ହସ୍ପିଟାଲରେ ଛାଡ଼ି ଚାଲିଗଲା ପୁଅ, ପୁଲିସବାବୁଙ୍କ କାନ୍ଧରେ ଶ୍ମଶାନ ଗଲେ ବୃଦ୍ଧା ମା’ – Utkal Mail
ନୂଆଦିଲ୍ଲୀ: ଅଭିଭାବକମାନେ ନିଜ ପିଲାମାନଙ୍କୁ ମଣିଷ କରିବା ପାଇଁ କଠିନ ପରିଶ୍ରମ କରିଥାଆନ୍ତି। ନିଜେ ଭୋକରେ ରହି ପିଲାକୁ ଖୁଆଇଥାଆନ୍ତି, ନିଜେ କଷ୍ଟ ସହି ପିଲାକୁ ସୁରକ୍ଷିତ ରଖିଥାଆନ୍ତି। କୁହାଯାଏ ମଲା ଯାଏଁ ବାପା ଓ ମା’ଙ୍କ ଋଣ ଶୁଝି ହୋଇ ନଥାଏ। ତେଣୁ ବାପା ଓ ମା’ଙ୍କୁ ଖୁସି କରିବାକୁ ହେଲେ ବୃଦ୍ଧା ଅବସ୍ଥାରେ ପିଲାମାନେ ଯଦି ତାଙ୍କ ଯତ୍ନ ନିଅନ୍ତି ତାଙ୍କ କଥା ବୁଛନ୍ତି ବାପା ଓ ମା’ଙ୍କୁ ତାହା ଖୁସି ଲାଗିଥାଏ।
ଏମିତି ଅନେକ ପିଲା ଅଛନ୍ତି ଯେଉଁମାନେ ବଡ଼ ହେବାପରେ ବାପା ଓ ମା’ଙ୍କ ଦାୟିତ୍ବ ନିଜ କାନ୍ଧକୁ ଖୁସିଖୁସିରେ ନେଇଥାଆନ୍ତି। କିନ୍ତୁ ଏମିତି ବି କିଛି ପିଲା ଅଛନ୍ତି ଯେଉଁମାନେ ବୃଦ୍ଧ ବାପା ଓ ମା’ଙ୍କୁ ନିର୍ଯାତନା ଦେବା ସହିତ ଏକା ଛାଡ଼ି ଚାଲି ଯାଇଥାଆନ୍ତି।
ନିକଟରେ ଉତ୍ତରପ୍ରଦେଶର ରାଜଧାନୀ ଲକ୍ଷ୍ମୌରେ ଏମିତି ଏକ ଦୁଃଖଦ ଘଟଣା ଘଟିଛି। ରାଜେଶ ସାହୁ ନାମକ ଜଣେ ବ୍ୟକ୍ତି ତାଙ୍କ ବୃଦ୍ଧ ମା’ଙ୍କ ମୃତଦେହକୁ ସହରର ଲୋକବନ୍ଧୁ ଡାକ୍ତରଖାନାରେ ଅବହେଳିତ ଅବସ୍ଥାରେ ଛାଡ଼ି ଚାଲି ଯାଇଥିଲେ। ଏହି ବୃଦ୍ଧା ମହିଳାଙ୍କ ନାମ ମେନୁ ଓ ବୟସ ୬୫ବର୍ଷ ବୋଲି ଜଣାପଡ଼ିଛି।
ମଧୁମେହର ଶିକାର ହେବା ହେତୁ ମେନୁଙ୍କୁ ଚିକିତ୍ସା ପାଇଁ ହସ୍ପିଟାଲରେ ଭର୍ତ୍ତି କରାଯାଇଥିଲା। ଚିକିତ୍ସାଧୀନ ଅବସ୍ଥାରେ ଅକ୍ଟୋବର ୧୪ରେ ତାଙ୍କର ମୃତ୍ୟୁ ହୋଇଯାଇଥିବା ଚିକିତ୍ସା କରୁଥିବା ଡାକ୍ତର ସୂଚନା ଦେଇଥିଲେ।
ଡାକ୍ତରଙ୍କ ଠାରୁ ମା’ଙ୍କ ମୃତ୍ୟୁ ଖବର ଶୁଣି ପୁଅ ଘଟଣାସ୍ଥଳରୁ ଚମ୍ପଟ ମାରିଥିଲା। ତିନିଦିନ ଧରି ହସ୍ପିଟାଲରେ ବୃଦ୍ଧା ପଡ଼ିରହିଥିଲେ ହେଁ ତାଙ୍କୁ ନେବା ପାଇଁ ତାଙ୍କର କୌଣସି ସମ୍ପର୍କୀୟ ଆସି ନଥିଲେ। ଶେଷରେ ଉତ୍ତରପ୍ରଦେଶର କୃଷ୍ଣନଗର ପୁଲିସ ଦାୟିତ୍ୱରେ ଥିବା ବିକ୍ରମ ସିଂ, ସବ୍-ଇନ୍ସପେକ୍ଟର ଅଜୟ କୁମାର, ନୀରଜ ଦ୍ୱିବେଦୀ, ଶୈଳେନ୍ଦ୍ର ସିଂହ ଏବଂ କନଷ୍ଟେବଳ ଅଜୟ କୁମାରଙ୍କ ସହଯୋଗରେ ବୃଦ୍ଧଙ୍କ ଅନ୍ତିମ ସଂସ୍କାର କରାଯାଇଥିଲା । ପୁଲିସବାବୁମାନେ କାନ୍ଧରେ ବୃଦ୍ଧଙ୍କୁ ନେଇ ଅନ୍ତିମ ସଂସ୍କାର କରିଥିଲେ। ଲୋକେ ପୁଲିସବାବୁମାନଙ୍କ ଏଭଳି କାମକୁ ଦେଖି ଭୁରିଭୁରି ପ୍ରଶଂସା କରିଛନ୍ତି।
