍ରର ମାନ୍ୟତା ହାସଲ କରିବା ପାଇଁ ଆଗାମୀ ଦଶନ୍ଧିଗୁଡ଼ିକରେ ଭାରତ, ଚୀନ୍, ବ୍ରାଜିଲ ଏବଂ ଦକ୍ଷିଣ ଆଫ୍ରିକା ସମେତ ୧୦୦ରୁ ଊଦ୍ଧ୍ୱର୍ ରାଷ୍ଟ୍ରଙ୍କୁ ଅନେକ ଆହ୍ୱାନର ସାମ୍ନା କରିବାକୁ ପଡ଼ିବ । ୨୦୪୭ ସୁଦ୍ଧା ବିକଶିତ ଭାରତ ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଯେଉଁ ଲକ୍ଷ୍ୟ ରଖିଛନ୍ତି ଉକ୍ତ ଦିଗରେ ଥିବା ଆହ୍ୱାନକୁ ନେଇ ଏ ରିପୋର୍ଟରେ ଆଲୋକପାତ କରାଯାଇଛି । ଗତ ସପ୍ତାହରେ ନୀତି ଆୟୋଗ ଏହାର ଏକ ରିପୋର୍ଟ ଜାରି କରି କହିଥିଲା ଯେ, ମଧ୍ୟମ ଆୟ ରାଷ୍ଟ୍ରରୁ ବିକଶିତ ରାଷ୍ଟ୍ର ପାଲଟିବାକୁ ଭାରତର ବାର୍ଷିକ ମୁଣ୍ଡ ପିଛା ଆୟ ୧୮,୦୦୦ ଡଲାର ହେବା ଦରକାର ।

ଏଥିସହିତ ୨୦ରୁ ୩୦ ବର୍ଷ ପାଇଁ ନିରନ୍ତର ୭ରୁ ୧୦% ଅଭିବୃଦ୍ଧି ଲୋଡ଼ା । ବିକଶିତ ଭାରତ ପାଇଁ ୨୦୪୭ ସୁଦ୍ଧା ଭାରତୀୟ ଅର୍ଥବ୍ୟବସ୍ଥାର ଆକାର ୩୦ ଟ୍ରିଲିୟନ ଡଲାର ହେବା ଦରକାର । ବର୍ତ୍ତମାନ ଭାରତୀୟ ଅର୍ଥନୀତିର ଆକାର ରହିଛି ୩.୩୬ ଟ୍ରିଲିୟନ ଡଲାର । ବିକଶିତ ଭାରତ ପାଇଁ ଜିଡିପି ବର୍ତ୍ତମାନଠାରୁ ୯ ଗୁଣା ବଢ଼ିବା ଦରକାର । ସେହିଭଳି ମୁଣ୍ଡ ପିଛା ଆୟ ବର୍ତ୍ତମାନର ୨,୩୯୨ ଡଲାରରୁ ୮ ଗୁଣା ବଢ଼ିବା ଜରୁରୀ ବୋଲି ନୀତି ଆୟୋଗ ପ୍ରକାଶ କରିଥିଲା । ବିଶ୍ୱ ବ୍ୟାଙ୍କ ଅନୁସାରେ, ଭାରତ ସମେତ ଅନ୍ୟାନ୍ୟ ମଧ୍ୟମ ଆୟ ରାଷ୍ଟ୍ରରେ ଅର୍ଥନୈତିକ ଅଭିବୃଦ୍ଧି ବଢୁନାହିଁ । ଆୟ ବଢ଼ିବା ସହ ଏହା ମନ୍ଥର ହେଉଛି । ଦଶନ୍ଧି ଦଶନ୍ଧି ଧରି ଏହି ଧାରା ବଜାୟ ରହିଛି।

ବିଶ୍ୱ ବ୍ୟାଙ୍କର ମୁଖ୍ୟ ଅର୍ଥନୀତିଜ୍ଞ ଇନ୍ଦର୍ମିତ୍ ଗିଲ୍ କହିଛନ୍ତି ଯେ, ଅଧିକାଂଶ ମଧ୍ୟମ ଆୟ ରାଷ୍ଟ୍ର ଶତାବ୍ଦୀ ଶତାବ୍ଦୀ ଧରି ପ୍ରଚଳିତ ଚିରାଚରିତ ରଣନୀତି ଉପରେ ଭରସା କରି ରହିଛନ୍ତି । ନିବେଶ ବଢ଼ାଇବା ପାଇଁ ଡିଜାଇନ୍ ହୋଇଥିବା ନୀତିଗୁଡ଼ିକ ଉପରେ ରାଷ୍ଟ୍ରଗୁଡ଼ିକ ଗୁରୁତ୍ୱ ଦେଉଛନ୍ତି । ପୁରୁଣା ଢ଼ାଞ୍ଚା ସହିତ ଅଟଳ ରହିଲେ ଅଧିକାଂଶ ବିକାଶମୁଖୀ ରାଷ୍ଟ୍ର ଚଳିତ ଦଶନ୍ଧିର ମଧ୍ୟଭାଗ ସୁଦ୍ଧା ସମୃଦ୍ଧ ରାଷ୍ଟ୍ର ପାଲଟିବାର ଦୌଡ଼ରେ ମନ୍ଥର ହୋଇଯିବେ ।