ସମ୍ପ୍ରତି ଇସ୍ରାଏଲ୍ ଓ ପାଲେଷ୍ଟାଇନ୍ ମଧ୍ୟରେ ଘମାଘୋଟ ଯୁଦ୍ଧ ଚାଲିଛି। ସେଇ ବିବାଦ ସଂକ୍ରାନ୍ତରେ ପୂର୍ବତନ ଅଶଡ଼ ଫିଲ୍ମ ଅଭିନେତ୍ରୀ ମିଆ ଖଲିଫା ତାଙ୍କର ଏକ୍ସ (ପୂର୍ବର ଟ୍ବିଟର) ପୃଷ୍ଠାରେ ଦେଇଥିବା ମନ୍ତବ୍ୟ ପାଇଁ ବିବାଦରେ ଫସିଯାଇଛନ୍ତି। ତାଙ୍କର ଟିପ୍ପଣୀ ଯୋଗୁଁ ସେ ଏକ ଲୋଭନୀୟ ବ୍ୟାବସାୟିକ ଚୁକ୍ତିରୁ ବିଦା ହୋଇଛନ୍ତି। ଅନେକ ସମୟରେ ଅନ୍ଲାଇନ୍ ଟ୍ରୋଲିଂର ସମ୍ମୁଖୀନ ହୋଇ ସୁଦ୍ଧା ନିଜର ସ୍ପଷ୍ଟବାଦିତା ପାଇଁ ମିଆ ବେଶ୍ ଜଣାଶୁଣା। ସେ ନିକଟରେ ଇସ୍ରାଏଲ୍-ପାଲେଷ୍ଟାଇନ୍ ଯୁଦ୍ଧ ବାବଦରେ କେତେକ ଦୁଃସାହସିକ ମନ୍ତବ୍ୟ ପ୍ରକାଶ କରିଥିଲେ ଯାହା ଲୋକଙ୍କ ମଧ୍ୟରେ ବିବାଦ ସୃଷ୍ଟି କରିଛି। ସେ ପାଲେଷ୍ଟାଇନ୍କୁ ସମର୍ଥନ କରୁଛନ୍ତି ବୋଲି ଖୋଲାଖୋଲି ଭାବେ ଘୋଷଣା କରିବା ସହ ନିଜର ଆଭିମୁଖ୍ୟ ଜାହିର କରିବା ଲାଗି ସେ ଆନୁଷଙ୍ଗିକ ପୋଷ୍ଟ ମଧ୍ୟ ଛାଡ଼ି ଚାଲିଛନ୍ତି।
ଗତ ଶନିବାର ଏକ ପୋଷ୍ଟ୍ରେ ସେ ଜୋର୍ ଦେଇ କହିଛନ୍ତି ଯେ ପାଲେଷ୍ଟାଇନ୍କୁ ସମର୍ଥନ ନକରିବାର ଅର୍ଥ ହେଉଛି ‘ଭୁଲ୍’ ପକ୍ଷକୁ ସମର୍ଥନ କରିବା। ଏହି ନିର୍ଦ୍ଦିଷ୍ଟ ପୋଷ୍ଟ୍ଟି ତାଙ୍କର ନିଯୁକ୍ତିଦାତା କାନାଡ଼ାର ଉଦ୍ୟୋଗୀ ଟଡ୍ ସାପିରୋଙ୍କୁ କ୍ଷୁବ୍ଧ କରିଛି। ଫଳରେ ସେ ମିଆଙ୍କ ରେଡ୍ ଲାଇଟ୍ ହଲାଣ୍ଡ୍ କର୍ପୋରେସନ୍ରେ କାମ କରିବାର ଚୁକ୍ତିକୁ ରଦ୍ଦ କରିଦେଇଛନ୍ତି। ସୂଚନାଯୋଗ୍ୟ, ଗତ ଏପ୍ରିଲ ୨୫ରେ ଉକ୍ତ କମ୍ପାନି ମିଆ ଖଲିଫାଙ୍କ ସହ ନିଜର ଭାଗୀଦାରିତା ବିଷୟରେ ଘୋଷଣା କରିଥିଲା, ଯାହା ଅନ୍ତର୍ଗତ ସେ କମ୍ପାନିର କର୍ପୋରେଟ୍ ସାମାଜିକ ଦାୟିତ୍ବବୋଧର ନେତୃତ୍ବ ନେବା ସହ ସାମାଜିକ ନ୍ୟାୟ ସମ୍ବନ୍ଧୀୟ ପ୍ରସଙ୍ଗ ଉପରେ ଗୁରୁତ୍ବାରୋପ କରି ନିଜର ଆଭିମୁଖ୍ୟ ରଖୁଥିଲେ।
