ନୂଆଦିଲ୍ଲୀ: ଆତଙ୍କବାଦୀ ସଂଗଠନ ଜୈସ-ଏ-ମହମ୍ମଦର ପ୍ରତିଷ୍ଠାତା ମୌଲାନା ମାସୁଦ ଆଝାରକୁ ହୃଦ୍ଘାତ ହୋଇଥିବା ରିପୋର୍ଟ ମିଳିଛି। ଡିସେମ୍ବର ୧୯୯୯ରେ ଆଇସି-୮୧୪ ବିମାନ ଅପହରଣକାରୀମାନେ ମାସୁଦ ଆଝାରକୁ ମୁକ୍ତ କରିବାକୁ ଦାବି କରିବା ପରେ ଭାରତ ତାକୁ ମୁକ୍ତ କରିଥିଲା। ଏହାପରେ ମାସୁଦ ଆଝାର ଭାରତରେ ଅଗଣିତ ଆତଙ୍କୀ କାର୍ଯ୍ୟକଳାପରେ ସମ୍ପୃକ୍ତ ଥିବା ଆତଙ୍କବାଦୀ ସଂଗଠନ ଜୈସ-ଏ-ମହମ୍ମଦ ଗଠନ କରିଥିଲା। ଏହି ନେଟୱାର୍କ ୨୦୦୮ ମୁମ୍ବାଇ ଆତଙ୍କବାଦୀ ଆକ୍ରମଣର ଯୋଜନାରେ ମଧ୍ୟ ସାହାଯ୍ୟ କରିଥିଲା। ରିପୋର୍ଟ ଅନୁଯାୟୀ, ମାସୁଦ ଆଝାର ଆଫଗାନିସ୍ତାନର ଖୋଷ୍ଟ ପ୍ରଦେଶରେ ଥିବା ବେଳେ ତାକୁ ହୃଦ୍ଘାତ ହୋଇଥିଲା।
ଏବେ ତାକୁ ପାକିସ୍ତାନ ସ୍ଥାନାନ୍ତର କରାଯାଇଛି ଏବଂ କରାଚିରେ ତା’ର ଚିକିତ୍ସା କରାଯିବ। ମାସୁଦ ଆଝାରର ଚିକିତ୍ସା ପାଇଁ ବିଶେଷଜ୍ଞ ଡାକ୍ତରଙ୍କୁ ଇସଲାମାବାଦରୁ କରାଚି ନିଆଯାଉଥିବା ସୂଚନା ମିଳିଛି। ପାକିସ୍ତାନ ସୁରକ୍ଷିତ ଆଶ୍ରୟସ୍ଥଳୀ ଯୋଗାଇ ଦେଉଥିବା ଅନେକ ଆତଙ୍କବାଦୀ ସଂଗଠନ ମଧ୍ୟରୁ ଜୈଶ-ଏ-ମହମ୍ମଦ ଅନ୍ୟତମ, ଯଦିଚ ପାକିସ୍ତାନ ଏହାକୁ ଅସ୍ୱୀକାର କରିଛି। ପାକିସ୍ତାନ ଆତଙ୍କବାଦକୁ ଅସ୍ତ୍ର ଭାବେ ବ୍ୟବହାର କରୁଛି ବୋଲି ଭାରତ ସର୍ବଦା କହି ଆସୁଛି।
