‘ଦେଇଥିବା ପ୍ରତିଶ୍ରୁତି ପୂରଣ କଲୁ’: ସୁସ୍ଥ ହେବା ପରେ ମହାକାଶଚାରୀ ଓଭଲ ଅଫିସ ଆସିବେ

ନୂଆଦିଲ୍ଲୀ: ଦୀର୍ଘ ୯ ମାସରୁ ଅଧିକ ସମୟ ଧରି ମହାକାଶରେ ଅଟକି ରହିଥିବା ଭାରତୀୟ ବଂଶୋଦ୍ଭବ ଆମେରିକୀୟ ମହାକାଶଚାରୀ ସୁନୀତା ୱିଲିୟମ୍ସ ଏବଂ ବୁଚ୍‌ ୱିଲ‌୍‌ମୋର ବୁଧବାର ବଡ଼ି ଭୋରରେ ଫ୍ଲୋରିଡା ନିକଟ ସମୁଦ୍ରରେ ଅବତରଣ କରିବା ପରେ ହ୍ବାଇଟ୍ ହାଉସ୍ ଏବଂ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଖୁସି ବ୍ୟକ୍ତ କରିଛନ୍ତି। ରାଷ୍ଟ୍ରପତି ଟ୍ରମ୍ପ ତାଙ୍କ ପ୍ରତିଶ୍ରୁତି ପୂରଣ କରିଛନ୍ତି। ‘‘ପ୍ରତିଶ୍ରୁତି ଦିଆଯାଇଥିଲା, ପ୍ରତିଶ୍ରୁତି ପୂରଣ କରାଗଲା। ମହାକାଶରେ ଫସି ରହିଥିବା ମହାକାଶଚାରୀଙ୍କୁ ଫେରାଇ ଅଣାଯିବ ବୋଲି ଟ୍ରମ୍ପ ପ୍ରତିଶ୍ରୁତି ଦେଇଥିଲେ। ଆଜି ସେମାନେ ଆମେରିକା ଉପସାଗରରେ ସୁରକ୍ଷିତ ଅବତରଣ କରିଛନ୍ତି। ଏଲନ ମସ୍କ, ସ୍ପେସଏକ୍ସ ଏବଂ ନାସାକୁ ଧନ୍ୟବାଦ’’ ବୋଲି ହ୍ବାଇଟ୍‌ ହାଉସ୍‌ ପକ୍ଷରୁ ସାମାଜିକ ଗଣମାଧ୍ୟମରେ ପୋଷ୍ଟ୍‌ କରାଯାଇଛି। ଏଥିସହିତ ଦୁଇ ମହାକାଶଚାରୀ ସୁସ୍ଥ ହେବା ପରେ ଓଭଲ ଅଫିସକୁ ଆସି‌ବେ ବୋଲି ଟ୍ରମ୍ପ ଫକ୍ସ ନ୍ୟୁଜ୍‌କୁ ଦେଇଥିବା ସାକ୍ଷାତକାରରେ କହିଛନ୍ତି।

ଏଲନ୍‌ ମସ୍କ ମଧ୍ୟ ଦାବି କରିଛନ୍ତି ଯେ ସ୍ପେସ୍‌ଏକ୍ସ ପକ୍ଷରୁ ପୂର୍ବତନ ରାଷ୍ଟ୍ରପତି ବାଇଡେନଙ୍କ ପ୍ରଶାସନକୁ ସେମାନଙ୍କୁ ‌ଆଣିବା ଲାଗି ପ୍ରସ୍ତାବ ଦିଆଯାଇଥିଲା। କିନ୍ତୁ ରାଜନୈତିକ କାରଣରୁ ଏହାକୁ ପ୍ରତ୍ୟାଖ୍ୟାନ କରି ଦିଆଯାଇଥିଲା। ଚଳିତବର୍ଷ ଜାନୁଆରି ୨୮ରେ ରାଷ୍ଟ୍ରପତି ଟ୍ରମ୍ପ ଦୁଇ ମହାକାଶଚାରୀଙ୍କୁ ଯଥାଶୀଘ୍ର ଉଦ୍ଧାର କରିବା ପାଇଁ ସ୍ପେସ୍‌ଏକ୍ସର ସିଇଓ ଏଲନ ମସ୍କଙ୍କୁ କହିଥିଲେ। ବାଇଡେନ ପ୍ରଶାସନ ଦ୍ବାରା ସେମାନଙ୍କୁ ମହାକାଶରେ ପରିତ୍ୟକ୍ତ ଅବସ୍ଥାରେ ଛାଡ଼ି ଦିଆଯାଇଛି ବୋଲି ଟ୍ରମ୍ପ ଅଭିଯୋଗ କରିଥିଲେ। ଏପରିକି ବାଇଡେନ ପ୍ରଶାସନ ଦୁଇ ମହାକାଶଚାରୀଙ୍କୁ ଦୀର୍ଘଦିନ ଧରି ମହାକାଶ କେନ୍ଦ୍ରରୁ ଆଣୁ ନଥିବା ସାଂଘାତିକ ବିଷୟ ବୋଲି କହିଥିଲେ। ଅନ୍ୟପକ୍ଷରେ ଗତ ୯ ମାସ ହେଲା ନାସା ପକ୍ଷରୁ ଦାବି କରାଯାଇଛି ଯେ ଦୁଇ ମହାକାଶଚାରୀ ମହାକାଶ କେନ୍ଦ୍ରରେ ଫସି ନାହାନ୍ତି। ସେମାନେ ନିରାପଦ ଅଛନ୍ତି ଏବଂ ସେମାନଙ୍କ ସ୍ବାସ୍ଥ୍ୟ ଠିକ୍‌ ଅଛି।

ସୁନୀତାଙ୍କୁ ସ୍ୱାଗତ କଲେ ଡଲଫିନ

ଫ୍ଲୋରିଡ଼ା: ମହାକାଶରୁ ଦୀର୍ଘ ୧୭ ଘଣ୍ଟାର ଯାତ୍ରା ପରେ ଫ୍ଲୋରିଡା ଉପସାଗରୀୟ ଉପକୂଳରେ ଅବତରଣ କରିଥିବା କ୍ରୁ-୯ ମହାକାଶଚାରୀଙ୍କୁ ଡଲ୍‌ଫିନମାନେ ସ୍ୱାଗତ କରିଥିଲେ। ନାସାର ମହାକାଶଚାରୀ ସୁନୀତା ୱିଲିୟମ୍ସ ଓ ବୁଚ୍ ୱିଲ୍‌ମୋରଙ୍କୁ ନେଇ ସ୍ପେସ୍ଏକ୍ସ ଡ୍ରାଗନ୍ କ୍ୟାପସୁଲ ଫ୍ଲୋରିଡାର ତଲ୍ଲାହାସି ଉପକୂଳରେ ଅବତରଣ କରିବା ପରେ ସେମାନଙ୍କ ୯ ମାସର ମହାକାଶ ଯାତ୍ରାର ଅନ୍ତ ଘଟିଥିବା ବେଳେ ଅପ୍ରତ୍ୟାଶିତ ସ୍ୱାଗତର ସୁଅ ଛୁଟିଛି। ସେଫ୍ଟି ଟିମ୍ ଏହାକୁ ଜାହାଜକୁ ସ୍ଥାନାନ୍ତର କରିବାକୁ ଆସୁଥିବା ବେଳେ କ୍ୟାପସୁଲ ନିକଟରେ କିଛି ଉଲ୍ଲସିତ ଡଲ୍‌ଫିନଙ୍କୁ ଦେଖିବାକୁ ମିଳିଥିଲା।

ପ୍ରଶଂସାରେ ପୋତିଲେ ମୋଦୀ

ନୂଆଦିଲ୍ଲୀ: ନାସା ମହାକାଶଚାରୀ ସୁନୀତା ୱିଲିୟମ୍ସଙ୍କ ପୃଥିବୀ ପ୍ରତ୍ୟାବର୍ତ୍ତନକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଓ ଅନ୍ୟ ମନ୍ତ୍ରୀମାନେ ପ୍ରଶଂସା କରିଛନ୍ତି। ଏକ୍ସରେ ଏକ ପୋଷ୍ଟରେ ପ୍ରଧାନମନ୍ତ୍ରୀ ମୋଦୀ କହିଛନ୍ତି ଯେ ଆଇଏସ୍‌ଏସ୍‌ର ମିସନ ଧୈର୍ଯ୍ୟ, ସାହସ ଓ ଅସୀମ ଉତ୍ସାହର ପରୀକ୍ଷା ଥିଲା। ପ୍ରଧାନମନ୍ତ୍ରୀ କହିଛନ୍ତି, ମହାକାଶ ଗବେଷଣା ହେଉଛି ମାନବ ସାମର୍ଥ୍ୟର ସୀମା ଅତିକ୍ରମ କରିବା, ସ୍ୱପ୍ନ ଦେଖିବା ଓ ସେହି ସ୍ୱପ୍ନକୁ ବାସ୍ତବରେ ପରିଣତ କରିବାର ସାହସ ରଖିବା। ସୁନୀତା ୱିଲିୟମ୍ସ ତାଙ୍କ କ୍ୟାରିୟରରେ ଏହାର ଉଦାହରଣ ପାଲଟିଛନ୍ତି। ସେମାନଙ୍କ ସୁରକ୍ଷିତ ପ୍ରତ୍ୟାବର୍ତ୍ତନକୁ ସୁନିଶ୍ଚିତ କରିବା ପାଇଁ ଅକ୍ଳାନ୍ତ ପରିଶ୍ରମ କରିଥିବା ସମସ୍ତଙ୍କ ଲାଗି ଆମେ ଅତ୍ୟନ୍ତ ଗର୍ବିତ।

ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ମହାକାଶରେ ଅସାଧାରଣ ସଫଳତା ପାଇଁ ମହାକାଶଚାରୀମାନଙ୍କୁ ଅଭିନନ୍ଦନ ଜଣାଇଛନ୍ତି। ସେ କହିଛନ୍ତି ଯେ, ସୁନୀତା ଓ ତାଙ୍କ ଟିମ୍ ମହାକାଶରେ ମାନବୀୟ ଧୈର୍ଯ୍ୟର ଇତିହାସ ଲେଖିଛନ୍ତି। କ୍ରୁ-୯ରେ ମହାକାଶଚାରୀଙ୍କ ସୁରକ୍ଷିତ ପ୍ରତ୍ୟାବର୍ତ୍ତନରେ ସେ ଆନନ୍ଦିତ ବୋଲି ରାଜନାଥ କହିଛନ୍ତି। କେନ୍ଦ୍ର ବିଜ୍ଞାନ ଓ ପ୍ରଯୁକ୍ତି ବିଦ୍ୟା ମନ୍ତ୍ରୀ ଜିତେନ୍ଦ୍ର ସିଂହ ମଧ୍ୟ ନାସା ମହାକାଶଚାରୀଙ୍କୁ ଅଭିନନ୍ଦନ ଜଣାଇବା ସହ ତାଙ୍କ ନାମ ଇତିହାସରେ ଲିପିବଦ୍ଧ ହୋଇଛି ବୋଲି କହିଛନ୍ତି। ଏହା ପୂର୍ବରୁ ଜିତେନ୍ଦ୍ର ଗୁଜୁରାଟରେ ସୁନୀତା ୱିଲିୟମ୍ସଙ୍କ ଭାରତୀୟ ମୂଳ ବିଷୟରେ ଉଲ୍ଲେଖ କରି କହିଥିଲେ ଯେ ଭାରତୀୟ ମହାକାଶ ବୈଜ୍ଞାନିକମାନେ ଅନ୍ତର୍ଜାତୀୟ ସ୍ତରରେ ତରଙ୍ଗ ସୃଷ୍ଟି କରୁଛନ୍ତି। ଭାରତ ଓ ଗୁଜରାଟ ସହ ତାଙ୍କର ବହୁତ ଗଭୀର ସମ୍ପର୍କ ରହିଛି। ଏହା ମଧ୍ୟ ଏକ ସଙ୍କେତ ଯେ ନାସା ସମେତ ଭାରତ ବାହାରେ ଥିବା ଅଧିକାଂଶ ମହାକାଶ ଏଜେନ୍ସି ଏବେ ସେମାନଙ୍କର ଅଧିକାଂଶ ଗୁରୁତ୍ୱପୂର୍ଣ୍ଣ ଅଭିଯାନର ନେତୃତ୍ୱ ନେଉଛନ୍ତି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ମଧ୍ୟ ଆମେରିକୀୟ ନେତାମାନଙ୍କ ସହ ବୈଠକ ସମୟରେ ୱିଲିୟମ୍ସଙ୍କ ବିଷୟରେ ହୋଇଥିବା ଆଲୋଚନାକୁ ମନେ ପକାଇ ଶୁଭେଚ୍ଛା ଜଣାଇଥିଲେ।

‘ଭାରତରତ୍ନ’ ଦାବି କଲେ ମମତା

କୋଲକାତା: ଭାରତୀୟ ବଂଶୋଦ୍ଭବ ଆମେରିକୀୟ ମହାକାଶଚାରୀ ସୁନୀତା ୱଲିୟମ୍‌ସଙ୍କୁ ଭାରତର ସର୍ବୋଚ୍ଚ ବେସାମରିକ ସମ୍ମାନ ‘ଭାରତରତ୍ନ’ରେ ସମ୍ମାନିତ କରିବାକୁ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ଦାବି କରିଛନ୍ତି। ଅନ୍ତର୍ଜାତୀୟ ମହାକାଶ କେନ୍ଦ୍ରରେ ୨୮୬ ଦିନ ରହିବା ପରେ ସୁନୀତା ୱିଲିୟମ୍‌ସଙ୍କ ପୃଥିବୀକୁ କୁଶଳ ପ୍ରତ୍ୟାବର୍ତ୍ତନ ପ୍ରସଙ୍ଗରେ ଆଜି ମୁଖ୍ୟମନ୍ତ୍ରୀ ମମତା ବିଧାନସଭାରେ ବକ୍ତବ୍ୟ ରଖିଥିଲେ। ନାସା ଓ ସ୍ପେସ୍‌ଏକ୍ସ ଟିମ୍‌କୁ ପଶ୍ଚିମବଙ୍ଗ ବିଧାନସଭା ପକ୍ଷରୁ ସେ କୃତଜ୍ଞତା ଜଣାଇଥିଲେ। ଏହାସହ ସୁନୀତାଙ୍କୁ ଭାରତରତ୍ନ ଦେବା ଉଚିତ ବୋଲି କହିଥିଲେ। ପରବର୍ତ୍ତୀ ସମୟରେ ଏହି ପ୍ରସଙ୍ଗକୁ ନେଇ ସେ ‘ଏକ୍ସ’ରେ ପୋଷ୍ଟ କରିଛନ୍ତି। ଏଥିରେ ସେ ଲେଖିଛନ୍ତି, ଆମ ଭାରତର କନ୍ୟା ଆମ ନିକଟକୁ ଫେରି ଆସିଛି। ଆମେ ବୁଚ୍‌ ୱିଲ୍‌ମୋର୍‌ଙ୍କ ପାଇଁ ମଧ୍ୟ ବହୁତ ଖୁସି। ସେମାନଙ୍କ ସାହସ ଜିନ୍ଦାବାଦ୍‌, ସେମାନଙ୍କ ପ୍ରତ୍ୟାବର୍ତ୍ତନ ଜିନ୍ଦାବାଦ, ମାନବ ବିକାଶ ଜିନ୍ଦାବାଦ।