ଲିଫ୍ଟ୍ ଭିତରେ ମହିଳା ଓ ୬ ମାସର କଅଁଳାପିଲାକୁ କାମୁଡ଼ି ଝୁଣିଦେଲା ପୋଷା କୁକୁର – Utkal Mail
ଗୁରୁଗ୍ରାମ: ୫୦ ନମ୍ବର ସେକ୍ଟର୍ ଅନ୍ତର୍ଗତ ଏକ ‘ରେସିଡେନ୍ସିଆଲ୍ ସୋସାଇଟି’ ଲିଫ୍ଟ୍ ଭିତରେ ଜଣେ ମହିଳା ଓ ୬ ମାସର କଅଁଳାପିଲାକୁ ଗୋଟାଏ ପୋଷା କୁକୁର କାମୁଡ଼ି ଝୁଣି ପକାଇଥିବା କଥା ମଙ୍ଗଳବାର ଦିନ ପୁଲିସ କହିଛି।
ସୋମବାର ଦିନ ‘ସେକ୍ଟର୍ ୫୦’ ଥାନାରେ ପୁଲିସ ଉକ୍ତ କୁକୁର ମାଲିକଙ୍କ ନାଁରେ ‘ଏଫ୍ଆଇଆର୍’ ପଞ୍ଜୀକୃତ କରିଛି।
ଅଭିଯୋଗ ଅନୁସାରେ, ଜୁଲାଇ ୨୮ ତାରିଖ ରାତିରେ ‘ୟୁନିଟେକ୍ ଫ୍ରେସ୍କୋ’ରେ ଉକ୍ତ ଘଟଣାଟି ଘଟିଥିଲା। ବ୍ରିଟିସ୍ ନାଗରିକ ଯଶୱିନ୍ଦର୍ ସିଂହ ‘ୟୁନିଟେକ୍ ଫ୍ରେସ୍କୋ’ରେ ରହନ୍ତି। ରାତି ପ୍ରାୟ ୧୧:୩୦ରେ ସିଂହ, ତାଙ୍କ ସ୍ତ୍ରୀ ଓ ପୁଅ ୭ମ ମହଲାରୁ ଲିଫ୍ଟ୍ରେ ବେସ୍ମେଣ୍ଟ୍କୁ ଆସୁଥିଲେ। ସେତେବେଳେ ସେ ଲିଫ୍ଟରେ ଥିବା ଜଣେ ‘ଜୋମାଟୋ’ ଡେଲିଭରି ବୟ ୫ମ ମହଲାରେ ଅଟକିଥିଲେ।
ଅଭିଯୋଗ ପତ୍ରରେ ସିଂହ କହିଛନ୍ତି, ଆମର ମନେହେଲା ଲିଫ୍ଟ୍ରେ ଯିବାକୁ କେହି ବୋଧହୁଏ ଆସୁଛନ୍ତି। କିନ୍ତୁ, କେହି ଆସିଲେ ନାହିଁ। ଆମ ପିଲା କାନ୍ଦିବାରୁ ହଠାତ୍ ଗୋଟାଏ ପୋଷା କୁକୁର ଲମ୍ଫ ଦେଇ ମୋ ସ୍ତ୍ରୀ ଓ ପିଲାକୁ କାମୁଡ଼ି କ୍ଷତବିକ୍ଷତ କରିପକାଇଲା।
ସେ ଆହୁରି ମଧ୍ୟ ଉଲ୍ଲେଖ କରିଛନ୍ତି, କୁକୁର ମାଲିକ ବ୍ରିତି ଲୁମ୍ବା ସେ କୁକୁରଟିକୁ ନ ବାନ୍ଧି ଖୋଲା ଛାଡ଼ିଥିଲେ। ମୋ ପରିବାରକୁ କୁକୁର କବଳରୁ ରକ୍ଷା କରିବାକୁ ମୁଁ ଉଦ୍ୟମ କରୁଥିବା ବେଳେ ଡେଲିଭରି ବୟ ହରିଶ ମଧ୍ୟ ଲିଫ୍ଟର୍ କବାଟକୁ ଧରି ରଖିଥିଲେ।
ସିଂହ କହିଛନ୍ତି, ଘଟଣା ପାଇଁ ଲୁମ୍ବା କ୍ଷମା ମାଗିଛନ୍ତି। କିନ୍ତୁ, ପରେ ଏହି ଘଟଣା ଲାଗି ସୋସାଇଟିର କିଛି ବାସିନ୍ଦା ହ୍ବାଟସ୍ଆପ୍ ଗ୍ରୁପ୍ରେ ମୋ ପରିବାରକୁ ମାନସିକ ଚାପ ପକାଉଛନ୍ତି। ତେଣୁ, କୁକୁର ମାଲିକଙ୍କ ବିରୋଧରେ ମୁଁ କଠୋର କାର୍ଯ୍ୟାନୁଷ୍ଠାନ ଚାହୁଁଛି।
ସିଂହଙ୍କ ଅଭିଯୋଗକୁ ଆଧାର କରି ବ୍ରିତି ଲୁମ୍ବାଙ୍କ ନାଁରେ ମାମଲା ରୁଜୁ କରାଯାଇ ଘଟଣାର ତଦନ୍ତ ଆରମ୍ଭ କରାଯାଇଥିବା କଥା ପୁଲିସ କହିଛି।
