ବିବାହର ମାତ୍ର କେଇ ଘଣ୍ଟା ମଧ୍ୟରେ ହିଁ ପୁତ୍ର ସନ୍ତାନକୁ ଜନ୍ମ ଦେଲେ ଏହି ମହିଳା। କଥାଟି ଶୁଣିବା ପାଇଁ ଅଜବ ଲାଗୁଥିଲେ ହେଁ ଉତ୍ତରପ୍ରଦେଶ ସ୍ଥିତ ଅସମୋଲି ଗାଁରେ ଏଭଳି ହିଁ ଏକ ଘଟଣା ଘଟିଯାଇଛି ଯାହାକି ସ୍ଥାନୀୟ ଅଞ୍ଚଳରେ ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଛି। ଏଥିସହିତ ବିବାହ ପୂର୍ବରୁ ଗର୍ଭବତୀ ହୋଇଥିବା ଯୁବତୀ ଜଣଙ୍କ ମଧ୍ୟ ନ୍ୟାୟ ପାଇବାରେ ସଫଳ ହୋଇଛନ୍ତି।
ମିଳିଥିବା ସୂଚନା ଅନୁଯାଇ ଅସମୋଲି ଗାଁର ସମ୍ପୃକ୍ତ ଯୁବକଙ୍କ ସହିତ ଯୁବତୀଙ୍କର ପ୍ରେମ ସମ୍ପର୍କ ରହିଥିଲା। ଏପରିକି ବିବାହ ବିନା ହିଁ ସେ ଗର୍ଭବତୀ ହୋଇ ଯାଇଥିଲେ। ଗର୍ଭବତୀ ହୋଇଥିବା ଜାଣିବା ପରେ ଯୁବକ ଜଣଙ୍କ ବିବାହ କରିବାକୁ ମନା କରି ଦେଇଥିଲେ। ଘଟଣା ଦିନ ପ୍ରସବ ଯନ୍ତ୍ରଣା ଆରମ୍ଭ ହେବାରୁ ଯୁବତୀ ଜଣକ ପ୍ରେମିକ ଘରକୁ ଯାଇ ବିବାହ କରିବାକୁ ଜିଦ୍ ଧରି ବସିଥିଲେ।
ଏହାପରେ ସ୍ଥାନୀୟ ଅଞ୍ଚଳରେ ବେସ୍ ଉତ୍ତେଜନା ଦେଖା ଦେଇଥିଲା। ଉଭୟ ପାର୍ଶ୍ଵ ଲୋକଙ୍କ ଉପସ୍ଥିତିରେ ଗାଁରେ ଏକ ପଞ୍ଚାୟତ ଅନୁଷ୍ଠିତ ହୋଇଥିଲା। ତୁରନ୍ତ ଉଭୟଙ୍କ ବିବାହ କରାଇବା ପାଇଁ ନିଷ୍ପତ୍ତି ହେବାପରେ ସେମାନଙ୍କର ବାହାଘର ହୋଇଥିଲା। ତେବେ, ବିବାହର ମାତ୍ର କେଇ ଘଣ୍ଟା ମଧ୍ୟରେ ଯୁବତୀଙ୍କର ପ୍ରସବ ଯନ୍ତ୍ରଣା ଆରମ୍ଭ ହୋଇଯାଇଥିଲା ଏବଂ ନିକଟସ୍ଥ ଡାକ୍ତରଖାନାରେ ସେ ଏକ ପୁତ୍ର ସନ୍ତାନକୁ ଜନ୍ମ ଦେଇଥିବା ଜଣାପଡିଛି।
