ମୁମ୍ବାଇ : ମହାରାଷ୍ଟ୍ରରେ ଦଶହରା ଅବସରରେ ଉଦ୍ଧବ ଠାକରେ ଗୋଷ୍ଠୀ (ଶିବସେନା ୟୁବିଟି)ର ଶିବସେନା ଏବଂ ମୁଖ୍ୟମନ୍ତ୍ରୀ ଏକନାଥ ସିନ୍ଦେଙ୍କ ନେତୃତ୍ୱାଧୀନ ଶିବସେନା ମଙ୍ଗଳବାର ଅଲଗା ଅଲଗା ରାଲି କରିବେ। ଏହି ରାଲି ଜରିଆରେ ଆଗାମୀ ଲୋକସଭା ନିର୍ବାଚନ ଓ ରାଜ୍ୟ ବିଧାନସଭା ନିର୍ବାଚନ ପାଇଁ ରଣହୁଙ୍କାର ମଧ୍ୟ ଦିଆଯିବ। ଉଦ୍ଧବ ଠାକରେଙ୍କ ଦଳ ଶିବାଜୀ ପାର୍କରେ ରାଲି କରିବେ ଏବଂ ଏକନାଥ ସିନ୍ଦେଙ୍କ ଗୋଷ୍ଠୀ ଆଜାଦ ମୈଦାନରେ ଏକ ରାଲି କରିବେ। ଏହା ସ୍ପଷ୍ଟ ଯେ ଏସବୁ ରାଲି ରାଜନୈତିକ ବାର୍ତ୍ତା ଦେବ, କିନ୍ତୁ ସବୁଠାରୁ ଆକର୍ଷଣୀୟ କଥା ହେଉଛି ବାଲାସାହେବ ଠାକରେଙ୍କୁ କେନ୍ଦ୍ରରେ ରଖି ଉଭୟ ଗୋଷ୍ଠୀ ନିଜ ନିଜର ରାଲି କରୁଛନ୍ତି ।
୧୯୬୬ ରେ ବାଲାସାହେବ ଠାକରେ ଶିବସେନା ପ୍ରତିଷ୍ଠା କରିଥିଲେ । ଶିବାଜୀ ପାର୍କରେ ଶିବସେନାର ପ୍ରଥମ ରାଲି ଅନୁଷ୍ଠିତ ହୋଇଥିଲା । ଏହାପରେ ବାଲାସାହେବ ଠାକରେଙ୍କ ନେତୃତ୍ୱରେ ଶିବସେନା ନିଜର ଯାତ୍ରା ଆରମ୍ଭ କରିଥିଲା । ୨୦୨୨ରେ ଏକନାଥ ସିନ୍ଦେ ବିଦ୍ରୋହ କରିବା ପରେ ଦଳରେ ଦୁଇଟି ଗୋଷ୍ଠୀ ଗଠନ ହୋଇଥିଲା। ଗୋଟିଏ ଗୋଷ୍ଠୀ ଉଦ୍ଧବଙ୍କ ନେତୃତ୍ୱରେ ଚାଲିଥିବା ବେଳେ ଅନ୍ୟ ଗୋଷ୍ଠୀଏକନାଥ ସିନ୍ଦେଙ୍କ ନେତୃତ୍ୱରେ ଚାଲିଛି।
ଯଦି ବିଭାଜନ ହୋଇ ନଥାନ୍ତା, ତେବେ ବାଲାସାହେବ ଠାକରେଙ୍କ ଦ୍ୱାରା ପ୍ରତିଷ୍ଠିତ ଶିବସେନାର ଏହା ୫୭ତମ ରାଲି ହୋଇଥାନ୍ତା, କିନ୍ତୁ ଏବେ ଏହା ଦୁଇ ଗୋଷ୍ଠୀର ଦ୍ୱିତୀୟ ରାଲି। ଉଦ୍ଧବ ଗୋଷ୍ଠୀ ଶିବାଜୀ ପାର୍କରେ ରହିବେ ଏବଂ ସିନ୍ଦେ ଗୋଷ୍ଠୀ ଆଜାଦ ମୈଦାନରୁ ପ୍ରଚାର କରିବେ, ତେଣୁ ଦୁହେଁ ସର୍ବସାଧାରଣରେ ନିଜକୁ ବାଲାସାହେବଙ୍କ ଉତ୍ତରାଧିକାରୀ ଭାବେ ଘୋଷଣା କରିବାକୁ ଚେଷ୍ଟା କରୁଛନ୍ତି। ଉଦ୍ଧବ ଗୋଷ୍ଠୀ ବାଲଠାକରେଙ୍କୁ ନିଜର ଭଗବାନ କହୁଥିବାବେଳେ ସିନ୍ଦେ ଗୋଷ୍ଠୀ ତାଙ୍କୁ ଆଦର୍ଶରେ ଚାଲୁଥିବା କହୁଛି ।
