ରାଉରକେଲା: ଜନଗହଳିପୂର୍ଣ୍ଣ ଡେଲିମାର୍କେଟରେ ସାହିଲ ସିଂହଙ୍କୁ ଛୁରା ମାଡ଼ ଘଟଣାରେ ପ୍ଲାଣ୍ଟସାଇଟ୍ ପୁଲିସ ୩ ଜଣକୁ ଗିରଫ କରି କୋର୍ଟ ଚାଲାଣ କରିଛି। ସେମାନେ ହେଲେ ପାନପୋଷ କୋଏଲ ବ୍ୟାଙ୍କ ବସ୍ତିର ମହମ୍ମଦ ମୋସିନ୍ (୨୧), ନାଲାରୋଡର ମହମ୍ମଦ ଫୈଜାନ୍ ଓରଫ ଆୟନ (୧୯) ଓ ପୁରୁଣା ଡାକଘର ଗଳିର ତସ୍ଲିମ୍ ନାଜାମି ଓରଫ ୱାକିମ୍ (୨୫)। ଏହି ଘଟଣାରେ ଅନ୍ୟ କେଉଁମାନେ ଅଛନ୍ତି, ପୁଲିସ ତା’ର ତଦନ୍ତ କରୁଛି। ସୂଚନାଯୋଗ୍ୟ, ଗତକାଲି ରାତି ପ୍ରାୟ ୮ଟାରେ ଡେଲିମାର୍କେଟ ଟାଉନ ହାଇସ୍କୁଲ ନିକଟରେ ସାହିଲ ତା’ର ଜଣେ ସାଙ୍ଗଙ୍କ ସହ କଥା ହେଉଥିଲେ। ହଠାତ୍ ତିନି ଯୁବକଙ୍କ ପହଞ୍ଚି କୌଣସି କଥାକୁ ନେଇ ସାହିଲଙ୍କ ସହ ଯୁକ୍ତିତର୍କ କରିଥିଲେ। ସାହିଲ ପ୍ରତିବାଦ କରିବାରୁ କଥା ବଢ଼ିଥିଲା। ଏଥିରେ ଉତ୍ତେଜିତ ହୋଇ ତିନି ଯୁବକଙ୍କ ମଧ୍ୟରୁ ଜଣେ ନିକଟସ୍ଥ ପ୍ଲାଷ୍ଟିକ୍ ଦୋକାନରୁ ଛୁରା ଆଣି ସାହିଲକୁ ପ୍ରାଣାତ୍ମକ ଆକ୍ରମଣ କରିଥିଲେ। ସ୍ଥାନୀୟ ଦୋକାନୀ ଓ ସାଧାରଣ ଲୋକ ତିନି ଜଣଙ୍କ ମଧ୍ୟରୁ ଜଣକୁ କାବୁ କରି ମାଡ଼ ମାରିଥିଲେ। ଖବର ପାଇ ପୁଲିସ ଘଟଣାସ୍ଥଳରେ ପହଞ୍ଚି ଆକ୍ରମଣକାରୀକୁ ଉତ୍ତେଜିତ ଲୋକଙ୍କ କବଳରୁ ଉଦ୍ଧାର କରିଥିଲା।
