ନୂଆଦିଲ୍ଲୀ: ଦିଲ୍ଲୀର ଉପମୁଖ୍ୟମନ୍ତ୍ରୀ ମନୀଷ ସିସୋଦିଆ ବିଜେପି ବିରୋଧରେ ସାଂଘାତିକ ଅଭିଯୋଗ ଆଣିଛନ୍ତି । ଗୁଜରାଟ ଓ ଏମସିଡି ନିର୍ବାଚନରେ ପରାଜୟ ଭୟରେ ବିଜେପି ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କୁ ହତ୍ୟା କରିବା ପାଇଁ ଷଡଯନ୍ତ୍ର କରୁଛି ବୋଲି ସେ ଦାବି କରିଛନ୍ତି । ବିଜେପି ସାଂସଦ ମନୋଜ ତିୱାରୀ ଏଥିରେ ସମ୍ପୃକ୍ତ ଅଛନ୍ତି । କିନ୍ତୁ ଆମ୍ ଆଦମୀ ପାର୍ଟି (ଆପ୍) ହୀନ ରାଜନୀତିକୁ ଭୟ କରୁନାହିଁ ବୋଲି ସିସୋଦିଆ କହିଛନ୍ତି ।
ସୂଚନାନୁସାରେ, ଦିଲ୍ଲୀର ଉପରାଜ୍ୟପାଳ ଭିକେ ସକ୍ସେନା ସିସୋଦିଆଙ୍କ ଅଭିଯୋଗ ଉପରେ ନିଜ ଆଡୁ ହସ୍ତକ୍ଷେପ କରିବାକୁ ପୋଲିସ କମିଶନରଙ୍କୁ ନିର୍ଦ୍ଦେଶ ଦେଇଛନ୍ତି।
ସୂତ୍ରରୁ ପ୍ରକାଶ ଯେ ଉପରାଜ୍ୟପାଳ ଉପମୁଖ୍ୟମନ୍ତ୍ରୀ ମନୀଷ ସିସୋଦିଆଙ୍କ ସମେତ ଆପ୍ ନେତାଙ୍କ ଟ୍ୱିଟ୍ ଏବଂ ବିବୃତ୍ତି ଉପରେ ଧ୍ୟାନ ଦେଇଛନ୍ତି । ଏପରି ଘଟଣାର ଯେପରି ପୁନରାବୃତ୍ତି ନହୁଏ ସେଥିପାଇଁ ପଦକ୍ଷେପ ନେବାକୁ ସେ ପୋଲିସ କମିଶନରଙ୍କୁ କହିଛନ୍ତି।
ସିସୋଦିଆ ଟ୍ୱିଟ୍ କରି କହିଛନ୍ତି ଯେ ଗୁଜରାଟ ଏବଂ ଏମସିଡି ନିର୍ବାଚନରେ ପରାଜୟ ଭୟରେ ବିଜେପି ଅରବିନ୍ଦ କେଜ୍ରିୱାଲଙ୍କ ହତ୍ୟା ଷଡ଼ଯନ୍ତ୍ର କରୁଛି। ବିଜେପି ସାଂସଦ ମନୋଜ ତିୱାରୀ ଖୋଲାଖୋଲି ଅରବିନ୍ଦ ଜୀଙ୍କୁ ଆକ୍ରମଣ କରିବାକୁ କହୁଛନ୍ତି ଏବଂ ଏନେଇ ପୂରା ପ୍ଲାନିଂ କରୁଛନ୍ତି। ଆପ୍ ସେମାନଙ୍କର ହୀନ ରାଜନୀତିକୁ ଭୟ କରୁନାହିଁ । ଲୋକେ ବର୍ତ୍ତମାନ ସେମାନଙ୍କ ଗୁଣ୍ଡାଗର୍ଦ୍ଦିର ଉତ୍ତର ଦେବେ।
