ପିଲାଦ୍ବୟକୁ ନିଜ ପାଖରେ ରଖି ସ୍ତ୍ରୀଙ୍କୁ ପ୍ରେମିକା ସହ ବାହାଦେଇ ସ୍ବାମୀ କହିଲେ ଏଭଳି କଥା.. – Utkal Mail
ନୂଆଦିଲ୍ଲୀ: ବିହାରର ବେଗୁସରାଇ ଅନ୍ତର୍ଗତ ଦାହିଆ ଗାଁରୁ ଏକ ଆଶ୍ଚର୍ଯ୍ୟଜନକ ଘଟଣା ସାମ୍ନାକୁ ଆସିଛି। ଏଠାରେ ବସବାସ କରୁଥିବା ଜଣେ ବ୍ୟକ୍ତି ବିନା ବାଧାରେ ତାଙ୍କ ସ୍ତ୍ରୀଙ୍କୁ ପ୍ରେମିକଙ୍କ ସହ ବାହାଘର କରାଇଦେଇଛନ୍ତି। କେବଳ ଏତିକି ନୁହେଁ ବୈବାହିକ ଜୀବନରେ ଛୁଆଙ୍କୁ ନେଲେ କାଳେ କୌଣସି ଅସୁବିଧା ହେବ ସେଥିପାଇଁ ସ୍ତ୍ରୀଙ୍କ ପିଲା ଦ୍ବୟକୁ ନିଜ ପାଖରେ ରଖିଛନ୍ତି ସ୍ବାମୀ।
ସୂଚନାଯୋଗ୍ୟ, ୨୦୧୮ ମସିହାରେ କାଜଲ ଅଜୟ କୁମାରଙ୍କୁ ବିବାହ କରିଥିଲେ। ବାହାଘର ପୂର୍ବରୁ କାଜଲ ରାଜ କୁମାର ଠାକୁରଙ୍କୁ ଭଲ ପାଉଥିଲେ। ତେବେ ପରିବାର ଚାପରେ ସେ କାହାକୁ କିଛି ନକହି ଅଜୟଙ୍କୁ ବାହା ହୋଇଯାଇଥିଲେ।
ବାହାଘର ପରେ କାଜଲ ଅଜୟଙ୍କୁ କିଛି ନଜଣାଇ ନିୟମିତ ଭାବେ ରାଜ କୁମାରଙ୍କ ସହିତ କଥା ହେଉଥିଲେ ତାଙ୍କୁ ଦେଖା ବି କରୁଥିଲେ।
କିଛିଦିନ ତଳେ ଘରେ କେହି ନଥିବା ବେଳେ କାଜଲ ରାଜଙ୍କୁ ଘରକୁ ଦେଖା କରିବା ପାଇଁ ଡାକିଥିଲେ। ଏହି ସମୟରେ ଅଜୟଙ୍କ ପରିବାର ଲୋକ କାଜଲଙ୍କୁ ରାଜଙ୍କ ସହ ଆପତ୍ତିଜନକ ଅବସ୍ଥାରେ ଦେଖି ଦେଇଥିଲେ। ନିଜ ସ୍ତ୍ରୀଙ୍କ ବିଷୟରେ ଏଭଳି କଥା ଜାଣିବା ପରେ ଅଜୟ ସ୍ତବ୍ଧ ହୋଇଯାଇଥିଲେ। କାରଣ ଇତିମଧ୍ୟରେ କାଜଲ ଦୁଇଟି ସନ୍ତାନର ମା’ ବି ହୋଇସାରିଥିଲେ।
ଅଜୟ ଏହି ଘଟଣାକୁ ନେଇ କହିଛନ୍ତି, ‘କାଜଲ ସହିତ ମୋର ବିବାହକୁ ଏତେ ବର୍ଷ ବିତି ଯାଇଥିବା ସତ୍ତ୍ବେ, ସେ ଦୁଇଟି ସନ୍ତାନର ମା’ ଥିବା ସତ୍ତ୍ବେ ଯଦି ତାର ପ୍ରେମିକଙ୍କ ସହିତ ଯୋଗାଯୋଗ ଅଛି ତେବେ ମୋ ସହିତ ସମ୍ପର୍କ କାଟି ଦେବା ଉଚିତ।
କାରଣ ଏହି ଘଟଣା ପରେ ସବୁଦିନ ଅଶାନ୍ତିରେ ରହିବା ଅପେକ୍ଷା ଏହି ସମ୍ପର୍କ ତୁଟାଇ ଦେବା ଉଚିତ। ତେଣୁ ଗାଁର ପଞ୍ଚାୟତଙ୍କ ନିଷ୍ପତ୍ତି କ୍ରମେ କାଜଲଙ୍କ ବିବାହ ତାଙ୍କ ପ୍ରେମିକ ସହ ମୁଁ ମନ୍ଦିରରେ କରାଇବାକୁ ସ୍ଥିର କରିଥିଲି। ତେବେ ଦୁଇପିଲାଙ୍କୁ ସାଥୀରେ ନେଲେ କାଜଲ କାଳେ ହଇରାଣ ହେବେ। ସେଥିପାଇଁ ପିଲା ଦ୍ବୟକୁ ମୁଁ ମୋ ପାଖରେ ରଖିଛି। ବାକି ଜୀବନ ତାଙ୍କୁ ଦେଖି ବଞ୍ଚିଯିବି।’
