ନୂଆଦିଲ୍ଲୀ: ‘ମହୁରତ ପ୍ରସବ’ କିମ୍ବା ‘ଶୁଭ ମୁହୂର୍ତ୍ତ ଜନ୍ମ’ ପାଇଁ ସମଗ୍ର ଭାରତରେ ସଂପ୍ରତି ଆଗ୍ରହ ବୃଦ୍ଧି ପାଉଛି। ଡାକ୍ତରଖାନା ଓ ଡାକ୍ତରମାନେ ଏ ନେଇ ଅଧିକରୁ ଅଧିକ ଅନୁରୋଧ ପାଉଛନ୍ତି। ଏପରିକି କେତେକ କ୍ଲିନିକ୍ ‘ମହୁରତ ପ୍ରସବ’କୁ ସେମାନଙ୍କ ସେବା ତାଲିକାରେ ସ୍ଥାନିତ କରିବା ପର୍ଯ୍ୟନ୍ତ ଗଲେଣି। ରାମ ମନ୍ଦିରରେ ରାମଲାଲାଙ୍କ ବିଗ୍ରହ ପ୍ରତିଷ୍ଠା ହେଉ କିମ୍ବା ଅନ୍ୟ କୌଣସି ଗୁରୁତ୍ବପୂର୍ଣ୍ଣ ଦିନରେ ଗର୍ଭବତୀ ମହିଳାମାନେ ପିଲା ଜନ୍ମ କରିବାକୁ ଡାକ୍ତରଖାନାରେ ଧାଡ଼ି ବାନ୍ଧୁଛନ୍ତି।
ଏ ସଂପର୍କରେ ବେଙ୍ଗାଲୁରୁର ଗ୍ଲେନେଗଲ୍ସ ବିଜିଏସ୍ ହସ୍ପିଟାଲର ପ୍ରସୂତି ଓ ସ୍ତ୍ରୀରୋଗ ବିଭାଗର ବରିଷ୍ଠ ପରାମର୍ଶଦାତା ଡାକ୍ତର ନିର୍ମଳା ଚନ୍ଦ୍ରଶେଖର କହିଛନ୍ତି, ମହୁରତ ପ୍ରସବ ହେଉଛି ସେହି ଅଭ୍ୟାସ ଯେଉଁଠାରେ ପିତାମାତା ସେମାନଙ୍କ ଶିଶୁଜନ୍ମ ପାଇଁ ଜ୍ୟୋତିଷଙ୍କ ପରାମର୍ଶ ପରେ ଏକ ନିର୍ଦ୍ଦିଷ୍ଟ ଦିନ ଓ ସମୟ ଚୟନ କରନ୍ତି। ତେବେ ପ୍ରସବ ସମୟ ପାଖେଇ ଆସିବା ପରେ ହିଁ ଡାକ୍ତରମାନେ ଏ ପ୍ରକାର ଅନୁରୋଧକୁ ଗ୍ରହଣ କରନ୍ତି। ଆଗକାଳରେ ଅଧିକାଂଶ ପ୍ରସବ ସ୍ୱାଭାବିକ ଭାବରେ ହେଉଥିଲା। ତେଣୁ ସନ୍ତାନ ପ୍ରସବ କେବେ ହେବ ତାହା ନିଜେ ସ୍ଥିର କରିବା ସମ୍ଭବ ନ ଥିଲା। କିନ୍ତୁ ଆଜିକାଲି ଅଧିକାଂଶ ପ୍ରସବ ଡାକ୍ତରମାନଙ୍କ ଦ୍ବାରା (ସିଜିରିଆନ୍) ସି-ସେକ୍ସନ୍ରେ ହେଉଥିବାରୁ ପିତାମାତା ଓ ଅଭିଭାବକମାନେ ଶୁଭ ଦିନରେ ଓ ଶୁଭ ସମୟରେ କରିବାକୁ ଆଗ୍ରହ ପ୍ରକାଶ କରୁଛନ୍ତି। ଯାହାହେଲେ ବି ପ୍ରସବ କେବେ ସମ୍ପୂର୍ଣ୍ଣ ଭାବେ ନିଜ ଇଚ୍ଛାନୁସାରେ ହୋଇପାରେ ନାହିଁ।
କାରଣ କ୍ଲିନିକ୍ରେ ଡାକ୍ତରଙ୍କ ଉପଲବ୍ଧତା ଏବଂ ଗର୍ଭଧାରଣ ନିର୍ଦ୍ଦିଷ୍ଟ ମାସ ବା ଦିନସଂଖ୍ୟା ପୂରଣ କରିଥିବା ଆବଶ୍ୟକ। ତେବେ ଅନେକ ପିତାମାତା ବିଶ୍ୱାସ କରନ୍ତି ଯେ ସେମାନେ ଜ୍ୟୋତିଷ ଦ୍ବାରା ଅନୁକୂଳ ମୁହୂର୍ତ୍ତ ଚୟନ କରି ସେମାନଙ୍କ ପିଲାଙ୍କ ଭାଗ୍ୟକୁ ମଧ୍ୟ ପ୍ରଭାବିତ କରିପାରିବେ। ହାଇଦ୍ରାବାଦସ୍ଥିତ କେୟାର ହସପିଟାଲର କ୍ଲିନିକାଲ ଡାଇରେକ୍ଟର ଡାକ୍ତର ମଞ୍ଜୁଳା ଅନାଗାନୀ ବି କୁହନ୍ତି ଯେ ସାମ୍ପ୍ରତିକ ବର୍ଷମାନଙ୍କରେ ମହୁରତ ପ୍ରସବର ଚାହିଦା ବୃଦ୍ଧି ପାଇଛି। ଆମ ହସ୍ପିଟାଲରେ ଯେଉଁ କ୍ଷେତ୍ରରେ ସିଜରିଆନ୍ ଜରିଆରେ ପ୍ରସବ କରାଯିବ ବୋଲି ପୂର୍ବରୁ ସ୍ଥିର ହୋଇସାରିଛି, ସେଠାରେ ଏହି ବ୍ୟବସ୍ଥା ରହିଛି। ଚାହିଦା ବୃଦ୍ଧି ଯୋଗୁ ହସ୍ପିଟାଲଗୁଡ଼ିକୁ ବଢ଼ୁଥିବା ଏହି ଟ୍ରେଣ୍ଡ୍କୁ ଗ୍ରହଣ କରିବାକୁ ପଡ଼ୁଛି। କିନ୍ତୁ ଏଥିପାଇଁ କିଛି କଟକଣା ରହିଛି।
ଇତିମଧ୍ୟରେ ଭାରତରେ ସି-ସେକ୍ସନ ଡେଲିଭରିରେ ଉଲ୍ଲେଖନୀୟ ବୃଦ୍ଧି ଘଟିଥିବା ଅଧ୍ୟୟନରୁ ଜଣାପଡ଼ିଛି। ଜାତୀୟ ପରିବାର ସ୍ୱାସ୍ଥ୍ୟ ସର୍ବେକ୍ଷଣ (ଏନ୍ଏଫ୍ଏଚ୍ଏସ୍)ର ତଥ୍ୟ ଅନୁଯାୟୀ ୨୦୧୫-୧୬ରେ ଏହା ୧୭.୨% ଥିବାବେଳେ ୨୦୧୯-୨୧ରେ ଏହା ୨୧.୫%କୁ ବୃଦ୍ଧି ପାଇଛି। ସର୍ବେକ୍ଷଣରୁ ଏହା ମଧ୍ୟ ଜଣାପଡିଛି ଯେ ଘରୋଇ ଡାକ୍ତରଖାନାଗୁଡିକରେ ଏହା ବିଶେଷ ଭାବରେ ଦେଖାଯାଏ, ଯେଉଁଠାରେ ସମସ୍ତ ପ୍ରସବର ପ୍ରାୟ ଅଧା ସି-ସେକ୍ସନ ଦ୍ବାରା ହୋଇଥାଏ।
ତେବେ ଏଥିରେ ବିପଦ ମଧ୍ୟ ରହିଛି। ଯଦି ପିତାମାତା ଶିଶୁର ପୂର୍ଣ୍ଣ ବିକାଶ ହୋଇ ନ ଥିବା ସମୟରେ ମହୁରତ ପ୍ରସବ ପାଇଁ ଜିଦ୍ ଧରନ୍ତି, ତେବେ ଏହା ନବଜାତକ ପାଇଁ ଜଟିଳତା ସୃଷ୍ଟି କରିପାରେ। ଯେଉଁଥିପାଇଁ ଅନେକ ସମୟରେ ଏନ୍ଆଇସିୟୁ ଯତ୍ନ ଆବଶ୍ୟକ ହୁଏ। ଏହାବ୍ୟତୀତ ଯଦି ସ୍ୱାଭାବିକ ଭାବରେ ପ୍ରସବ ବେଦନା ଆରମ୍ଭ ହୁଏ, କିନ୍ତୁ ପିତାମାତା ସେହି ନିର୍ଦ୍ଦିଷ୍ଟ ଦିନରେ ପ୍ରସବ କରିବାକୁ ମନା କରିଦିଅନ୍ତି, ତେବେ ଏହା ଉଭୟ ଶିଶୁ ଓ ମା’ଙ୍କ ପାଇଁ ଜଟିଳତା ସୃଷ୍ଟି କରିପାରେ। କେତେକ କ୍ଷେତ୍ରରେ, ସ୍ବାଭାବିକ ପ୍ରସବ ସମ୍ଭବ ହେଲେ ମଧ୍ୟ ଅଭିଭାବକ ସିଜରିଆନ୍ ଉପରେ ଜୋର୍ ଦିଅନ୍ତି। ଏହା ଅଧିକ କ୍ଷତିକାରକ, କାରଣ ଅନାବଶ୍ୟକ ଅସ୍ତ୍ରୋପଚାର ପଦ୍ଧତି ମା’ଙ୍କ ପାଇଁ ସଂକ୍ରମଣ ଓ ଅସୁସ୍ଥତାର ଆଶଙ୍କା ବଢ଼ାଇଥାଏ ଏବଂ ଭ୍ରୂଣ ଉପରେ ମଧ୍ୟ ପ୍ରଭାବ ପକାଇଥାଏ।
