ବିଗ୍ ବସରେ ଶାହରୁଖଙ୍କ ପୁଅ ଆରୟନଙ୍କ ଓକିଲ ସନା ଖାନ୍, ନିୟମ ଉଲଂଘନ କରିଥିବା ନେଇ ହେଲା ଅଭିଯୋଗ – Utkal Mail
ମୁମ୍ବାଇ: ରିୟାଲିଟି ସୋ’ ‘ବିଗ୍ ବସ୍ ୧୭’ ଅନେକ ନୂଆ ଟ୍ବିଷ୍ଟ ସହିତ ଆରମ୍ଭ ହୋଇଛି। ପ୍ରତ୍ୟେକ ଥର ପରି, ଏଥର ପୁନର୍ବାର ଏହାର ବିଷୟବସ୍ତୁ ପାଇଁ ଚର୍ଚ୍ଚାରେ ରହିଛି ଏହି ସୋ’। ଏଥର ସଲମାନ ଖାନ ତାଙ୍କ ସୋ’ରେ ବିଭିନ୍ନ କ୍ଷେତ୍ରର ସେଲିବ୍ରିଟିମାନଙ୍କୁ ଆଣିଛନ୍ତି।ଶାହରୁଖ ଖାନଙ୍କ ପୁଅ ଆରୟନ୍ ଖାନଙ୍କ ଓକିଲ ସନା ରଇସ୍ ଖାନ୍ ମଧ୍ୟ ଏହି ସୋ’ର ପ୍ରତିଯୋଗୀ ଭାବେ ସାମିଲ ହୋଇଛନ୍ତି। କିନ୍ତୁ ଏବେ ଲାଗୁଛି ଯେ ସଲମାନ ଖାନଙ୍କ ସୋ’କୁ ଆସିବା ତାଙ୍କ ପାଇଁ ମହଙ୍ଗା ପଡିଛି।
ରିୟାଲିଟି ସୋ’କୁ ଆସିବା ପରେ ତାଙ୍କ ବିରୋଧରେ ଅଭିଯୋଗ ହୋଇଛି । ସନା ବାର୍ କାଉନସିଲର ନିୟମ ଉଲଂଘନ କରିଛନ୍ତି ବୋଲି କୁହାଯାଉଛି। ସନା ରଇସ୍ ଖାନ ବିଗ୍ ବସରେ ଭାଗ ନେବା ପରେ ସୋସିଆଲ ମିଡିଆରେ ଆଇନଜୀବୀ ଆଶୁତୋଷ ଆପତ୍ତି ଜଣାଇଛନ୍ତି। ଏକ ପୋଷ୍ଟ ସେୟାର କରି ସେ ଲେଖିଛନ୍ତି ଯେ, ମୁଁ ବାର୍ କାଉନସିଲ୍ ଅଫ୍ ଇଣ୍ଡିଆକୁ ସୂଚନା ଦେଇସାରିଛି ଯେ ସନା ରଇସ୍ ଖାନ ନିୟମ ଉଲଂଘନ କରି ବିଗ୍ ବସରେ ପ୍ରତିଯୋଗୀ ଭାବରେ ଅଂଶଗ୍ରହଣ କରିଛନ୍ତି। ବାର୍ କାଉନସିଲ୍ ଅଫ୍ ଇଣ୍ଡିଆର ନିୟମ ୪୭ରୁ ୫୨ଅନୁଯାୟୀ କୌଣସି ଆଇନଜୀବୀ ଅନ୍ୟ ଉପାୟରେ ଟଙ୍କା ରୋଜଗାର କରିପାରିବେ ନାହିଁ। କେବଳ ଏତିକି ନୁହେଁ, ୧୯୬୧ର ବିଭାଗ ଅଧୀନରେ, ଅଭ୍ୟାସ କରୁଥିବା ଆଇନଜୀବୀମାନଙ୍କୁ ଅନ୍ୟ କୌଣସି କ୍ଷେତ୍ରରେ ପୂର୍ଣ୍ଣକାଳୀନ ଚାକିରିରୁ ବାରଣ କରାଯାଇଛି ।
