ଭାରତକୁ ଲଢୁଆ ବିମାନ ଇଂଜିନ ଟେକନଲୋଜୀ ପ୍ରଦାନ ସମ୍ପର୍କରେ ଘୋଷଣା କଲା ବାଇଡେନ ପ୍ରଶାସନ – Utkal Mail

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଆମେରିକା ଗସ୍ତ ସମୟରେ ବାଇଡେନ ପ୍ରଶାସନ ଭାରତ ସହ ଜେଟ୍ ଇଞ୍ଜିନ୍ ଟେକ୍ନୋଲୋଜି ବାଣ୍ଟିବା ପାଇଁ ଏକ ଐତିହାସିକ ଚୁକ୍ତି ସ୍ୱାକ୍ଷର କରିଥିଲା। ଏହି କ୍ରମରେ ଗୁରୁବାର ଏକ ବଡ ସୂଚନା ସାମ୍ନାକୁ ଆସିଛି । ଆମେରିକା ର ବୈଦେଶିକ ବିଭାଗ ଭାରତକୁ  ଟେକ୍ନୋଲୋଜି ହସ୍ତାନ୍ତର ବିଷୟରେ ଆମେରିକୀୟ ସଂସଦକୁ ସୂଚନା ଦେଇଛନ୍ତି । ହିନ୍ଦୁସ୍ତାନ ଏରୋନୋଟିକ୍ସ ଲିମିଟେଡ୍ (ହାଲ୍ ) ଦ୍ୱାରା ଉତ୍ପାଦିତ ହେବାକୁ ଥିବା ଏଲସିଏ ମାର୍କ-୨ ବିମାନ ପାଇଁ ଏହି ଟେକ୍ନୋଲୋଜି ଭାରତକୁ ଦିଆଯିବ ଏବଂ ଏହା ପରେ ଏହି ଆଧୁନିକ ଜ୍ଞାନକୌଶଳ ମାଧ୍ୟମରେ ଜିଇ-ଏଫ୍ ୪୧୪ ଜେଟ୍ ଇଞ୍ଜିନ ଭାରତରେ ତିଆରି ହେବ ବୋଲି କୁହାଯାଇଛି।

ଗଣମାଧ୍ୟମ ରିପୋର୍ଟ ଅନୁଯାୟୀ, ଜୋ ବାଇଡେନ୍ ଙ୍କ ପ୍ରଶାସନ ସମୟରେ ଜୁଲାଇ ୨୮ରେ ଆମେରିକୀୟ କଂଗ୍ରେସକୁ ଏହି ଅଧିସୂଚନା ପଠାଯାଇଥିଲା। ନିୟମ ଅନୁଯାୟୀ ୩୦ ଦିନ ପରେ ଭାରତକୁ ଟେକ୍ନୋଲୋଜି ହସ୍ତାନ୍ତର ଚୁକ୍ତିକୁ ଅନୁମୋଦନ ମିଳିବ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ତିନି ଦିନିଆ ଆମେରିକା ଗସ୍ତ ସମୟରେ ଜୁନ୍ ୨୨ ରେ ଆମେରିକାର ଜିଇ ଏବଂ ଭାରତର ହାଲ୍ ମଧ୍ୟରେ ଏହି ଚୁକ୍ତି ସ୍ୱାକ୍ଷରିତ ହୋଇଥିଲା। ଆମେରିକା କଂଗ୍ରେସରେ ଏହି ପ୍ରସ୍ତାବରେ କୌଣସି ବାଧା ସୃଷ୍ଟି ହେବାର ସମ୍ଭାବନା ନାହିଁ। ଆମେରିକାର ଜାତୀୟ ନିରାପତ୍ତା ସ୍ବାର୍ଥ ଦୃଷ୍ଟିରୁ ସେଠାକାର ସମସ୍ତ ଦଳ ଏହା ସପକ୍ଷରେ ଅଛନ୍ତି। ଏହି ଇଂଜିନର ଟେକନଲୋଜୀ ଆସିବା ପରେ ଭାରତରେ ନିର୍ମିତ ଲଢୁଆ ବିମାନ ଏଲସିଏ ଆହୁରି ସକ୍ଷମ ହୋଇପାରିବ ।