୮୧ ବର୍ଷରେ ପଦାର୍ପଣ କଲେ ଅମିତାଭ; ମଧ୍ୟରାତ୍ରରେ ‘ଜଲ୍ସା’ ଆଗରେ ଜନ୍ମଦିନ ପାଳିଲେ ପ୍ରଶଂସକ – Utkal Mail
ମୁମ୍ବାଇ: ଖ୍ୟାତନାମା ଅଭିନେତା ଅମିତାଭ ବଚ୍ଚନ ୮୧ ବର୍ଷରେ ପଦାର୍ପଣ କରିଥିବାରୁ ମଙ୍ଗଳବାର ରାତିରେ ଅସଂଖ୍ୟ ପ୍ରଶଂସକ ତାଙ୍କ ବାସଭବନ ‘ଜଲ୍ସା’ ବାହାରେ ଉପସ୍ଥିତ ରହି ଶୁଭେଚ୍ଛା ଜଣାଇଥିବା କଥା ବିଭିନ୍ନ ଗଣମାଧ୍ୟମ ରିପୋର୍ଟ କରିଛନ୍ତି।
ସୁପର୍ଷ୍ଟାର୍ ଅମିତାଭ ବଚ୍ଚନଙ୍କୁ ଟିକେ ଦେଖିବା ଆଶାରେ ସେମାନେ ଗତରାତିରେ ମୁମ୍ବାଇର ଜୁହୁ ଅନ୍ତର୍ଗତ ତାଙ୍କ ବାସଭବନ ବାହାରେ ସମବେତ ହୋଇଥିଲେ। ସମବେତ ଶୁଭେଚ୍ଛୁ ଓ ପ୍ରଶଂସକମାନଙ୍କୁ ଆଚମ୍ବିତ କରି ସ୍ବୟଂ ଅମିତାଭ ମଧ୍ୟ ମଧ୍ୟରାତ୍ରରେ ମୁହୂର୍ତ୍ତକ ପାଇଁ ବାହାରକୁ ଆସିଥିଲେ। ହାତଯୋଡ଼ି ଶୁଭେଚ୍ଛୁମାନଙ୍କୁ କୃତଜ୍ଞତା ଜଣାଇବା ସହିତ ଚମତ୍କାର ସ୍ମିତ ହସ ହସି ଅମିତାଭ ସେମାନଙ୍କ ଆଡ଼କୁ ହାତ ହଲାଇଲେ।
ଉଲ୍ଲେଖ ଅନାବଶ୍ୟକ ଯେ, ୮୧ ବର୍ଷ ବୟସରେ ମଧ୍ୟ ଅମିତାଭ ବଚ୍ଚନ ଚଳଚ୍ଚିତ୍ର ଶିଳ୍ପରେ ଅନ୍ୟତମ ସକ୍ରିୟ ସୁପର୍ଷ୍ଟାର୍ ଭାବେ ପରିଗଣିତ ହୁଅନ୍ତି। କର୍ମପ୍ରବଣ ଅମିତାଭଙ୍କର ଆଗକୁ କେତେଗୁଡ଼ିଏ ଚଳଚ୍ଚିତ୍ର ମୁକ୍ତିଲାଭ କରିବ।
ଅମିତାଭଙ୍କୁ ଦେଖିବା ଲାଗି ଆସିଥିବା ଅନେକେ ଶୁଭେଚ୍ଛୁ ତାଙ୍କ ଫଟୋ ଥିବା ‘ଟି-ସାର୍ଟ’ ପିନ୍ଧିଥିଲେ। ଆହୁରି କେତେ ଜଣ ସେ ଚଳଚ୍ଚିତ୍ରମାନଙ୍କର ଯେଭଳି ବେଶପୋଷାକ ସାଜନ୍ତି, ସେଭଳି ସାଜିଥିଲେ। ଅନେକେ ଶୁଭେଚ୍ଛୁ ଗୀତ ଗାଇ ନାଚିଥିଲେ।
ରାତି ପ୍ରାୟ ୧୨.୧୦ରେ ଅମିତାଭ ବଚ୍ଚନ ମାତ୍ର ୧ ମିନିଟ୍ ପାଇଁ ‘ଜଲ୍ସା’ର ଆଗ ଦ୍ବାରକୁ ଆସି ଯୋଡ଼ହସ୍ତରେ ପ୍ରଶଂସକମାନଙ୍କୁ କୃତଜ୍ଞତା ଜଣାଇବା ସହିତ କେତେଜଣଙ୍କ ସହିତ କରମର୍ଦ୍ଦନ କରିଥିଲେ। ସେତେବେଳେ ଅମିତାଭଙ୍କ ପରିଧାନ ଥିଲା ‘ପେଷ୍ଟାଲ୍ ପିଙ୍କ୍’ ଓ ‘ମିଣ୍ଟ୍’ ରଙ୍ଗର ଛିଟ ଜ୍ୟାକେଟ୍, ଧୂସର ରଙ୍ଗର ଟ୍ରାକ୍ ପ୍ୟାଣ୍ଟ୍, ମୁଣ୍ଡରେ ବନ୍ଦନା ଟୋପି ଓ ଆଖିରେ ଚଷମା।
