ଆମେରିକାର ମିନେସୋଟା ଅନ୍ତର୍ଗତ ଏଡିନାରେ ରହୁଥିବା ଜଣେ ବେଲି ଡ୍ୟାନ୍ସର୍ ମାତ୍ର ଗୋଟିଏ ମିନିଟ୍ ସମୟ ଭିତରେ ନିଜ ଶରୀରରେ ସର୍ବାଧିକ ସଂଖ୍ୟକ ଖଣ୍ଡା ସନ୍ତୁଳନ କରି ରଖିବାର ଏକ ବିଶ୍ବ ରେକର୍ଡ ହାସଲ କରିଛନ୍ତି। ଏରିନା ନାମ୍ନୀ ଏହି ନୃତ୍ୟାଙ୍ଗନା ଜଣକ ଏପରି ବିପଜ୍ଜନକ ପ୍ରୟାସ କରିବା ପଛରେ ଏକ ନିର୍ଦ୍ଦିଷ୍ଟ କାରଣ ରହିଛି। ୨୦୦୪ ବେଳେ ସେ ମଧ୍ୟ-ପ୍ରାଚୀୟ ନୃତ୍ୟଶିକ୍ଷା ଆରମ୍ଭ କଲା ବେଳେ କୌତୂହଳବଶତଃ ଶରୀରରେ ଖଣ୍ଡା ସନ୍ତୁଳନ କରି ରଖିବା ଅଭ୍ୟାସ କରିଥିଲେ।
ସେ ପ୍ରଥମେ ଗୋଟେ କି ଦୁଇଟି ତରବାରି ରଖିବାର ପ୍ରୟାସ କଲା ବେଳେ ସେଗୁଡ଼ିକ ସାଧାରଣତଃ ମୁଣ୍ଡ ଉପରେ ରଖୁଥିଲେ। ମାତ୍ର ତାହା ବି କଷ୍ଟକର ଥିଲା, କାରଣ ଜଣେ ନୃତ୍ୟଶିଳ୍ପୀକୁ ନିଜର ଶରୀରର ଗତିବିଧି ସହ ନୃତ୍ୟକଳା ପ୍ରଦର୍ଶନ କରିବାକୁ ପଡ଼ିଥାଏ। ଅପରପକ୍ଷେ, ଦର୍ଶକମାନେ ଭାବନ୍ତି ଯେ ନୃତ୍ୟଶିଳ୍ପୀ ମୁଣ୍ଡରେ ଏକ ଚୁମ୍ବକ ରଖି ଖଣ୍ଡାଗୁଡ଼ିକୁ ଟାଣି ରଖି ପାରୁଛନ୍ତି। କିନ୍ତୁ ଅନେକ ସମୟରେ ନୃତ୍ୟ ପ୍ରଦର୍ଶନ ବେଳେ ତାଙ୍କ ମୁଣ୍ଡରୁ ଖଣ୍ଡା ଖସି ପଡ଼ିଥାଏ। ତେବେ ତରବାରିଗୁଡ଼ିକୁ ଖସିବାକୁ ନଦେବା ଲାଗି ନିଜ ତ୍ବଚାକୁ କିପରି ଶୁଷ୍କ ରଖିବା ସହ ମାଂସପେଶୀକୁ ଦୃଢ଼ ରଖିବାକୁ ହେବ, ସେହି କୌଶଳକୁ ସେ ଆୟତ୍ତ କରିଥିଲେ। ଶରୀରରେ ୩୦ଟି ତରବାରି ସନ୍ତୁଳିତ କରି ରଖିବାକୁ ଲକ୍ଷ୍ୟ ରଖି ସେ ଅଭ୍ୟାସ ଜାରି ରଖିଥିଲେ ଏବଂ ସେଥିରେ ସଫଳ ହୋଇଥିଲେ।
ତେବେ ନିଜ ନିତମ୍ବ ଉପରେ ଖଣ୍ଡା ସନ୍ତୁଳିତ ରଖିବା ହିଁ ସବୁଠୁ କଷ୍ଟକର ଥିଲା ବୋଲି ଏରିନ୍ କହିଛନ୍ତି। ଅବଶ୍ୟ, ତରବାରିଗୁଡ଼ିକ ଯୁଦ୍ଧ କରିବା ଖଣ୍ଡା ପରି ଧାରୁଆ ନୁହେଁ ବୋଲି ସେ ସ୍ବୀକାର କରିଛନ୍ତି। ତଥାପି ଅଭ୍ୟାସ ବେଳେ ତରବାରି ଯୋଗୁଁ ସୃଷ୍ଟି ହୋଇଥିବା କ୍ଷତର ଅନେକ ଦାଗ ତାଙ୍କ ଦେହରେ ରହିଛି।
