ଶେରଗଡ଼: ଗଞ୍ଜାମ ଜିଲ୍ଲା ଶେରଗଡ଼ ବ୍ଲକ ପ୍ରାଥମିକ ସ୍କୁଲ ଶିକ୍ଷକ ମହାସଂଘ ପକ୍ଷରୁ ବିଭିନ୍ନ ଦାବି ନେଇ ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ଏକ ଦାବିପତ୍ର ପ୍ରଦାନ କରାଯାଇଛି । ଏଥିପାଇଁ ବ୍ଲକ ପ୍ରାଥମିକ ସ୍କୁଲ ଶିକ୍ଷକ ମହାସଂଘ ସଭାପତି ଅରୁଣ କୁମାର ସ୍ୱାଇଁଙ୍କ ନେତୃତ୍ୱରେ ଶେରଗଡ଼ର ସମସ୍ତ ପ୍ରାଥମିକ ଶିକ୍ଷକ-ଶିକ୍ଷୟତ୍ରୀ ଏକ ଶୋଭାଯାତ୍ରାରେ ବାହାରି ବ୍ଲକ କାର୍ଯ୍ୟାଳୟ ନିକଟରେ ପହଞ୍ଚିଥିଲେ । ସେଠାରେ ମୁଖ୍ୟମନ୍ତ୍ରୀ, ୫-ଟି ସଚିବ, ଶିକ୍ଷାମନ୍ତ୍ରୀ ଓ ଶିକ୍ଷା କମିଶନରଙ୍କ ଉଦ୍ଦେଶ୍ୟରେ ଅତିରିକ୍ତ ବିଡିଓ ଶ୍ରୀମତୀ ଶୈଳେନ୍ଦ୍ରି ଦଳାଇଙ୍କୁ ଏକ ଦାବିପତ୍ର ପ୍ରଦାନ କରିଥିଲେ ।
ପ୍ରାଥମିକ ସ୍କୁଲରେ ଠିକା ନିଯୁକ୍ତି ଉଛେଦ କରିବା ସହ ୬ ବର୍ଷିଆ ଠିକା କାର୍ଯ୍ୟକଳାକୁ ୬ଟି ଇନକ୍ରିମେଣ୍ଟ ଦେଇ ସର୍ଭିସ ଭାବେ ଗଣନା କରିବା, କେନ୍ଦ୍ରୀୟ ହାରରେ ବେତନ ପ୍ରଦାନ କରିବା, ନୂୂଆ ପେନସନ୍ ଯୋଜନାକୁ ଉଛେଦ କରି ପୁରୁଣା ପେନସନ ଯୋଜନା ଲାଗୁ କରିବା ଆଦି ଦାବିପତ୍ରରେ ଉଲ୍ଲେଖ ରହିଛି । ଏହି କାର୍ଯ୍ୟକ୍ରମରେ ମହାସଂଘ ସଭାପତି ଶିଶିର କୁମାର ସ୍ୱାଇଁ, ଜଗନ୍ନାଥ ସେଠୀ, ଆଲୋକ କୁମାର ପାଢ଼ୀ, ଅଶୋକ କୁମାର ସ୍ୱାଇଁ, ସୁଦର୍ଶନ ବେହେରା, ସୁଧାଂଶୁ ଶେଖର ସ୍ୱାଇଁ, ବିଶ୍ୱଜିତ ଦାସ, ଅଜୟ କୁମାର ପଟ୍ଟନାୟକଙ୍କ ସମେତ ବ୍ଲକର ସମସ୍ତ ପ୍ରାଥମିକ ଶିକ୍ଷକ-ଶିକ୍ଷୟତ୍ରୀ ସାମିଲ ହୋଇଥିଲେ । ସରକାର ତୁରନ୍ତ ଦାବି ପୂରଣ ନହେଲେ ଚଳିତ ମାସ ୨୭ ତାରିଖରେ ମହାସଂଘ ପକ୍ଷରୁ ବିଧାନସଭା ସମ୍ମୁଖରେ ପ୍ରତିବାଦ ସଭା ଅନୁଷ୍ଠିତ ହେବ ବୋଲି ପ୍ରାଥମିକ ଶିକ୍ଷକ ମହାସଂଘ ପକ୍ଷରୁ ସୂଚନା ଦିଆଯାଇଛି ।
