ଅଗରତାଲା: ମୁଖ୍ୟମନ୍ତ୍ରୀ ହେବା ପରେ ଜଣଙ୍କର ରାଜନୈତିକ ଜୀବନ ବ୍ୟତୀତ ଅନ୍ୟ ଦାୟିତ୍ୱ ପୂରଣ କରିବା ଅତ୍ୟନ୍ତ କଷ୍ଟକର ହୋଇପଡେ, କିନ୍ତୁ ତ୍ରିପୁରା ମୁଖ୍ୟମନ୍ତ୍ରୀ ମାଣିକ ସାହା ମଙ୍ଗଳବାର ସମସ୍ତଙ୍କୁ ଆଶ୍ଚର୍ଯ୍ୟ କରିଦେଇଛନ୍ତି। ବୃତ୍ତି ଅନୁଯାୟୀ ଡାକ୍ତର ଥିବା ମାଣିକ ସାହା ମଙ୍ଗଳବାର ଅପରେସନ୍ ଥିଏଟରରେ ସର୍ଜନ ଭାବରେ ଦାୟିତ୍ୱ ନିର୍ବାହ କରିଛନ୍ତି | ସେ ତ୍ରିପୁରା ମେଡିକାଲ କଲେଜ ଏବଂ ଡକ୍ଟର ବିଆରଏମ ହସପିଟାଲରେ ଏକ ଜଟିଳ ଅସ୍ତ୍ରୋପଚାର କରିଥିଲେ। ଅସ୍ତ୍ରୋପଚାର ପରେ ରୋଗୀଙ୍କ ଅବସ୍ଥା ଭଲ ଅଛି। ଯେତେବେଳେ ମୁଖ୍ୟମନ୍ତ୍ରୀଙ୍କୁ ଏ ବିଷୟରେ ପଚରାଗଲା, ସେ କହିଥିଲେ ଯେ ଏହା ମଧ୍ୟ ଏକ ଗୁରୁତ୍ୱପୂର୍ଣ୍ଣ କର୍ତ୍ତବ୍ୟ, ଯାହାକୁ ଅସ୍ୱୀକାର କରାଯାଇପାରିବ ନାହିଁ। ତେବେ ଅପରେସନ୍ ପାଇଁ ଖୋଦ ମୁଖ୍ୟମନ୍ତ୍ରୀ ଆସିବାକୁ ନେଇ ଚର୍ଚ୍ଚା ଜୋର ଧରିଛି | ବାସ୍ତବରେ ମାଣିକ ସାହା ମଙ୍ଗଳବାର ଦିନ ଆଫ୍ରନ ପିନ୍ଧି ଅପରେସନ କରିବା ପଛରେ ଆପଣଙ୍କୁ କନ୍ଦାଇଦେବା ଭଳି ଏକ କାହାଣୀ ରହିଛି। ସେ ଯେଉଁ ରୋଗୀଙ୍କର ଅପରେସନ୍ କରିଥିଲେ, ସେ ତାଙ୍କର ଜଣେ ପୂର୍ବତନ ଛାତ୍ର ଥିଲେ |
ବର୍ତ୍ତମାନ ଏମବିବିଏସ୍ ଡାକ୍ତର ଭାବରେ କାର୍ଯ୍ୟ କରୁଥିବା ଏହି ଛାତ୍ର ଦୁଇ ଚକିଆ ଯାନ ଚଳାଇବା ସମୟରେ ଏକ ଦୁର୍ଘଟଣାର ସମ୍ମୁଖୀନ ହୋଇଥିଲେ, ଯେଉଁଥିପାଇଁ ସେ ତାଙ୍କ ମୁଖ ହାଡର କିଛି ଅଂଶ ଭାଙ୍ଗିଯାଇଥିଲା | ଏହି ଛାତ୍ରଙ୍କ ଅପରେସନ୍ କରିବା ପାଇଁ ତ୍ରିପୁରାର ମୁଖ୍ୟମନ୍ତ୍ରୀ ତାଙ୍କ ବ୍ୟସ୍ତବହୁଳ କାର୍ଯ୍ୟସୂଚୀରୁ ସମୟ ବାହାର କରିଥିଲେ। ସେ ତାଙ୍କର ପୂର୍ବତନ ଛାତ୍ରର ଅସ୍ତ୍ରୋପଚାର କରିଥିଲେ, ଯାହାକି ସମ୍ପୂର୍ଣ୍ଣ ସଫଳ ହୋଇଥିଲା। ସାହା ତାଙ୍କ ଅପରେସନକୁ ନେଇ ଫେସବୁକ୍ ଏବଂ ଟ୍ୱିଟରରେ ସେୟାର କରିଛନ୍ତି। ଅସ୍ତ୍ରୋପଚାର ସମୟରେ କ୍ଲିକ୍ ହୋଇଥିବା ଫଟୋ ସେ ପୋଷ୍ଟ କରିଥିଲେ। ଉଲ୍ଲେଖ ଥାଉ କି ତ୍ରିପୁରା ମୁଖ୍ୟମନ୍ତ୍ରୀ ମାଣିକ ସାହା ପ୍ରକୃତରେ ବୃତ୍ତି ଅନୁଯାୟୀ ଜଣେ ଡାକ୍ତର। ସେ ଜଣେ ଓରାଲ୍ ଆଣ୍ଡ ମ୍ୟାକ୍ସିଲୋ-ଫେସିଆଲ୍ ସର୍ଜନ ଏବଂ ମୁଖ୍ୟମନ୍ତ୍ରୀ ହେବା ପୂର୍ବରୁ ତ୍ରିପୁରା ମେଡିକାଲ୍ କଲେଜରେ ପାଠ ପଢ଼ାଉଥିଲେ । ବୃତ୍ତି ଅନୁଯାୟୀ ଦନ୍ତ ଚିକିତ୍ସକ ଥିବା ସାହା କଂଗ୍ରେସରେ ଯୋଗଦେବା ପରେ ତ୍ରିପୁରା କ୍ରିକେଟ୍ ଆସୋସିଏସନର ସଭାପତି ମଧ୍ୟ ଥିଲେ | ୨୦୧୬ରେ ସେ କଂଗ୍ରେସ ଛାଡି ବିଜେପିରେ ଯୋଗ ଦେଇଥିଲେ। ବିଜେପି ତାଙ୍କୁ ପ୍ରଥମେ ନିର୍ବାଚନ ଦାୟିତ୍ୱ ଦେଇଥିଲା | ୨୦୨୦ରେ ମାଣିକଙ୍କୁ ବିଜେପି ରାଜ୍ୟ ସଭାପତି କରାଯାଇଥିଲା | ୨୦୨୩ ନିର୍ବାଚନ ପୂର୍ବରୁ ସାହାଙ୍କୁ ବିପ୍ଲବ ଦେବଙ୍କ ସ୍ଥାନରେ ମୁଖ୍ୟମନ୍ତ୍ରୀ କରାଯାଇଥିଲା। ସାହାଙ୍କ ନେତୃତ୍ୱରେ ଦଳ ଦ୍ୱିତୀୟ ଥର ପାଇଁ ସରକାର ଗଠନ କରିବାରେ ସଫଳ ହୋଇଥିଲା।
