୭୧ବର୍ଷ ବୟସରେ କମାଲ କଲେ ରଜନୀକାନ୍ତ, ୩ଦିନରେ ୨୦୦କୋଟି ଟଙ୍କା ଆୟ କଲା ଫିଲ୍ମ ‘ଜେଲର୍’ – Utkal Mail

ଚେନ୍ନାଇ: ଫିଲ୍ମ ଇଣ୍ଡଷ୍ଟ୍ରିର ଲୋକପ୍ରିୟ ଅଭିନେତାମାନଙ୍କ ମଧ୍ୟରୁ ଜଣେ ହେଲେ ରଜନୀକାନ୍ତ ଏବଂ ଏଥିରେ କୌଣସି ସନ୍ଦେହ ନାହିଁ। ନିଜର ଅଭିନୟ ବଳରେ ଅଭିନେତା ଆଜି କୋଟି କୋଟି ଲୋକଙ୍କ ହୃଦୟରେ ରାଜ୍ କରୁଛନ୍ତି। ଅଗଷ୍ଟ ୧୦ରେ ତାଙ୍କର ବହୁ ପ୍ରତୀକ୍ଷିତ ଚଳଚ୍ଚିତ୍ର ‘ଜେଲର’ ରିଲିଜ ହୋଇଥିବା ବେଳେ ଏବେ ଏହାକୁ ଦର୍ଶକଙ୍କ ଭଲପାଇବା ମିଲିଛି। ରିଲିଜ୍ ପରେ ବକ୍ସ ଅଫିସରେ ଧମାଲ କରୁଛି ରଜନୀକାନ୍ତଙ୍କ ଫିଲ୍ମ।

ଫିଲ୍ମଟି ଭାରତରେ ୧୦୮କୋଟି ଟଙ୍କା ଆୟ କରିଥିବା ବେଳେ ବିଶ୍ବ ବକ୍ସ ଅଫିସରେ ୨୦୦କୋଟିରୁ ଅଧିକ ଟଙ୍କା ଆୟ କରିଛି। ଗୁରୁବାର ଫିଲ୍ମ ରିଲିଜ୍ ହୋଇଥିବା ବେଳେ ପ୍ରଥମ ଦିନ ଫିଲ୍ମଟି ୪୮କୋଟି, ଶୁକ୍ରବାର ୨୫.୭୫କୋଟି ଟଙ୍କା, ଶନିବାର ୩୫କୋଟି ଟଙ୍କା ଆୟ କରିଥିଲା। ଏହାକୁ ମିଶାଇ ଫିଲ୍ମଟି ଭାରତରେ ମୋଟ ୧୦୮କୋଟି ଟଙ୍କା ଆୟ କରିଥିବା ବେଳେ ରବିବାର ଫିଲ୍ମର ଆୟ ଆହୁରି ବଢ଼ିବ ବୋଲି ଆଶା ରଖିଛନ୍ତି ନିର୍ମାତା। ଓଭରସିଜ୍ ମାର୍କେଟରେ ବି ଫିଲ୍ମଟି ଭଲ ଆୟ କରିଥିବାରୁ ରବିବାରର ଆୟ ମିଶାଇ ଫିଲ୍ମର ମୋଟ ଆୟ ୩୦୦କୋଟି ପାର କରିବ ବୋଲି କୁହାଯାଉଛି।

ତେବେ ରଜନୀକାନ୍ତଙ୍କ ପ୍ରଶଂସକଙ୍କ ସଂଖ୍ୟା ଦେଖି ଫିଲ୍ମ ରିଲିଜ୍ ଦିନ ତାମିଲନାଡୁର କିଛି କାର୍ଯ୍ୟାଳୟ ସେମାନଙ୍କ କର୍ମଚାରୀଙ୍କୁ ମାଗଣା ଟିକେଟ ବଣ୍ଟନ କରିଥିଲେ। ଏହା ସହ ଚେନ୍ନାଇ ଏବଂ ବେଙ୍ଗାଲୁରୁର କିଛି କାର୍ଯ୍ୟାଳୟ ‘ଜେଲର’ର ମୁକ୍ତିଲାଭ ଦିନରେ ଏହାର କର୍ମଚାରୀଙ୍କ ପାଇଁ ଛୁଟି ଘୋଷଣା କରିଥିଲା।