ବିଶ୍ବାସ ଅଛି ଫେରିଆସିବ: ଶକ୍ତିକାନ୍ତ
ନୂଆଦିଲ୍ଲୀ: ଭାରତୀୟ ରିଜର୍ଭ ବ୍ୟାଙ୍କ ପକ୍ଷରୁ ୨୦୦୦ ଟଙ୍କିଆ ନୋଟ୍ ପ୍ରତ୍ୟାହାର ବିଷୟରେ ଚଳିତ ବର୍ଷ ମେ’ ୧୯ରେ ଘୋଷଣା କରାଯାଇଥିଲା। ସେହି ସମୟରେ ବଜାରରେ ସାଢ଼େ ତିନି ଲକ୍ଷ କୋଟି ଟଙ୍କାରୁ ଅଧିକ ୨୦୦୦ ଟଙ୍କିଆ ଥିଲା। ନୋଟ୍ଗୁଡ଼ିକୁ ଫେରାଇବା ଲାଗି ଲୋକମାନଙ୍କୁ ଦୁଇଟି ପର୍ଯ୍ୟାୟରେ ଅକ୍ଟୋବର ୭ ପର୍ଯ୍ୟନ୍ତ ସମୟ ଦିଆଯାଇଥିଲା। ସମୟ ସୀମା ଶେଷ ହୋଇଯାଇଥିଲେ ମଧ୍ୟ ୧୦ ହଜାର କୋଟି ଟଙ୍କାର ୨୦୦୦ ଟଙ୍କିଆ ଫେରିନାହିଁ। ଆଜି ଭାରତୀୟ ରିଜର୍ଭ ବ୍ୟାଙ୍କର ଗଭର୍ଣ୍ଣର ଶକ୍ତିକାନ୍ତ ଦାସ ଏହି ସୂଚନା ଦେଇଛନ୍ତି। ତେବେ ସେହି ନୋଟ୍ଗୁଡ଼ିକ ଫେରିଆସିବ ବୋଲି ବିଶ୍ବାସ ଥିବା ଶକ୍ତିକାନ୍ତ କହିଛନ୍ତି। ତେବେ ସେହି ୧୦ ହଜାର କୋଟି ଟଙ୍କାର ୨୦୦୦ ଟଙ୍କିଆ ନୋଟ୍ କୁଆଡ଼େ ଗଲା ତାହାର ସୂଚନା କାହା ପାଖରେ ନାହିଁ। କିଏ ସେହି ନୋଟ୍ଗୁଡ଼ିକୁ ମହଜୁଦ ରଖିଛନ୍ତି କିମ୍ବା ଅନ୍ୟ କୌଣସି କାର୍ଯ୍ୟରେ ତାହାକୁ ବ୍ୟବହାର କରାଯାଇଛି ତାହା ସ୍ପଷ୍ଟ ହେଉନାହିଁ।
ନୋଟ୍ ଫେରାଇବା ସମୟ ସୀମା ଶେଷ ହୋଇଯାଇଥିଲେ ମଧ୍ୟ ସାରା ଦେଶରେ ଥିବା ରିଜର୍ଭ ବ୍ୟାଙ୍କର ଇସ୍ୟୁ କାର୍ଯ୍ୟାଳୟରେ ଲୋକମାନଙ୍କ ଲାଗି ୨୦୦୦ ଟଙ୍କିଆ ଫେରାଇବାର ବ୍ୟବସ୍ଥା କରାଯାଇଛି। ଜଣେ ବ୍ୟକ୍ତି ଗୋଟିଏ ଥରରେ ୨୦ ହଜାର ଟଙ୍କା ପର୍ଯ୍ୟନ୍ତ ୨୦୦୦ ଟଙ୍କିଆ ବଦଳାଇପାରିବେ। କିନ୍ତୁ ଖାତାରେ ଜମା କରିବାର କୌଣସି ସୀମା ଧାର୍ଯ୍ୟ କରାଯାଇନାହିଁ। ୨୦୧୬ ନଭେମ୍ବରରେ ପ୍ରଧାନମନ୍ତ୍ରୀ ପୁରୁଣା ୫୦୦ ଓ ୧୦୦୦ ଟଙ୍କିଆ ନୋଟ୍କୁ ଅଚଳ ଘୋଷଣା କରିବା ପରେ ବଜାରରେ ନୋଟ୍ର ଏକ ବିରାଟ ଶୂନ୍ୟସ୍ଥାନ ସୃଷ୍ଟି ହୋଇଥିଲା। ସେହିବର୍ଷ ୨୦୦୦ ଟଙ୍କିଆ ନୋଟ୍ ପ୍ରଥମ ଥର ପ୍ରଚଳନ କରାଯାଇଥିଲା। ୨୦୧୮ ପରେ ସେହି ନୋଟ୍ ଛପାଇବା ବନ୍ଦ କରିଦିଆଯାଇଥିଲା ଓ ପରେ ଏଟିଏମ୍ ଓ ବଜାରରୁ ମଧ୍ୟ ଉଭାନ ହୋଇଗଲା।
ସେହିଭଳି ଦୁଇ ହଜାର ଟଙ୍କିଆ ପ୍ରତ୍ୟାହାର ପରେ ବଜାରକୁ ପୁଣି ଥରେ ୧୦୦୦ ଟଙ୍କିଆ ନୋଟ୍ ଫେରିବ ବୋଲି କଳ୍ପନାଜଳ୍ପନା ପ୍ରକାଶ ପାଉଛି। ତେବେ ୧୦୦୦ ଟଙ୍କିଆକୁ ପୁଣି ଥରେ ଆଣିବା ଲାଗି ରିଜର୍ଭ ବ୍ୟାଙ୍କର କୌଣସି ଯୋଜନା ନଥିବା ଜଣାପଡ଼ିଛି। କିଛି ମାସ ପୂର୍ବେ ରିଜର୍ଭ ବ୍ୟାଙ୍କ ଗଭର୍ଣ୍ଣର ଶକ୍ତିକାନ୍ତ ଦାସ ମଧ୍ୟ ସ୍ପଷ୍ଟ କରିଥିଲେ ଯେ ୧୦୦୦ ଟଙ୍କିଆ ଫେରିବନି।
