ଓଡ଼ିଆ ଫିଲ୍ମ ଇଣ୍ଡଷ୍ଟ୍ରିର ଦାବି ଗ୍ରହଣ କଲେ ସରକାର, ଆନ୍ଦୋଳନ ପ୍ରତ୍ଯାହାର କଲେ ପ୍ରଯୋଜିକା – Utkal Mail

ଭୁବନେଶ୍ୱର: ଓଡ଼ିଆ ଫିଲ୍ମ ଇଣ୍ଡଷ୍ଟ୍ରିର ଦାବି ଯୁକ୍ତିଯୁକ୍ତ। ରାଜ୍ୟ ସରକାରଙ୍କ ସହ କଳାକାର, ନିର୍ଦ୍ଦେଶକ, ପ୍ରଯୋଜକ ଆଲୋଚନା କରିବା ବେଳେ ଦାବିକୁ ସ୍ବୀକାର କରିଛନ୍ତି ଶିଳ୍ପ ସଚିବ। ଏହାପରେ ମଙ୍ଗଳବାର ଫିଲ୍ମ ନିର୍ମାତା ସାନଲିସା ପଟେଲ ଅନିର୍ଦ୍ଦିଷ୍ଟ କାଳ ପାଇଁ ଯେଉଁ ଧାରଣା ଦେଇଥିଲେ ସେଥିରୁ ଓହରି କରିଛନ୍ତି।

ଆଜି ରାଜଧାନୀରେ ଓଡ଼ିଆ ଚଳଚ୍ଚିତ୍ରର କଳାକାର, ପ୍ରଯୋଜକ, ନିର୍ଦ୍ଦେଶକଙ୍କ ସହ ଆଲୋଚନା ବେଳେ ଶିଳ୍ପ ବିଭାଗର ପ୍ରମୁଖ ଶାସନ ସଚିବ ହେମନ୍ତ ଶର୍ମା କହିଛନ୍ତି, ସରକାର ୨୦୨୩-୨୪ ଆର୍ଥିକ ବର୍ଷରେ ନୂଆ ଓଡ଼ିଆ ସିନେମା ନୀତି ଘୋଷଣା କରିବେ।

୨୦୧୯ରେ କାର୍ଯ୍ୟକାରୀ ହୋଇଥିବା ବର୍ତ୍ତମାନର ନୀତିରେ ଥିବା ବ୍ୟବସ୍ଥାକୁ ପରିବର୍ତ୍ତନ କରାଯାଇ ଓଡ଼ିଆ ଚଳଚ୍ଚିତ୍ରର ବଣ୍ଟନ ଓ ସ୍କ୍ରିନିଂ ବା ପ୍ରଦର୍ଶନୀକୁ ଶୃଙ୍ଖଳିତ କରାଯିବ ବୋଲି ସେ କହିଛନ୍ତି। ନିୟମକୁ ସରଳ କରିବା ସହିତ ଅନଲାଇନ୍ ପ୍ରକ୍ରିୟାକୁ ନୂଆ ନୀତିରେ ସାମିଲ କରାଯିବ ବୋଲି ସେ କହିଛନ୍ତି।

ଏହାଛଡ଼ା ଗ୍ରାମାଞ୍ଚଳ ଓ ଅର୍ଦ୍ଧସହରାଞ୍ଚଳରେ ସିଙ୍ଗଲ୍ ସ୍କ୍ରିନ୍ ଥିଏଟର୍ ସମେତ ନୂଆ ଚଳଚ୍ଚିତ୍ର ହଲ୍ ଖୋଲାଯିବ, ଯାହାଫଳରେ ଓଡ଼ିଆ ଚଳଚ୍ଚିତ୍ର ପ୍ରଦର୍ଶନ ପାଇଁ ପ୍ରେକ୍ଷାଳୟ ସଂଖ୍ୟା ବୃଦ୍ଧି ପାଇବ। ରାଜ୍ୟର ପ୍ରାୟ ୪୦ଟି ସିନେମା ହଲ୍ ବନ୍ଦ ରହିଛି ବୋଲି ଜଣାପଡିଛି।

ସଚିବ ପ୍ରତିଶ୍ରୁତି ଦେଇଛନ୍ତି ଯେ ଓଡ଼ିଆ ଚଳଚ୍ଚିତ୍ର ନିର୍ମାତାମାନେ ଭଲ ମାନର ଚଳଚ୍ଚିତ୍ର ନିର୍ମାଣ କରିବା ପାଇଁ ସରକାର ସବସିଡି ପ୍ରଦାନ କରିବେ।

ସନାଲିସାଙ୍କ ବ୍ୟତୀତ ଅଭିନେତା ମହାଶ୍ୱେତା ରାୟ, ବୁଦ୍ଧାଦିତ୍ୟ, ପ୍ରଯୋଜକ ସବ୍ୟସାଚୀ ମହାପାତ୍ର, ନିର୍ଦ୍ଦେଶକ ତାପସ ସରଘରିଆ, ସଙ୍ଗୀତ ନିର୍ଦ୍ଦେଶକ ପ୍ରେମାନନ୍ଦ, ଓଏଫଡିସି ଅଧ୍ୟକ୍ଷ କୁନା ତ୍ରିପାଠୀ ପ୍ରମୁଖ ବୈଠକରେ ଯୋଗ ଦେଇ ଓଡ଼ିଆ ଚଳଚ୍ଚିତ୍ର ଶିଳ୍ପର ଉନ୍ନତି ପାଇଁ ପରାମର୍ଶ ଦେଇଥିଲେ।

ସୂଚନାଯୋଗ୍ୟ ଯେ, ଗତ ନଭେମ୍ବର ୨୩ ତାରିଖରୁ ନିଜର ଦାବି ପୂରଣ ପାଇଁ ଆମରଣ ଅନଶନରେ ବସିଥିବା ସାନଲିସା ଗତ ନଭେମ୍ବର ୨୫ ତାରିଖରେ ଓଏଫଡିସି ଅଧ୍ୟକ୍ଷଙ୍କ ପକ୍ଷରୁ ବୈଠକ କରିବା ନେଇ ପ୍ରତିଶ୍ରୁତି ମିଳିବା ପରେ ଆନ୍ଦୋଳନ ପ୍ରତ୍ୟାହାର କରିଥିଲେ।