ତାଳଚେର : ମହିଳାଙ୍କ ବେକରୁ ସୁନା ଚେନ ଝାମ୍ପି ନେଲେ ଦୁର୍ବୃତ୍ତ । ସକାଳୁ ଘର ବାହାରକୁ ଅଳିଆ ପକାଇବାକୁ ଯାଇଥିବା ବେଳେ ବାଇକରେ ଆସି ମହିଳାଙ୍କ ବେକରୁ ଝାମ୍ପିନେଲେ ସୁନା ଚେନ । ଲୁଟ୍ ବେଳର ଚିତ୍ର ସିସିଟିଭିରେ କଏଦ ହୋଇଛି । ତାଳଚେର ବାଘୁଆବୋଲ ଅଞ୍ଚଳରୁ ଏଭଳି ଚିତ୍ର ସାମ୍ନାକୁ ଆସିଛି ।
ସୂଚନା ଅନୁସାରେ ବାଘୁଆବୋଲ ଅଞ୍ଚଳର ଅରୁନ୍ଧତୀ ମହାନ୍ତି ସକାଳୁ ନିଜ ଘରର ଅଳିଆ ପକାଇବାକୁ ବାହାରକୁ ଯାଇଥିବା ସମୟରେ ଦୁଇ ଜଣ ଦୁର୍ବୃତ୍ତ ବାଇକରେ ଆସି ମହିଳାଙ୍କୁ ଠିକଣା ପଚାରି ସୁନା ଚେନ ଝାମ୍ପି ନେଇଥିଲେ । ପରେ ମହିଳା ଜଣକ ପାଟି କରିବାରୁ ଘରୁ ସମସ୍ତେ ବାହାରକୁ ବାହାରି ଆସିଥିଲେ । କିଛି ସମୟ ପରେ ସିସିଟିଭିକୁ ଯାଞ୍ଚକରି ପରିବାର ଲୋକ ଦୁଇ ଦୁର୍ବୃତ୍ତଙ୍କୁ ତାଳଚେର ଡେରା ଠାରେ ଠାବ କରି ପୋଲିସକୁ ଖବର ଦେଇଥିଲେ । ତାଳଚେର ପୋଲିସ ଆସି ଉଭୟଙ୍କୁ କାବୁ କରିବା ସହ ଘଟଣାରରେ ଏକ ବଡ଼ ଧରଣର ରାକେଟ କାମ କରୁଥିବା ଜାଣି ଘଟଣାର ଅଧିକ ତଦନ୍ତ ଜାରି ରଖିଛି ।
