ମୁମ୍ବାଇ: ବନ୍ଧୁକ ଦେଖାଇ ଅଭିନେତ୍ରୀଙ୍କୁ ଲୁଟିଲେ ଗୃହ ସହାୟକ। ବଲିଉଡ ଅଭିନେତ୍ରୀ ନିକିତା ରାୱଲଙ୍କ ସହ ଘଟିଛି ଏଭଳି ଘଟଣା। ୨ଦିନ ତଳେ ତାଙ୍କ ସହ ଏଭଳି ଘଟିଥିବା ବେଳେ ଏବେ ତାହା ସାମ୍ନାକୁ ଆସିଛି। ଦୁଇ ଦିନ ପୂର୍ବେ ନିକିତାଙ୍କ ଗୃହ ସହାୟକ ବନ୍ଧୁକ ମୁନରେ ଡରାଇ ତାଙ୍କ ଘରୁ କିଛି ଟଙ୍କା ଓ ଅଳଙ୍କାର ଚୋରି କରି ନେଇଥିଲେ। ଏହି ଘଟଣା ଘଟିବା ପରେ ନିକିତା ତୁରନ୍ତ ଓଶିୱାରା ପୁଲିସ ଷ୍ଟେସନକୁ ଯାଇ ଏ ସମ୍ପର୍କରେ ଅଭିଯୋଗ କରିଥିଲେ।
ଜାତୀୟ ଗଣମାଧ୍ୟମକୁ ସାକ୍ଷାତକାର ଦେଇ ନିକିତା କହିଛନ୍ତି, ଚାରି-ପାଞ୍ଚ ମାସ ପୂର୍ବେ ମୁଁ ମୋ ଘରେ ଜଣେ ଗୃହ ସହାୟକଙ୍କ ନିଯୁକ୍ତି ଦେଇଥିଲି। ପିଲାଟି ଭଲ ବୋଲି ଜଣାପଡ଼ୁଥିଲା ଓ ତା’ର ବ୍ୟବହାର ବି ଭଲ ଥିଲା। ସେ କାମ କରିବା ଆରମ୍ଭ କରିବା ପରେ ଚାରି-ପାଞ୍ଚ ମାସ ମଧ୍ୟରେ ମୋ ଘରୁ ଅନେକ ଜିନିଷ ଗାଏବ ହେବାକୁ ଲାଗିଲା। ଥରେ ମୁଁ ଦେଖିଲି ମୋ ବ୍ୟାଗରୁ ପାଞ୍ଚ ହଜାର ଟଙ୍କା ବାହାର କରାଯାଇଛି। ମୁଁ ଏବିଷୟରେ ତାଙ୍କୁ ପଚାରିବା ପରେ ସେ ପ୍ରଥମେ ମନା କରିଥିଲେ। ପରେ ପୁଲିସର ଧମକ ଦେଇ ପଚାରିବାରୁ ସେ ନିଜ ବାପାଙ୍କୁ ଫୋନ କରି ଡାକିଥିଲେ। ତାଙ୍କ ବାପା ଆସିବା ପରେ ଦୁହେଁ ମୋତେ ଧମକାଇବା ଆରମ୍ଭ କଲେ। ଏହା ପରେ ଦୁହେଁ ବନ୍ଧୁକ ଦେଖାଇ ଘରେ ଥିବା ଅଳଙ୍କାର ଚୋରି କରି ନେଇଥିଲେ। ଜୀବନ ବଞ୍ଚାଇବାକୁ ଯାଉ ମୁଁ କିଛି କହିନଥିଲି। ହେଲେ ସେମାନେ ଘରୁ ଯିବା ପରେ ମୁଁ ପୁଲିସରେ ଅଭିଯୋଗ କରିଛି।
