ନେହେରୁ ଚୀନ ସହ ଯୁଦ୍ଧ କରିଥିଲେ, କିନ୍ତୁ ମୋଦୀ ଆତ୍ମସମର୍ପଣ କରିଦେଇଛନ୍ତି : କେଜ୍ରିଓ୍ବାଲ୍ – Utkal Mail

ନୂଆଦିଲ୍ଲୀ : ଆମ୍ ଆଦମୀ ପାର୍ଟିର ରାଷ୍ଟ୍ରୀୟ ସଂଯୋଜକ ତଥା ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ଚୀନ୍ ପ୍ରସଙ୍ଗରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଟାର୍ଗେଟ କରିଛନ୍ତି। ସେ ଗୁରୁବାର (ଅଗଷ୍ଟ ୧୭) କହିଛନ୍ତି ଯେ ଚୀନ୍ ଗତ ୯ ବର୍ଷ ଧରି ଭାରତକୁ ଆଖି ଦେଖାଉଛି କିନ୍ତୁ ପ୍ରଧାନମନ୍ତ୍ରୀ ମୋଦୀ ସମ୍ପୂର୍ଣ୍ଣ ନୀରବ ଅଛନ୍ତି। ଏପରିକି ପ୍ରଧାନମନ୍ତ୍ରୀଙ୍କ ପାଟିରୁ ଚୀନ ଶବ୍ଦ ବାହାରି ନାହିଁ। ଅର୍ଥାତ୍ ସେ ଚୀନ ଶବ୍ଦ ପାଟିରେ ଧରିବାକୁ ଭୟ କରୁଛନ୍ତି ।

ସେ କହିଛନ୍ତି, ୨୦୧୯ ଅକ୍ଟୋବରରେ ଚୀନ୍ ରାଷ୍ଟ୍ରପତି ଭାରତ ଆସିଥିଲେ। ତାମିଲନାଡୁର ମହାବଳେଶ୍ୱରରେ ଥିବା ଏକ ମନ୍ଦିରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ଚୀନ ରାଷ୍ଟ୍ରପତି ସି ଜିନପିଙ୍ଗ ହାତ ମିଳାଇ ଚାଲିଥିଲେ । ଏହା ମଧ୍ୟ ଫଟୋ ଉଠାଯାଇଥିଲା । କିନ୍ତୁ ଜୁନ୍ ୧୫, ୨୦୨୦ରେ ଚୀନ୍ ସେନା ଗଲୱାନ ଉପତ୍ୟକାରେ ଆମ ସୈନିକଙ୍କ ଉପରେ ଆକ୍ରମଣ କରିଥିଲା ଏବଂ ଆମର ୨୦ ଜଣ ସୈନିକଙ୍କୁ ହତ୍ୟା କରିଥିଲା ।

ଏହି ଲୋକମାନେ (ବିଜେପି) ଜବାହରଲାଲ ନେହେରୁଙ୍କୁ ଗାଳି ଗୁଲଜ କରୁଛନ୍ତି। ଅନ୍ତତଃ ନେହେରୁ ଆଖିରେ ଆଖି ରଖି ଚୀନ୍ ସହ ଯୁଦ୍ଧ ଲଢ଼ିଥିଲେ। ସେମାନେ (ବିଜେପି) ସିଧାସଳଖ ଆତ୍ମସମର୍ପଣ କରିଛନ୍ତି। ଚୀନ୍ ଆମ ଉପରେ ଆକ୍ରମଣ କରି ଆମର ୨୦୦୦ ବର୍ଗ କିଲୋମିଟର ଅଞ୍ଚଳ ଛଡ଼ାଇ ନେଇଥିଲା ଏବଂ ବିଜେପି ବଦଳରେ ଚୀନ୍କୁ ପୁରସ୍କାର ଦେଇଥିଲା।