ଭୁବନେଶ୍ବର: ରୋବୋଟିକ୍ ଶିକ୍ଷା ନାଁରେ ୧୦ ଲକ୍ଷ ଟଙ୍କା ଠକି ନେଇଥିବା ଅଭିଯୋଗରେ ଆଜି ନୂଆପଲ୍ଲୀ ଥାନା ପୁଲିସ ରାଜସ୍ଥାନ ଜୟପୁରର ଜଗଦୀଶ ପାରିକ୍(୩୭)କୁ ଗିରଫ କରିଛି। ପୂର୍ବରୁ ପଶ୍ଚିମବଙ୍ଗ ପୁଲିସ ଓ କଟକ ମର୍କତନଗର ଥାନା ପୁଲିସ ଜଗଦୀଶକୁ ଗିରଫ କରିଥିଲା। କିନ୍ତୁ ଜାମିନରେ ମୁକୁଳିବା ପରେ ବି ଜଗଦୀଶ ପୁଣି ଠକାମି ଜାଲରେ ଫସାଇ ଲକ୍ଷ ଲକ୍ଷ ଟଙ୍କା ଲୁଟୁଥିଲା।
ସୂଚନା ମୁତାବକ, ଜଗଦୀଶ ଓ ସ୍ତୁତିଧର ଆର୍ଯ୍ୟ ମିଶି ରାଜସ୍ଥାନ ଜୟପୁରରେ ରୋବୋସ୍ମାର୍ଟ ଲିମିଟେଡ୍ ନାମକ ସଂସ୍ଥା ଆରମ୍ଭ କରିଥିଲେ। ବିଭିନ୍ନ ରାଜ୍ୟରେ ଏହାର ଫ୍ରାଞ୍ଚାଇଜ୍ ଖୋଲିବା ସହ ସେଠାରେ ଶିକ୍ଷା ଦେବା ସହ ସମସ୍ତ ଯନ୍ତ୍ରପାତି ଯୋଗାଇଦେବାକୁ ଯୋଜନା କରିଥିଲେ। ହେଲେ ବାସ୍ତବରେ ସେମାନେ ନା ଶିକ୍ଷା ଦେଉଥିଲେ ନା ଯନ୍ତ୍ରପାତି ଯୋଗାଉଥିଲେ। ଟଙ୍କା ନେବା ପରେ ଧରାଛୁଆଁ ଦେଉନଥିଲେ। ଏମାନେ ଯେଉଁ ରାଜ୍ୟକୁ ଯାଉଥିଲେ, ତା ପୂର୍ବରୁ ବିଭିନ୍ନ ସୋସିଆଲ୍ ମିଡିଆ ଠାରୁ ଆରମ୍ଭ କରି ଖବରକାଗଜ ଆଦିରେ ବିଜ୍ଞାପନ ଦେଉଥିଲେ। ତାରକା ହୋଟେଲ୍ରେ ରହଣି ସାଙ୍ଗକୁ ସେମାନଙ୍କ ବେଶପୋଷାକ ଦେଖି ପୁଞ୍ଜିନିବେଶକାରୀମାନେ ସହଜରେ ସେମାନଙ୍କୁ ଠକ ବୋଲି ଠଉରେଇ ପାରୁନଥିଲେ। କିଛିଦିନ ତଳେ ରାଜଧାନୀର ଏକ ତାରକା ହୋଟେଲ୍ରେ ସେମାନେ ମିଟିଂ କରିଥିଲେ। ପୁଞ୍ଜିନିବେଶକାରୀ ସୁନୀଲ କୁମାର ପଟେଲ୍ ଉକ୍ତ ହୋଟେଲରେ ଜଗଦୀଶଙ୍କୁ ଭେଟିଥିଲେ। ସେ ଝାରସୁଗୁଡ଼ା ଅଞ୍ଚଳରେ ଫ୍ରାଞ୍ଚାଇଜ୍ ନେବା ପାଇଁ ୧୦ଲକ୍ଷ ଟଙ୍କା ଦେଇଥିଲେ। କିନ୍ତୁ ଟଙ୍କା ନେବା ପରେ ଜଗଦୀଶ ଆଉ ଧରାଛୁଆଁ ଦେଇନଥିଲା। ଏନେଇ ସୁନୀଲ ନୂଆପଲ୍ଲୀ ଥାନାରେ ଅଭିଯୋଗ କରିଥିଲେ।
