ଡ଼ିହସାହି ପ୍ରାଥମିକ ବିଦ୍ୟାଳୟରେ ପ୍ରଧାନଶିକ୍ଷୟିତ୍ରୀଙ୍କ ଦବଙ୍ଗଗିରି, ସହକାରୀ ଶିକ୍ଷୟିତ୍ରୀ ଆହାତ
ଆନନ୍ଦପୁର ବ୍ଲକ ଅନ୍ତର୍ଗତ ବେଲବାହାଳି ପଞ୍ଚାୟତର ଡ଼ିହସାହି ପ୍ରାଥମିକ ବିଦ୍ୟାଳୟର ପ୍ରଧାନଶିକ୍ଷୟିତ୍ରୀଙ୍କ ଦବଙ୍ଗଗିରିରେ ସହକାରୀ ଶିକ୍ଷୟିତ୍ରୀ ଆହତ ହୋଇଥିବାର ଜଣାଯାଇଛି । ଖବରନେବାରୁ ଜଣାଯାଏ ଡ଼ିହସାହି ପ୍ରାଥମିକ ବିଦ୍ୟାଳୟର ପ୍ରଧାନଶିକ୍ଷୟିତ୍ରୀ ଲିଲିପ୍ରିୟା ଜେନା ସହକାରୀ ଶିକ୍ଷୟିତ୍ରୀ ପଙ୍କଜିନୀ ସାହୁଙ୍କୁ ବିଭିନ୍ନ ସମୟରେ ମିଥ୍ୟା ଆରୋପ ଲଗାଇ ଗାଳିଗୁଲଜ କରୁଥିବାରୁ ନିଜର ସୁରକ୍ଷା ପାଇଁ ସହକାରୀ ଶିକ୍ଷୟିତ୍ରୀ ଏହାର ଅଡ଼ିଓ ରେକଡ଼ିଂ କରୁଥିବା ଜଣିପାରି ଶନିବାର ଦିନ ବିଦ୍ୟାଳୟ ପରିସରରେ ପ୍ରଧାନଶିକ୍ଷୟିତ୍ରୀ ଲିଲିପ୍ରିୟା ଜେନା ଉତ୍କ୍ଷିପ୍ତ ହୋଇ ସହକାରୀ ଶିକ୍ଷୟିତ୍ରୀ ଶ୍ରୀମତି ସାହୁଙ୍କୁ ଗୋଡ଼ାଇ ଗୋଡ଼ାଇ ଆକ୍ରମଣ କରିଥିଲେ । ନିକଟରେ ଥିବା ବିଦ୍ୟାଳୟର ପାଚିକାଙ୍କ ସହ ଅନ୍ୟକେତେକ ସ୍ତ୍ରୀଲୋକ ପହଞ୍ôଚ ଗଣ୍ଡଗୋଳକୁ ରୋକିଥିଲେ । ଏହି ଘଟଣାକୁ ନେଇ ସହକାରୀ ଶିକ୍ଷୟିତ୍ରୀ ପଙ୍କଜିନୀ ସାହୁ ପ୍ରଧାନଶିକ୍ଷୟିତ୍ରୀଙ୍କ ବିରୁଦ୍ଧରେ ଘସିପୁରା ଥାନାରେ ଏକ ଏତଲା ଦେଇଥିବା ବେଳେ ଅପରପକ୍ଷେ ପ୍ରଧାନଶିକ୍ଷୟିତ୍ରୀ ସହକାରୀ ଶିକ୍ଷୟିତ୍ରୀଙ୍କ ବିରୁଦ୍ଧରେ ଘସିପୁରା ଥାନାରେ ଏତଲା ଦେଇଥିବାର ଜଣାଯାଇଛି । ପୋଲିସ ଘଟଣାସ୍ଥଳରେ ପହଞ୍ôଚ ଘଟଣାର ତଦନ୍ତ ଜାରି ରଖିଥିବା ବେଳେ ଗ୍ରାମବାସୀଙ୍କ ପକ୍ଷରୁ ଏହିଘଟଣା ନେଇ ତୀବ୍ର ଅସନ୍ତୋଷ ପ୍ରକାଶ ପାଇବା ସହିତ ପ୍ରଧାନଶିକ୍ଷୟିତ୍ରୀଙ୍କ ବିଶୃଙ୍ଖଳିତ କାର୍ଯ୍ୟକଳାପକୁ ନିନ୍ଦା କରାଯାଇଛି । ତୁରନ୍ତ ଜିଲ୍ଲା ଶିକ୍ଷାଧିକାରୀ ଓ ଆନନ୍ଦପୁର ବିଇଓ ଘଟଣାର ତଦନ୍ତ କରି ଦୋଷୀଙ୍କ ବିରୁଦ୍ଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ଗ୍ରାମବାସୀଙ୍କ ପକ୍ଷରୁ ଦାବି ହୋଇଛି ।
