ମୁମ୍ବାଇ: ରିଜର୍ଭ ବ୍ୟାଙ୍କ ଅଫ୍ ଇଣ୍ଡିଆ ଗଭର୍ଣ୍ଣର ଶକ୍ତିକାନ୍ତ ଦାସ ଶୁକ୍ରବାର ଦିନ କହିଥିଲେ ଯେ ୨୦୦୦ ଟଙ୍କିଆ ନୋଟ୍ ଫେରିବାରେ ଲାଗିଛି ଏବଂ ବର୍ତ୍ତମାନ କେବଳ ୧୦୦୦୦ କୋଟି ଟଙ୍କା ମୂଲ୍ୟର ନୋଟ୍ ଲୋକଙ୍କ ପାଖରେ ଅଛି । ଏହି ନୋଟଗୁଡିକ ମଧ୍ୟ ଫେରସ୍ତ କିମ୍ବା ଜମା କରାଯିବ ବୋଲି ତାଙ୍କର ବିଶ୍ୱାସ ରହିଛି | ଅକ୍ଟୋବର ୬ରେ ଆରବିଆଇ ସୂଚନା ଦେଇଥିଲା ଯେ ପ୍ରାୟ ୧୨,୦୦୦ କୋଟି ଟଙ୍କା ମୂଲ୍ୟର ୨୦୦୦ ଟଙ୍କିଆ ନୋଟ୍ ଏବେ ବି ବଜାରରେ ଅଛି ଏବଂ ଆରବିଆଇକୁ ଫେରସ୍ତ କରାଯାଇ ନାହିଁ। ତେବେ ଏହାରି ଭିତରେ ଏବେ ପ୍ରଶ୍ନ ଉଠିଛି ଯେ ୨ହଜାର ଟଙ୍କିଆ ନୋଟ ବନ୍ଦ ହେବା ପରେ ରିଜର୍ଭ ବ୍ୟାଙ୍କ ଅଫ ଇଣ୍ଡିଆ ୧ ହଜାର ଟଙ୍କିଆ ନୋଟ ବଜାରକୁ ଆଣିବ କି? ତେବେ ଆରବିଆଇ ପକ୍ଷରୁ କୁହାଯାଇଛି ଯେ ଆରବିଆଇ ୧୦୦୦ ଟଙ୍କିଆ ନୋଟ୍ ପ୍ରଚଳନ କରିବାକୁ କୌଣସି ଯୋଜନା ନାହିଁ କିମ୍ବା ଏବେ କେବଳ ୫୦୦ ଟଙ୍କିଆ ନୋଟ ହିଁ ସବୁଠାରୁ ବଡ ନୋଟ ଭାବେ ପରିଚିତ ହେବ |
ନ୍ୟୁଜ ଏଜେନ୍ସି ଏଏନଆଇକୁ ସୂଚନା ଦେଇ ଆରବିଆଇ ଅଧିକାରୀମାନେ କହିଛନ୍ତି ଯେ ୧୦୦୦ ଟଙ୍କିଆ ନୋଟ ପୁନଃ ପ୍ରଚଳନ କରିବାକୁ ଆରବିଆଇର କୌଣସି ଯୋଜନା ନାହିଁ। ଭାରତୀୟ ରିଜର୍ଭ ବ୍ୟାଙ୍କ ଏକ ବିବୃତ୍ତିରେ କହିଛି ଯେ ବଜାରରେ ନଗଦ ପ୍ରବାହକୁ ବଜାୟ ରଖିବା ପାଇଁ ସରକାର ୫୦୦ ଟଙ୍କିଆ ନୋଟ ପର୍ଯ୍ୟାପ୍ତ ପରିମାଣର ମୁଦ୍ରଣ କରିଛନ୍ତି, ଯାହାଦ୍ୱାରା ଲୋକଙ୍କୁ ନଗଦ ସମ୍ବନ୍ଧୀୟ ସମସ୍ୟାର ସମ୍ମୁଖୀନ ହେବାକୁ ପଡ଼ିବ ନାହିଁ। ଏଥି ସହିତ, ଡିଜିଟାଲ୍ ପେମେଣ୍ଟ ବ୍ୟବହାର ସହିତ ଲୋକଙ୍କ ମଧ୍ୟରେ ନଗଦ ଆବଶ୍ୟକତା ହ୍ରାସ ପାଇଛି | ଏଭଳି ପରିସ୍ଥିତିରେ ୧୦୦୦ ଟଙ୍କିଆ ନୋଟ୍ ଆଣିବାର କୌଣସି ଆବଶ୍ୟକତା ନାହିଁ ବୋଲି ଆରବିଆଇ କହିଛି। ଗୁଜବରୁ ଦୂରେଇ ରହିବାକୁ ଆରବିଆଇ ଲୋକଙ୍କୁ ପରାମର୍ଶ ଦେଇଛି। ସୂଚନାଯୋଗ୍ୟ ଯେ ୨୦୧୬ ମସିହାରେ କେନ୍ଦ୍ର ସରକାର ୧୦୦୦ ଟଙ୍କା ଏବଂ ପୁରୁଣା ୫୦୦ ଟଙ୍କିଆ ନୋଟକୁ ବିମୁଦ୍ରୀକରଣ କରିଥିଲେ ଏବଂ ସେମାନଙ୍କ ସ୍ଥାନରେ ୫୦୦ ଟଙ୍କା ନୋଟ୍ ଏବଂ ୨୦୦୦ ଟଙ୍କିଆ ନୋଟ୍ ଜାରି କରିଥିଲେ। ତେବେ ସରକାର ୨୦୦୦ ଟଙ୍କିଆ ନୋଟ ମଧ୍ୟ ପ୍ରତ୍ୟାହାର କରି ନେଇଛନ୍ତି।
