କୋଲକାତା : କୋଲକାତାର ଇଡେନ ଗାଡେନ୍ସଠାରେ ଖେଳାଯାଉଥିବା ଆଇସିସି ବିଶ୍ବକପର ଏକ ମ୍ୟାଚରେ ପାକିସ୍ତାନ ଆଗରେ ୩୩୮ ରନର ଲକ୍ଷ୍ୟ ରଖିଛି ଇଂଲଣ୍ଡ ।
ଏହି ମ୍ୟାଚରେ ଇଂଲଣ୍ଡ ଟସ ଜିତି ପ୍ରଥମେ ବ୍ୟାଟିଂ କରିବାକୁ ନିଷ୍ପତ୍ତି ନେଇଥିଲା । ଇଂଲଣ୍ଡ ପକ୍ଷରୁ ଜନି ବେୟାରଷ୍ଟୋ ଓ ଡାଓ୍ବିଡ୍ ମଲାନ ଭଲ ଆରମ୍ଭ କରିଥିଲେ । ମଲାନ ୩୧ ରନ କରିଥିବାବେଳେ ବେୟାରଷ୍ଟୋ ୫୯ ରନ କରିଥିଲେ । ଏହି ଦୁଇ ଓପନର ଆଉଟ ହେବା ପରେ ଆସିଥିବା ଜୋ ରୁଟ୍ ଓ ବେନ ଷ୍ଟୋକ୍ସ ଏକ ଭଲ ପାର୍ଟନରସିପ କରିବା ସହ ସ୍କୋରକୁ ଦ୍ରୁତ ଗତିରେ ଆଗେଇ ନେଇଥିଲେ । ରୁଟ୍ ୬୦ ଓ ଷ୍ଟୋକ୍ସ ୮୪ ରନ କରିଥିଲେ । ସେହିପରି ଜସ ବଟଲର ୨୭ରନ ଓ ହେରି ବ୍ରୁକ୍ସ ୩୦ ରନ କରିଥିଲେ । ଇଂଲଣ୍ଡ ୫୦ ଓଭରରେ ୯ ଓ୍ବିକେଟ ହରାଇ ୩୩୭ ରନ କରିଥିଲା ।
ପାକିସ୍ତାନ ପକ୍ଷରୁ ହାରିସ୍ ରୌଫ ୩ଟି ଓ୍ବିକେଟ ନେଇଥିବାବେଳେ ଶାହିନ ଆଫ୍ରିଦି ୨ଟି ଓ୍ବିକେଟ ନେଇଥିଲେ । ଇଫତିଖାର ଅହମ୍ମଦ ଗୋଟିଏ ଓ୍ବିକେଟ ନେଇଥିଲେ ।
ସେମିଫାଇନାଲରେ ପହଞ୍ଚିବା ଲାଗି ପାକିସ୍ତାନ ପାଇଁ ଏହା ଏକ ଗୁରୁତ୍ବପୂର୍ଣ୍ଣ ମ୍ୟାଚ କୁହାଯାଉଥିଲେ ବାସ୍ତବିକତା ଦୃଷ୍ଟିକୋଣରୁ ଏହି ମ୍ୟାଚର ଗୁରୁତ୍ବ ହ୍ରାସ ପାଇଛି । କାରଣ ସେମିରେ ପହଞ୍ଚିବାକୁ ପାକିସ୍ତାନ ଆଗରେ ଯେଉଁ ଅସମ୍ଭବ ଲକ୍ଷ୍ୟ ରହିଛି, ତାହାକୁ ଦେଖିଲେ ଜଣାଯାଉଛି ଯେ ପାକିସ୍ତାନ ପାଇଁ ଆଜି ହେଉଛି ବିଦାୟ ରଜନୀ । ଶନିବାର ଖେଳାଯାଇଥିବା ପ୍ରଥମ ମ୍ୟାଚରେ ବାଂଲାଦେଶକୁ ୮ ଓ୍ବିକେଟରେ ପରାସ୍ତ କରିଛି ଅଷ୍ଟ୍ରେଲିଆ ।
