ଚାକିରି ଦେବା ନାଁରେ ଠକେଇ ଅଭିଯୋଗ: ରିମାଣ୍ଡରେ ଆସିବ ଠକ ସର୍ଦ୍ଦାର ସଚ୍ଚିଦାନନ୍ଦ ଭୋଇ – Utkal Mail
ଭୁବନେଶ୍ୱର: ଚାକିରି ଦେବା ନାଁରେ ଠକେଇ ଅଭିଯୋଗରେ ଗିରଫ ହୋଇଥିବା ସଚ୍ଚିଦାନନ୍ଦ ଭୋଇକୁ ୩ ଦିନ ରିମାଣ୍ଡ ପାଇଁ ଭୁବନେଶ୍ୱର ଜେଏମଏଫସି କୋର୍ଟରେ ଆବେଦନ କରିଛି ସ୍ପେଶାଲ କ୍ରାଇମ ୟୁନିଟ।
କୋଟି କୋଟି ଟଙ୍କା ଠକେଇ ଅଭିଯୋଗରେ ସଚ୍ଚିଦାନନ୍ଦ ଭୋଇକୁ ଗିରଫ କରିଛି ସ୍ପେଶାଲ କ୍ରାଇମ ୟୁନିଟ। ୨୦୧୦ ମସିହାରୁ କଳାକାରନାମା ଚଳାଇ ରାଜ୍ୟ ବାହାରୁ ୧୦ କୋଟିରୁ ଉର୍ଦ୍ଧ୍ବ ଟଙ୍କା ଠକିଛି ସଚ୍ଚିଦାନନ୍ଦ। ସେ ୨୦୧୦ ମସିହାରେ ଉଜ୍ଜ୍ୱଳା ପ୍ରାଇଭେଟ ଲିମିଟେଡ ନାମକ ସଂସ୍ଥା ଆରମ୍ଭ କରିଥିଲା। ସେ ତେଲକୋଇସ୍ଥିତ ଭୂଷଣ ପ୍ରାଇଭେଟ ଲିମିଟେଡ କମ୍ପାନିରେ ଚାକିରି କରାଇବାକୁ କହି ୫୦ ଲକ୍ଷ ଠକିଥିଲା। ବିପିସିଏଲରେ ଠକେଇ ନେଇ ମଧ୍ୟ ପୂର୍ବରୁ ସମ୍ବଲପୁର ପୁଲିସ ତାକୁ ଗିରଫ କରିଥିଲା। ଜୟଦେବ ବିହାର ଛକରେ ସେ ଓଏଫଏଫଓଏସ’ ନାମକ ଏକ ଅଫିସ ଖୋଲିଥିଲା ଓ ପରେ ରସୁଲଗଡ଼ ଏସପ୍ଲାନେଡ ଭିତରେ ଅଫିସ କରି କୋଟି କୋଟି ଲୁଟିଥିଲା।
୨୦୧୬ ମସିହାରେ ରାୟପୁର ପୋଲିସ ମଧ୍ୟ ଏହି ଚତୁର ଠକକୁ ବାନ୍ଧିଥିଲା। ସହିଦନଗର, ତମାଣ୍ଡୋ, ମଞ୍ଚେଶ୍ୱର ଥାନାରେ ଠକ ବିରୋଧରେ ମାମଲା ରହିଛି। ଅନ୍ୟ ରାଜ୍ୟ ପୁଲିସ ସହ ଏ ନେଇ ଯୋଗାଯୋଗ କରୁଛି ସ୍ପେଶାଲ କ୍ରାଇମ ୟୁନିଟ। ତା ନାଁରେ କେତୋଟି କମ୍ପାନି ଅଛି ଜାଣିବା ପାଇଁ ରେଜିଷ୍ଟାର ଅଫ କମ୍ପାନୀଜ ( ଆରଓସି ) କୁ ଚିଠି ଲେଖାଯାଇଛି। ଟ୍ରାଞ୍ଜାକ୍ସନ ସମ୍ପର୍କରେ ଜାଣିବା ପାଇଁ ବ୍ୟାଙ୍କ କୁ ଚିଠି ଲେଖାଯାଇଛି। ଠକ ବିରୋଧରେ ଅଭିଯୋଗ ଥିଲେ ତୁରନ୍ତ ନିକଟସ୍ଥ ଥାନାରେ କରିବାକୁ ସୂଚନା ଦେବାକୁ ସ୍ପେଶାଲ କ୍ରାଇମ ୟୁନିଟର ଅତିରିକ୍ତ ଡିସିପି ସଞ୍ଜୀବ ଶତପଥୀ କହିଛନ୍ତି।
