ବଡ଼ବିଲ: ଦୁର୍ଘଟଣା ପରେ ରାସ୍ତାରେ ପଡ଼ି ଛଟପଟ ହେଉଥିଲେ ବାପପୁଅ। ସ୍ଥାନୀୟ ଲୋକେ ୧୦୮ ଆମ୍ବୁଲାନ୍ସକୁ ଫୋନ୍ କରିଥିଲେ ମଧ୍ୟ ପହଞ୍ଚି ନଥିଲା। ୪୦ ମିନିଟ୍ ଧରି ରାସ୍ତାରେ ପଡ଼ି ଯନ୍ତ୍ରଣାରେ ଛଟପଟ ହେବା ପରେ ପୁଅ ଆଗରେ ବାପା ଆଖି ବୁଜି ଦେଇଛନ୍ତି। ଏଭଳି ଦୁଃଖଦ ଘଟଣା ଘଟିଛି କେନ୍ଦୁଝର ଜିଲ୍ଲା ବଡ଼ବିଲ ଥାନା ଅନ୍ତର୍ଗତ ୫୨୦ ନମ୍ବର ଜାତୀୟ ରାଜପଥର କାଶିଆଛକରେ। ମୃତକ ହେଲେ ରୁଗୁଡ଼ି ଅଞ୍ଚଳର ପ୍ରଫୁଲ୍ଲ କାରୁଆ (୪୦)। ଆଜି ଅପରାହ୍ଣ ସାଢ଼େ ଗୋଟାଏ ବେଳେ ପ୍ରଫୁଲ୍ଲ ଓ ତାଙ୍କ ପାଞ୍ଚବର୍ଷର ପୁଅ ଏକ ବାଇକ୍ରେ ଚମ୍ପୁଆ ଥାନା ସୁନାପଶି ପଞ୍ଚାୟତ ବାଙ୍କ ଗ୍ରାମରୁ ରୁଗୁଡ଼ି ଯାଉଥିଲେ।
କାଶିଆଛକ ନିକଟରେ ପଛପଟୁ ଆସୁଥିବା ଏକ ହାଇୱା ଟ୍ରକ୍ (ଓଡି-୦୯-ପି-୦୩୩୫) ବାଇକ୍କୁ ଧକ୍କା ଦେବାରୁ ବାପପୁଅ ଛିଟିକି ପଡ଼ିଥିଲେ। ପ୍ରଫୁଲଙ୍କ ବେକରେ ଶକ୍ତ ଆଘାତ ଲାଗିଥିବା ବେଳେ ପୁଅର ବାମଗୋଡ଼ ଭାଙ୍ଗି ଯାଇଥିଲା। ସ୍ଥାନୀୟ ଲୋକେ ୧୦୮ ଆମ୍ବୁଲାନ୍ସକୁ ଖବର ଦେଇଥିଲେ ହେଁ ଆମ୍ବୁଲାନ୍ସ ପହଞ୍ଚି ପାରି ନଥିଲା। ୪୦ ମିନିଟ୍ରୁ ଅଧିକ ସମୟ ବାପାପୁଅ ରାସ୍ତାରେ ପଡ଼ି ଛଟପଟ ହେଉଥିଲେ ହେଁ କେହି ସେମାନଙ୍କୁ ଡାକ୍ତରଖାନା ନେଇ ନଥିଲେ। ଖବର ପାଇ ବଡ଼ବିଲ ପୁଲିସ ଘଟଣାସ୍ଥଳରେ ପହଞ୍ଚି ସେମାନଙ୍କୁ ଉଦ୍ଧାର କରି ଏନ୍ଏଚ୍ଏଆଇ ଆମ୍ବୁଲାନ୍ସ ଯୋଗେ ବଡ଼ବିଲ ଡାକ୍ତରଖାନା ପଠାଇଥିଲା। ସେଠାରେ ଡାକ୍ତର ପ୍ରଫୁଲ୍ଲଙ୍କୁ ମୃତ ଘୋଷଣା କରିଥିଲେ। ଅନ୍ୟପକ୍ଷରେ ଦୁର୍ଘଟଣା ଘଟାଇଥିବା ଟ୍ରକ୍ ଚାଳକକୁ ସ୍ଥାନୀୟ ଲୋକେ କାବୁ କରି ନିସ୍ତୁକ ମାଡ଼ ମାରିଛନ୍ତି। ଲୋକଙ୍କ ମାଡ଼ରେ ଲହୁଲୁହାଣ ହୋଇଥିବା ଚାଳକକୁ ପୁଲିସ ଉଦ୍ଧାର କରି ଡାକ୍ତରଖାନା ପଠାଇବା ସହ ହାଇୱାକୁ ଜବତ କରାଯାଇଥିବା ଥାନା ଅଧିକାରୀ ରମାକାନ୍ତ ମୁଦୁଲି କହିଛନ୍ତି।
